क्षेत्रीय ज्याकयात प्रादेशिक ज्याकुथिइ हिलीगु

येँ – देय् संघीय संरचनाय् वने धुंकाः सरकारी ज्याकू धमाधम खारेज यायेगु प्रक्रिया न्ह्यानाच्वंगु इलय् आः क्षेत्रीय ज्याकू नं खारेज याइगु जूगु दु। क्षेत्रीय ज्याकू खारेजया लिसें अज्याःगु ज्याकूयात प्रादेशिकस्तरया ज्याकूया रुपय् थापना याइगु जूगु दु।

संघीय मामिला तथा सामान्य प्रशासन मन्त्रालयं प्रदेशय् दइगु ज्याकूया सर्वेक्षण यानाः आः क्षेत्रीयस्तरय् दयाच्वंगु ज्याकूयात प्रादेशिक ज्याकूया रुपय् रुपान्तरण यायेगु तयारी यानाच्वंगु दु।

क्षेत्रीय रुपय् दुगु ज्याकूयात प्रादेशिक ज्याकूया रुपय् रुपान्तरण यायेवं जनशक्ति नं अप्वः मात्राय् आवश्यक जुइगु जूगु दु। क्षेत्रीय ज्याकूयात प्रादेशिक निर्देशनालयय् रुपान्तरण यायेधुंकाः करिब निद्वःया ल्याखय् कर्मचारी आवश्यक जुइगु खने दइगु मन्त्रालयया प्रवक्ता सुरेश अधिकारीं खनादिल।देय् संघीय संरचनाय् वनेधुंकाः नं क्षेत्रीय व प्रदेश ज्याकूया सर्वेक्षण मजूगुलिं पुलांगु हे स्वरुपय् ज्या यानाच्वंगु दु।