क्यान्सरया वासः २ हजार प्रतिशत तक थिके

येँ– नेपालय् क्यान्सर उपचारया निंतिं माःगु वासः २००० प्रतिशत तक अप्वः कयाः मिया वयाच्वंगु दु । स्वास्थ्य मन्त्रालयं याःगु छगू अनुगमनय् थुकथं थिकेक वासः मियाच्वंगु लूगु खः । स्वास्थ्य मन्त्रालयया प्रवक्ता डा. श्रीकृष्ण गिरी बिबिसीलिसे खँ ल्हासें धयादीगु दु, ‘छुं छुं क्यान्सरया वासःया भाः लागतया तुलनाय् २ हजार प्रतिशत तक अप्वः कयाच्वंगु लूगु दु । थुकिया हे कारणं विरामीया उपचारय् यक्व खर्च तुइगु जुयाच्वंगु दु ।’

मन्त्रालयं दयेकूगु छगू अध्ययन समितिया कथं क्यान्सरया परीक्षण व पहिचान, शल्यक्रिया, किमोथेरापी वा रेडियोथेरापी यायेत व वासः फुक्कं यानाः छगू लाख तकां क्यान्सरया उपचार यायेफइ । तर वासः भाः हे अनियन्त्रित दुगुलिं उपचार खर्च तसकं अप्वयेगु यानाच्वगु दु ।

मेखे वसः उत्पादक तथा विक्रेतातय्सं धाःसा मन्त्रालयया द्वपं अस्वीकार यानाच्वंगु दु । क्यान्सर थेंज्याःगु ल्वय्या उपचारया निंतिं दयेकीगु वासःया कच्चा पदार्थया भाः लिसे उत्पादन व परीक्षण मू स्वानामतःगुलिं लागत स्वयां भचा अप्वः खनेदुगु खँ एसियन फर्मास्युटिकल्सया बजार व्यवस्थापक दिपेश प्रधानं धयादीगु दु ।

वय्कलं मन्त्रालयया प्रतिवेदन छुं तथ्यंसंगत मजूगु धासें धयादीगु दु, ‘गुगु वासः नेपालय् उत्पादन जुइगु खः, व वासलय् ला झन २ हजार प्रतिशत अप्वः कयाः मीगु सम्भव हे मदु । तर विदेशं आयात जुइगु वासः गुलि तूगु खः, गुलिं मीगु खः धयागु धाःसा धायेफइमखु ।’

सरकारी अस्पताल बाहेक निजी अस्पतालय् क्यान्सर ल्वय्या उपचारय् सालाखाला स्वंगू निसें न्यागू लाख तक खर्च जुयाच्वगु दु । वासःया लिसें उपचारया झ्वलय् जुगु थीथी परीक्षणय् नं लाक्वपाक्व ध्यबा काइगुलिं अप्वः खर्च तुइगु मन्त्रालयया धापू दु ।

शल्यक्रियाया तुलनाय् किमोथेरापी व रेडियोथेरापीइ खर्चया यक्व ध्यबा फुइगु जूगुलिं नं उपचार थिके जुइगु खँ नेपाल क्यान्सर हस्पिटल तथा रिसर्च सेन्टरया प्रमुख व क्यान्सर विशेषज्ञ डा. सुदीप श्रेष्ठं धयादीगु दु ।

वय्कलं नं क्यान्सरया उपचार खर्च धाने यायेत तसकं थाकुगु स्वीकार यानाः धयादी, ‘जिगु अनुभवया आधारय् सम्पूर्ण क्यान्सरया उपचार खर्च सर्वसाधारणया निंतिं तसकं थिके । सछिम्ह मध्ये झिम्ह नीम्हेसिनं नं उपचार खर्च धाने यायेत थाकुयाच्वंगु दु ।’

सम्बन्धित बुखँ

LEAVE YOUR COMMENTS