थुगुसी बुंगद्यः गुकुन्हु सालेगु ?

यल – बुंगद्यः सालेगु निंतिं थुगुसी दुतिया तिथि तुत् जूगुलिं द्यः गबलय् सालेगु धइगु विवाद पिहां वःगु दु । अथे खःसां थ्व विवाद ज्यनेधुंकूगु खँ पञ्चांग निर्णायक समितिया दुजः लिसेंं ज्योतिष कीर्तिमदन जोशीं स्पष्ट यानादीगु दु । वय्कलं म्हिगः ‘नेपालभाषा टाइम्स’ लिसे खँ ल्हासें नेवाःतय् नखःचखः वा जात्रापर्व फुक्कं चन्द्रमास कथं न्यायेका वयाच्वंगुलिं आः जुइगु जात्रा नं तिथि कथं चतुर्थि कुन्हु हे जुइगु खँ कनादिल । वय्कलं थज्याःगु विवाद पिकयाः पञ्चांग निर्णायक समितिया छुं मनूतय्सं नेवाःतय्त ग्वाकाः नेवाःतय्त ल्वाकेगु ज्या यानाच्वंगु द्वपं नं बियादीगु दु ।

थ्व स्वयां न्ह्यः नं २०२९, ०४८, ०५० व ०६७ सालय् नं थुकथं हे तिथि तुत जूगु खःसां नं चतुर्थि कुन्हु हे जात्रा न्यायेका वयाच्वनागु जानकारी नं वयकलं बियादिल । लिसें वय्कलं दिं कथं बुंगद्यःया भोटो क्यनेगु व प्यन्हु बिचाः वनेगु ज्या जक जुइगु खँ नं कनादिल ।
थुगुसी बुंगद्यःयात रथय् तयाः स्वन्हु लिपा सालीगु धाःसां दथुया छन्हु तिथि तुत् जूगुलिं गुलिस्यां स्वन्हु दुकुन्हु लाकाः पंचमि कुन्हु द्यः सालेमाः नं धयाच्वंगुलिं थ्व विवाद पिहां वःगु खः ।