त्रिभुवन पार्कया जग्गा लित बीत माग

येँ – थान–कोटया स्थानीय जनतां अन दयेका तःगु त्रिभुवन पार्कया जग्गा थःपिंत तुं लित बीत माग याःगु दु । त्रिभुवन पार्कयात थौंकन्हय् पार्क स्वयां नं भ्वय् नयेगु थाय् व पार्टी प्यालेस दयेकेगु ज्या याना हयेवं स्थानीय जनतां यदि अन पार्क आवश्यक मजूगु खःसा अन च्वंगु जग्गा थःपिंत तुं लित बीमाः धकाः माग याना हःगु खः ।

पञ्चायतकालय् स्थानीय जनताया १६५ रोपनी जग्गा अधिग्रहण यानाः कासें अन पार्क दयेकूगु खः । सहरी लागाय् छगू व्यवस्थित पार्क दयेकेगु ताः तयाः अन जग्गा अधिग्रहण याःगु खःसां थौंकन्हय् अन दुने निजी क्षेत्रया ब्यांक्वेट समेत चायेका हःगुलिं स्थानीय जनता असन्तुष्ट जुयाच्वंगु खः ।

आः वयाः थ्वहे पार्क अन्तर्गतया ५५ रोपनी छगू फन पार्क दयेकेत बीगु धकाः तयारी जुयाच्वंगु खँ नं धाःगु दु । छगू निजी संस्थां सञ्चालन याइगु फन पार्कयात थनया जग्गा बीत्यन धकाः नं स्थानीय जनतां विरोध याःगु दु । त्रिभुवन पार्कय् जुयाच्वंगु थ्व ज्याखँयात कयाः एमाले सांसद बीना श्रेष्ठं सदनय् नं खँ ल्ह्वनादीधुंकूगु दु ।

सदनय् थ्व खँ तसें वय्कलं स्थानीय जनताया जग्गा अधिकरण यानाः दयेकातःगु पार्कयात छुं मनूतय् कमे यायेगु थाय् दयेकातःगु जुयाः स्थानीय जनता थःपिंके न्हापा कयातःगु जग्गा लित बीमाः धकाः जुरमुरे जुयाः दना वयाच्वंगु खँ नं कनादिल । लिसें वय्कलं अन १५० मा सिमा पालेत्यंगु खँय् नं आपत्ति प्वंकादिल ।

सम्बन्धित बुखँ

LEAVE YOUR COMMENTS