मेलम्चीया म्याद हाकनं थप
स्वनिगःवासीया छेँय्छेँय् च्वंगु हितिं मेलम्चीया लः गबले हाइगु छुं ठेगान मदुनि। अय्नं स्वनिगःवासीतय् मेलम्चीया लः त्वनेगु म्हगस धाःसा ल्यना हे च्वंगु दु। स्वनिगःया लःया समस्या समाधान यायेगु छगू प्रमुख विकल्पया रुपय् दयाच्वंगु मेलम्ची लः वइगु आशा आः नं आपालं स्वनिगःवासीतय्सं यानाच्वंगु दु। थगुने मोहनि न्ह्यः हे स्वनिगःवासीं मेलम्चीया लः त्वने दइ धाःसा पूवने मफुत।
सरकारं मोहनि न्ह्यः हे स्वनिगःवासीयात मेलम्चीय लः त्वंकेगु आश्वासन बिया वयाच्वंगु जक मखसे व हे ल्याखं द्रुत गतिं ज्या न्ह्यानाच्वंगु नं धया वयाच्वंगु खः।तर मोहनि न्ह्यः स्वनिगःवासीया हितिं मेलम्चीया लः हायेमफुत। अनं लिपा स्वन्ति धुनेवं लः हाइगु धाःगु खःसा व नं मजुल। वयां लिपा थीथी मिति बियाः आश्वासन बीगु ज्या जुजुं लिपांगु इलय् आः वइगु मोहनि न्ह्यः स्वनिगःवासीं मेलम्चीया लः त्वने खनी धया वयाच्वंगु दु।
व नं पूवनीगु खः वा मखु छुं ठेगान मदुनि।खतुं मेलम्चीय लः छेँय्छेँय् थ्यंकेगु निंतिं पाइप लायेगु ज्या द्रुत गतिं हे जुयाच्वंगु दु। उकिया निंतिं आवश्यक पूर्वाधार तयार यायेगु नापं मेलम्चीय लः सुन्दरीजल लः प्रशोधन केन्द्रय् क्वफायेगु व लः प्रशोधन यायेगु केन्द्र तकं तयारी अवस्थाय् दुगु सरोकारवाला निकायतय्सं धायेगु यानाच्वंगु दु। अथे खःसां स्वनिगःवासीतय् शंकाः दु कि वइगु असोजं नं मेलम्चीया लः त्वने खनीगु खः वा मखु।
थ्व शंका छगू ल्याखं उचित नं जू। छाय्कि मेलम्ची आयोजनाया ठेकेदारया म्याद हाकन स्वलाया निंतिं थप जूगु दु। वइगु असोज महिनातकया दुने मेलम्ची खानेपानी आयोजनाया लः सुन्दरीजलय् उपलब्ध याकेगु शर्तसहित सरकारं आयोजनाया ठेकेदार कम्पनी इटालीया निर्माण व्यवसायी कम्पनी सीएमसी दि रेभेनाया म्याद स्वलाया निंतिं थप याःगु दु।
खानेपानी तथा सरसफाइ मन्त्रालय मातहतया मेलम्ची खानेपानी आयोजना विकास समिति व निर्माण व्यवसायी कम्पनीया उच्च अधिकारीतय् दथुइ जूगु सहलह लिपा कम्पनीया म्याद स्वलाया निंतिं थप याःगु खः। मेलम्ची खानेपानी आयोजना विकास समितिया कार्यकारी निर्देशक सूर्यप्रसाद कँडेलयाकथं वइगु मोहनि न्ह्यः हे मेलम्चीया लः सुन्दरीजलय् पथान्तरण (लः प्वंकेगु) यायेगु शर्तलिसें निर्माण व्यवसायीनापं सहमति जूगु खः।
निर्माण व्यवसायी कम्पनीया रुपय् इटालियन कम्पनी सीएमसीं क्वःछिनातःकथं ज्या मयायेवं खानेपानी मन्त्रालयं परराष्ट्र मन्त्रालयलिसेया समन्वयय् इटालीइ दुगु उच्च व्यवस्थापनयात पत्राचार याःगु खः।थगुने जेठ १८ गते बाःछिया म्याद तयाः मन्त्रालयं आयोजनाया ज्याय् छाय् ढिलासुस्ती जुयाच्वंगु खः? धकाः उकिया लिसः बीत धाःगु खः। मन्त्रालयया पौ लगतै हे सीएमसीया केन्द्रीय ज्याकू इटाली निर्माण व्यवसायीतय् छगू उच्च प्रतिनिधिमण्डल नेपाः वःगु खः।
तःक्वः तःक्वः ज्या याये धकाः प्रतिवद्धता प्वंकूसां छुं नं जिम्मेवारी पूरा मयायेवं सरकारं ठेक्का सम्झौता हे रद्द यायेगु तकया ख्याच्वः बिउगु खः।‘लगातारया सहलह लिपा निर्माण व्यवसायी वइगु असोज मसान्ततकया दुने सुन्दरीजलय् लः क्वफायेगु खँय् सहमत जूगु दु’, कार्यकारी निर्देशक कँडेलं धाःगु दु। वंगु चैत २७ गते हे आयोजनाया कुल २७ किलोमिटर ताःहाकःगु सुरुङमार्गया ‘ब्रेक थ्रु’ जूगु खः।
सुरुङमार्गया ब्रेक थ्रु जुइवं निर्माण व्यवसायीं ज्या यायेत आलटाल याना वयाच्वंगु खः। निर्माण व्यवसायीं गोरखा केन्द्र विन्दु जुया वःगु तःभुखाय् व भारतं याःगु अघोषित नाकाबन्दीलिपा नं थःपिंसं ज्या यायेमालाच्वंगु व बाँधस्थल दुगु सिन्धुपाल्चोकया अम्बाथानय् क्वःछिनातःगु स्वयां अप्वः ज्या यानागु धासें थप १ अर्ब ६५ करोड तका दां माग याना वयाच्वंगु खः।
निर्माण व्यवसायीया मागमध्ये परामर्शदाता स्फ्टेशाया सिफारिसय् २८ करोड दां बीधुंकूगु दु। अथे खःसां निर्माण व्यवसायी कम्पनीं थप ध्यबा माःगु माग यासें सुरुङ मर्मतया ज्या मयासे च्वनाच्वंगु खः। निर्माण व्यवसायीयात आतकया दुने ७ अर्ब ८० करोड तका भुक्तानी बी धुंकूगु दु। निर्माण व्यवसायीया दावीयात कयाः विवाद ब्वलनेवं उकियात ज्यंकेया निंतिं समितिया बैठकय् तकं सहलह जूगु खः।
तर उकिया निर्णय सार्वजनिक धाःसा जूगु मदुनि।‘सुरुङ निर्माण ब्रेक थ्रु जुइधुंकाः उकिया मर्मत यायेगु ज्या हे जुइ फयाच्वंगु मदु, करिब करिब तसकं नगण्य मात्राय् जक ज्या जूगु दुसा लिपांगु सहमतिलिपा आयोजनाया ज्या न्ह्याः वनी धइगु आशा ब्वलना वःगु दु’, कँडेलं कनादिल। पूर्व सहमतिकथं निर्माण व्यवसायीं थ्व हे साउन मसान्त तकया दुने सुन्दरीजलय् लः क्वफायेमाःगु खः।
तर ताःई तक नं ज्या मजुसे अथें लानाच्वंगुलिं उगु म्याद सिधयाः आः असोज मसान्त थ्यंगु दु।वंगु असार ८ गते आयोजना विकास समिति व निर्माण व्यवसायी दथुइ जूगु सहलह लिपा निर्माण कार्ययात तीव्रता बीगु खँय् सहमति जूगु समितिया कार्यकारी निर्देशक कँडेलं जानकारी बियादीगु दु।
LEAVE YOUR COMMENTS