विश्वकप २०१८

धुकुती दनि १ हजार अर्ब विदेशी मुद्रा

येँ – विदेशं दुहां वइगु रेमिटेन्स धमाधम घटे जुया वंगु व ब्यापार घाटा धाःसा धमाधम अप्वया वनाच्वंगु कारणं देय्या अर्थतन्त्रय् बांमलाःगु संकेत वल धकाः मनूतय्सं चिउताः प्वंका हःसां राष्ट्र बैंकं धाःसा देय्या राष्ट्रिय धुकुती अझ हे प्रशस्त विदेशी मुद्रा मुनाच्वंगु कारणं ग्याये माःगु आवश्यकता मदु धाःगु दु ।राष्ट्र बैंक सूत्रं धाः कथं नेपाःया राष्ट्रिय धुकुती थौंकन्हय् १ हजार ८५ अर्ब तका बराबरया विदेशी मुद्रा मुनाच्वंगु दु ।

पिनें दुहां वइगु विदेशी मुद्रा कम खःसां पिहां वनीगु क्रम नं म्हो जूगु कारणं धुकुती यक्व मात्राय् दां मुनाच्वंगु खः ।आः मुनाच्वंगु दां धइगु ११ महिना तक सामान न्यायेत गाःगु दावी नं राष्ट्र बैंकं याःगु दु । कम जुया वनाच्वंगु रेमिटेन्स व अप्वया वनाच्वंगु ब्यापार घाटां यानाः शाधनान्तर घाटा अप्वया वःगु कारणं देय्या मौद्रिक नीति हे संशोधन याये मालीगु अवस्था दु धइगु सुझाव समेत वयाच्वंगु दु ।

यदि विदेशी मुद्रा दुहां वयेगु क्रम थथे हे जुयाच्वन धाःसा अर्थतन्त्रय् तःधंगु हे लिच्वः लाये फइगु खँ समेत धयाच्वंगु दु ।थज्याःगु चिउताःया दथुइ राष्ट्र बैंकं राष्ट्रिय धुकू बल्लाःगु कारणं तुरुन्त हे ग्याये माःगु आवश्यकता मदु व मौद्रिक नीति नं हिले माःगु जरुरी मदु धइगु खँ पित हःगु खः ।वंगु छुं ई न्ह्यवंनिसें रेमिटेन्स दुहां वयेगु क्रम कम जूगुलिं देय्या अर्थतन्त्रय् समेत लिच्वः लाइगु खँ चचाय् वयाच्वंगु खः ।

सम्बन्धित बुखँ

LEAVE YOUR COMMENTS