कन्हय् निसें गुक्वःगु राष्ट्रिय ज्ञानमाला सम्मेलन

येँ(नेपालभाषा टाइम्स)÷ गुक्वःगु राष्ट्रिय ज्ञानमाला सम्मेलन थ्व हे वइगु पुस २७ गतेनिसें स्वन्हुयंकं जुइगु जूगु दु । नेपाल राष्ट्रिय ज्ञानमाला समितिया ग्वसालय् थनया चाबहिलिइ च्वंगु चारुमति बुद्ध विहारय् उगु सम्मेलन जुइ ।
पुस २७ निसें २९ गते स्वन्हुयंकं जुइगु सम्मेलनय् देय्न्यंकंया नीगू जिल्लाया न्यागू दर्जन स्वयां अप्वः ज्ञानमाला भजन समूहया सहभागिता दइगु ग्वसाः खलकं जानकारी बिउगु दु । प्रत्येक स्वदँय् छकः जुइगु राष्ट्रिय ज्ञानमाला सम्मेलनय् स्थानीय बौद्ध संघसंस्थाया प्रतिनिधिलिसें सम्मेलनय् ब्वति कायेत वइगु ज्ञानमाला भजन समूह प्रतिनिधिया सहभागिताय् पदयात्रा, बुद्धगाथा, बुद्धपुजा, अन्तक्र्रिया, गोष्ठि लगायत थीथी ज्याझ्वःलिसें सहलह जुइ ।
ज्याझ्वःया सहलहपाखें प्राप्त निष्कर्षयात वइगु दिनय् ज्ञानमालायात न्ह्याकेया निंतिं भावी रणनीतिया रुपय् न्ह्यःने यंकेगु समितिया संरक्षकलिसें बौद्ध विद्वान प्रा. सुवर्ण शाक्यं कनादिल ।
थेरवादी बौद्ध धर्मावलम्बितय्सं थीथी बौद्धस्तोत्रयात सांगीतक वातावरणय् भजन हाला बुद्ध व बोधिसत्वयात लुमंकेगुयात हे ज्ञानमाला भजनकथं म्हसीका वयाच्वंगु दु ।
वि.सं. १९९४ य् स्वयम्भू महाचैत्यय् भिक्षु, भिक्षुणी, उपासकउपासिकापिंसं बुद्ध वचनया थीथी आयामयात दुथ्याकाः बुद्ध शिक्षा बीगु व प्रचार प्रसार यायेगु उद्देश्यं भजनमय संगीतया शुरुवात याःगु धापू दु ।

सम्बन्धित बुखँ

LEAVE YOUR COMMENTS