धर्म धइगु छु खः ?

रत्न श्रेष्ठ ‘नागरिक’

धर्म छु? छि सु? जि सु? न्हापालाक थम्हं थःयात निं म्हसीके माल । थम्हं थःयात म्हसीकेया तात्पर्य छु धाःसा छि सु ? मिसाम्ह ला कि मिजंम्ह ? छाय् धाःसा थौंकन्हय् लिंग हिलाबुला यानाच्वंपिं नं दु । उकिं छि सु म्हसिल मखु ला ? अले छि सुया सन्तान ? याने छिकपिनि मां बौ सु थें ? मांनं क्यना तःम्ह बौ अले बौनं क्यनातःम्ह मां छिम्ह मां बौ पक्का खः धइगु विश्वास दयेमाल ।

छाय्धाःसा गुलिस्यां बौ यक्व दयाच्वने यः । (महाभारतया बाखंया पाण्डव थें) गुलिस्यां नक्कली मां वा बीमातात नं जुइफु । अथे खःसां नं छि जि सकलें जन्मय् जुयागु ला मांपाखें खः । व मां, मां खः झीगु लागिं । धर्म ला वय्कलं नाला कया वयाच्वंगु छगू संस्कार जक खः ।
सुं नं मचाया धर्म दइ मखु । व मचाया प्रकृति खः गुला तक प्वाथय् च्वनाः मांया प्वाथं पिहां वयेगु ।

व जन्म जुइगु प्राकृतिक नियम खः । तर व मचा बुइसातकि हिन्दू, बौद्ध, जैन, सिख, इसाई छुं नं मखु । सिर्फ व छम्ह मचा जक खः । छु नं जुइ लिपा हे तिनि जुइ । व छु संस्कारय् गज्याःगु आचरण कयाः हुर्के जुइ अले वयात अज्याःगु धर्मावलम्बी धकाः धया वयाच्वन, आः झीगु थ्व समाजं । अझ धात्थें धायेगु खःसा द्वलंद्वःदँ न्ह्यः थन आः थें थीथी कथंया धर्मत हे मदु ।

आः वयाः धर्म हे ल्वापुया पुसा जुया बिल । धर्म धइगु ला छिगु जिगु दैनिक आचारण खः । ला नइपिं, ला मनइपिं, थःथः कथं जपतप याइपिं । थीथी थासय् वनाः प्रार्थना याइपिं । ई ब्यः कथं पूजा आजा याइपिं । छता ला धर्म धइगु थः थःगु स्वतन्त्रताया दसि नं खः । तर धर्मया नामय् थ्व विश्वय् वंगु २५०० दँ दुने ३००० क्वः धार्मिक ल्वापु याये धुंकल ।

सुं नं मचाया धर्म दइ मखु । व मचाया प्रकृति खः गुला तक प्वाथय् च्वनाः मांया प्वाथं पिहां वयेगु । व जन्म जुइगु प्राकृतिक नियम खः । तर व मचा बुइसातकि हिन्दू, बौद्ध, जैन, सिख, इसाई छुं नं मखु । सिर्फ व छम्ह मचा जक खः ।

आः छिं धयादिसँ धर्म छु ? धर्मं धर्म त्वःतल धाःसा ल्वापु सिवाय् छुं मंत थन । धनया लागिं स्वयां अप्वः धर्मया लागिं ल्वापु जुइ धुंकल । लःया पलेसा मनूया हियागु खुसिबाः वयेधुंकल । उकिं मनूतय्सं धर्म छु धकाः मथू थें च्वं । झीसं बुइसातकि ज्वना वयागुया छुं हे धर्म मखु । तर लिपा तिनि सयेका सीकागु खः । तर न्ह्यागु धर्म नं न्ह्याक्व हे कट्टर खःसां व धर्मय् मेगु धर्मयात क्वत्यलाः स्यंकेमाः, झीगु धर्म जक धर्म खः, मेपिनिगु धर्म ला बेधर्म खः अथे धकाः गनं नं धयातःगु मदु ।

तर यक्व धर्मय् छता ज्वःलाःगु खँग्वः दु । मनुखं मनूयात प्रेम या । याने मनुखं मनूयात मतिना यायेगु हे छगू तःधंगु धर्म खने दुसा हानं धर्मया नामय् मनुखं मनूयात मतिना यायेगु पलेसा स्यायेगु ज्या यानाच्वन धायेबलय् झीगु धर्म छु जुल ? अहम्पन थः कतः चीकीगु हे धर्म खःला ? मनूया विनाश हे धर्म खःला ?

धात्थें धायेगु खःसा धर्म मभिंगु मखु । छिगु जिगु मन मभिना वनाच्वंगु जक खः । मनुखं मनूयात म्हसीके मफयाच्वंगु जक खः । छिं छितः म्हसीकादिसँ । छि सु ? अले छिगु धर्म छु म्हसीका दिसँ । छिगु धर्मय् छु दु ध्वाथुइका दिसँ । छिं थू कथं छिगु धर्मया बारे नाइसेच्वंगु भासं प्रचार यानादिसँ । गुगुं नं बांलाःगु खँ सकस्यां ध्वा थुइकाः सयेका काये फयेमा । सकसियां कल्याण जुइमा ।

मनू जीवन सुखमय आनन्दमय जुइ फयेमा । अथे हे छिं नं मेमेगु यक्व धर्मपाखें नं सयेकाः कयादिसँ । व हे का धर्मया मर्म । न्ह्यागु धर्म माने याइपिंत नं थः थें हे धर्मात्मा नुगः दुपिं धकाः विश्वास यानादिसँ । छिं सुयातं नं थः स्वयां क्वय् च्वंगु धर्म माने याइम्ह धकाः बिचाः याना दीमते । बांलाःगु कर्म यानादिसँ । व हे का धर्म ।

 

सम्बन्धित बुखँ

LEAVE YOUR COMMENTS