शान्ति सेनाय् मिसा सैनिकया माग अप्वः
येँ – नेपालं विश्वया थीथी देशय् शान्ति सेना कथं छ्वइपिं सैनिकत मध्ये आः मिसापिनि ल्याः अप्वयेकेमाःगु सुझाव राष्ट्र संघया शान्ति सेना मिसनं बिउगु दु।थौंकन्हय् नेपाः भ्रमणय् वयाच्वंम्ह राष्ट्र संघया उपमहासचिव जोफ पियरें शान्ति सेनाय् आः मिसापिं जवानतय् ल्याः अप्वयेकेगु लागिं नेपाःयात इनाप याःगु खः। नेपाः विश्वय् अप्वः ल्याखय् शान्ति सेना छ्वइपिं देय्तय् धलखय् खुगूगु स्थाय् लाः।
थौंकन्हय् अशान्त जुयाच्वंगु विश्वया आपालं देशय् द्वन्द्वया कारणं दकलय् अप्वः मिसा व मस्त पीडित जुयाच्वंगु कारणं उमित उद्धार यायेगु लागिं मिसापिं सैनिक जवानतय् माग अप्वयाच्वंगु खँ नं राष्ट्र संघं धाःगु दु।तर राष्ट्र संघं इनाप याःसां मिसापिं शान्ति सैनिक छ्वयेगु क्षमता धाःसा थौंकन्हय् नेपाःया सैनिक, प्रहरी व सशस्त्र प्रहरीयाके मदुगु खँ धाःगु दु।
नेपाःया स्वंगुलिं सुरक्षा निकायय् मिसापिनि ल्याः १० प्रतिशत स्वयां अप्वः मदु। नेपाली सेनाय् ला थ्व ल्याः झन् हे कम जक दु। दुपिं मिसापिं सैनिकत नं युद्धया ज्याय् स्वयां मेमेगु प्राविधिक ज्याय् अप्वः खटे जुयाच्वंगु दु।
उकिसनं नेपाली सेनाय् दुहां वइपिं मिसापिं सैनिकत उमिगु क्षमता व दक्षता स्वयां नं कोटाया आधारय् दुकया तःगु जुयाः शान्ति सेनाय् वनेगु लागिं दयेमाःगु गुण उमिके मदइगु खँ धाःगु दु।
सूत्रया कथं मिसापिनि ल्याः अप्वयेके हे माःगु बाध्यकारी नियम वल धाःसा राष्ट्र संघं नेपाःया कोटा क्वपालाः मेगु देशपाखें जूसां मिसापिं सैनिकत अप्वः यंके फइगु सम्भावना दु।
LEAVE YOUR COMMENTS