अले कंगाल जुइ …… !

छम्ह विचलित ल्वगि । अजू चायापुगु ल्वचं पीडित । स्वत्तु स्वःगु नुगः । भुग्लुंभाग्लुं । अशान्त नुगः । पीडा । असह्य जुइ । छन्हु व ल्वगि डाक्टरयाथाय् वनी । क्यनी । डाक्टरं न्यनी ‘भाजु, छितः छु जुल ? धयादिसँ ।’ ल्वगिं धाइ, ‘डाक्टर सा’ब, जितः मखुगु हे ल्वय् जू थें च्वं । जि तसकं चिन्तित । नुगः तयां तये मजिउ । जि …. । डाक्टर । चा–न्हिं । जिगु न्हाय्पनय् रेलया ‘छुक छुक’ सः थ्वयाच्वनीगु ।

मदिक्क । व नं तस्सलं । न्हाय्पं हे नइथें च्वंक गबलें रेल न्हयबि जुयाः जिगु छपा न्हापय्पनं दुहां वनी । जिगु न्ह्यपुइ चाःचाःहिली । जिगु न्ह्यपु सनी । न्ह्यपुइ भुखाय् ब्वइ । रेल मेगु न्हाय्पनं पिहां वं थें जुइगु । तर रेलया छुक छुक सः बिभ्रम जुयाः ल्यना हे च्वनी । न्हाय्पनय् थ्वइ हे च्वनी । रेलया थ्व छुक छुक सलं जिगु नुगः अशान्त जुइ …. नुगः छकः याउँक शान्ति तयाः च्वने मास्ति वइ ।

तर डाक्टर सा’ब ! जि असमर्थ ….. जितः रेलया छुक छुक सलं दुःख बी । जि बेचैन जुइ …….. ’ डाक्टरं ल्वगिया खँ न्यनी । यन्त्रं ल्वगिया न्हाय्पं स्वइ । परीक्षण याइ । माःगु दक्व फुक्कं परीक्षण याइ । अले डाक्टरं धाइ, ‘भाजु ! परीक्षणं क्यनी छितः शारीरिक रुपं छुं नं जूगु मदु । छिगु न्हाय्पं ठीक जू । थौं छितः छु जुयाच्वन, उकिया लक्षणतसें धाइ, क्यनी व शारीरिक ल्वय् वा समस्या मखु ।

उत्तरं रेल …… दक्षिणं रेल । प्रधानमन्त्रीया भाषणय् रेल ! अखबारय् रेल ! टि.भी.इ रेल । देय् छगुलिं रेलमय ! रेलया महात्म्य न्यने । धुक्क जुइ । आः रेल वल कि फुक्क समस्या ज्यनी । सुथां लाइ ….. दँदँतक हितिं लः मवःगु ….. आः रेल वलकि हितिं लः नं वइ ….. बजाः भाः अनियन्त्रित धंगं थहां वनी ।

व छिके खने दुगु मानसिक समस्याया सूचक खः । रेलया छुक छुक ……. सःया बिभ्रमं छितः छाय् लिनाच्वन ….. छाय् दुःख बियाच्वन …… थुकिया कारण छु ? व मनोविश्लेषणया खँ जुइ ….. । उकिं भाजु ! कृपया छिं छक्वः मनोचिकित्सक क्यनादिसँ । वयागु सल्लाह कयादिसँ । इलय् हे छिं मनोचिकित्सकया सल्लाह कया मदिल धाःसा थ्व ल्वय् तच्वया वनेफु …… रेलया छुक छुक या थ्व काल्पनिक तरंगं छिके असामान्य विश्राप्ति हयेफु ।’

डाक्टरया ख्याच्वः न्यनी । ल्वगि गम्भिर जुइ । लुमंकी छाय् थःत थ्व रेलया छुक छुक सलं थिल …… छाय् दुःख बी । छाय् थ्वं चा–न्हिं तनाव थनी । छाय् न्ह्यपुइ रेल ब्वां ब्वां वनाच्वंगु अनुभभव निरन्तर जुइ ……. म्हछम्हं रेलया लिक थें ताइ । रेल म्हछम्हं ब्वां वनाच्वंगु दु । च्वं क्वय् क्वं च्वय् ….. भ्रम भान जुयाबी । जुयाच्वनी ।

रेल ……. रेल ……. रेल ……. चीनं रेल हइन ……. नेपाः न्यंकं आः रेलया सजांल लाइ । देय् समृद्ध जुइ । स्वर्ग जुइ । भारतं येँय् तक रेल थ्यंकी । आः छु मानि ? समस्या फुक्कं मदयाबी । चट् जुइ । उत्तरं रेल …… दक्षिणं रेल । प्रधानमन्त्रीया भाषणय् रेल ! अखबारय् रेल ! टि.भी.इ रेल । देय् छगुलिं रेलमय ! रेलया महात्म्य न्यने । धुक्क जुइ । आः रेल वल कि फुक्क समस्या ज्यनी ।

सुथां लाइ ….. दँदँतक हितिं लः मवःगु ….. आः रेल वलकि हितिं लः नं वइ ….. बजाः भाः अनियन्त्रित धंगं थहां वनी । सर्वसाधारण जनताया जीवन कठिन जुयाच्वन । आः रेल वइ । रेल वलकि बजाः भाः दनी …… आम जनतायात तःधंगु राहत जुइ …… रेल वइ, दक्षिणं उत्तरं …. अले वासः दनी, कापः दनी …. देय् समृद्ध जुइ । मालामाल जुइ …… रेल ….. रेल ….. रेल …… रेल वइगु खँ न्यनी ।

आम जनता उत्साहित जुइ ….. आः रेल वइ …… जनताया भाग्यय् । दननन निभाः त्वइ । रेल थौं प्रत्येक मनूतय् विश्वासया केन्द्र जुइ । जनताया जीवनय् थ्वं जादूमय लिच्वः हइ । प्रधानमन्त्री, मन्त्रीतय् थ्व आश्वासन । आम जनताया नुगलय् लूगु थ्व विश्वासं जिगु न्हाय्पनय् रेलया छुक छुक, छुक छुक जुयाः थ्वइ ….. थ्वया बी ….. ।

आः जि मनोचिकित्सकयाथाय् वने । थःगु समस्या फुक्क ब्वये । कने । ‘रेलया छुक छुकया सःया आतंकं’ थः पीडित जूगु ब्यथा कने ….. । मनोचिकित्सकं जिगु खँ न्यनी । सल्लाह बी । अझ । सतर्क याइ । ‘मिस्टर ! छि रेलया छुक ….. छुक सःया थ्व बिभम, आतंकं मुक्त जुइगु खःसा छिं थःगु जीवनशैलीइ हिउपाः हयेमाली । छिं खुलातक गुगुं नं अखबार ब्वनादीमते …. रेडियो, टेलिभिजन स्वयादीमते ।

फेसबुक चायेकादीमते । नेतातय् भाषण न्यनादीमते ……. थ्व फुक्कपाखें छि तापाक च्पनादिसँ ….. चिला दिसँ ….. बुलुहुं अले छिगु ल्वय् क्वलाना वनी । रेलया छुक ….. छुकया काल्पनिक ध्वनिं छि मुक्त जुइ …. मखुसा छिगु ल्वय् कडा जुयाः असामान्य स्थिति सृजना जुइ । छिगु न्हाय्पनय् जक मखु, आकाशय्, फसय्, खुसिइ, हिमाल, पहाड, पर्वतय् नं रेल ब्वाँय् वनाच्वंगु असामान्य बिभम कल्पनां छितः आक्रान्त याइ । रेलया दुस्वप्नं छि समृद्ध मखु, अले कंगाल जुइ ।

सम्बन्धित बुखँ

LEAVE YOUR COMMENTS