यलय् अस्थायी संग्रहालय

यल दरवार संग्रहालयं दर्शकयात हाकनं वयेकेगु लकस दयेकेगु निंतिं अस्थायी प्रदर्शनी शुरु यायेत्यंगु खँ संग्रहालयया प्रमुख सुरेशमान लाखें कनादिल । नियमित संग्रहालयलिसें इलय् ब्यलय् अस्थायी संचालन यायेत्यंगु खः । अस्थायी संग्रहालय छगू छगू विषयवस्तुइ केन्द्रित जुयाः प्रदर्शन जुइ । थीथी उमेर, पेशा व रुचिया आगन्तुकयात केन्द्रित यानाः प्रदर्शनी यायेगु संग्रहालयया योजना दु ।

प्रदर्शनी जुइगु सुन्दरीचोक हे ज्ञानया ल्याखं आगन्तुकया निंतिं महत्वपूर्ण जूगु खँ नं वय्कलं कनादिल । वय्कलं धयादिल, ‘ताःहाकःगु इलंनिसें बन्द जुयाच्वंगु थुगु चोकं हे आगन्तुकं यक्व खँ सयेके फइ ।’ संग्रहालयं सुन्दरीचोकया बँ सिउचां इलाः पुलांगु हे स्वरुप बियातःगु दु । थन आन्तरिक व विदेशी पर्यटकया ल्याः दँय्दसं अप्वया वनाच्वंगु दुसा आम्दानी नं जुयाच्वंगु दु ।