ने. सं. ११४४ चौलाथ्व दशमी -

थोक व्यापारीया ‘हडतालं’ बजारय् सामान अभाव

येँ– वाणिज्य तथा आपूर्ति मन्त्रालयं अनुगमनया झ्वलय् थोक ब्यापारीयात नं कारबाही यायेवं बजारय् उपभोग्य ज्वलंया अभाव जूगु दु । थुकिं यानाः बजारय् जाकि, केँ लिसें थीथी ज्वलंया अभाव जूगु खँ खुद्रा व्यापारी हरिकृष्ण महर्जनं ‘नेपालभाषा टाइम्स’ यात कनादिल । वय्कःया कथं कालिमाटीया आपालं थोक व्यापारीतय्सं सामान मीगु बन्द यानाः आन्दोलन यानाच्वंगुलिं बजारय् सामानया अभाव जूगु खः ।

सरकारं बजारय् अखाद्य उपभोग्य सामाग्री मियाच्वंगु धासें अनुगमन यायेगु जक मखुसें व्यापारीयात ज्वनेगु ज्या यायेवं थोक बिक्रेतातय्सं अघोषित रुपं आन्दोलन याःगु खँ धाःगु दु । कालिमाटीया छम्ह पसःथुवाःयात ज्वना यंकूगुबलय् वया काय त्वःतकेत वंबलय् कायम्हेसित तकं ज्वंगु जानकारी महर्जनं बियादीगु दु ।

नेपाल खुद्रा व्यापार महासंघया अध्यक्ष पवित्र वज्राचार्यं सरकारं बजाः अनुगमनया नामय् व्यापारीतय्त दुःख बीगु ज्या यानाच्वंगु द्वपं बियादीगु दु । होलसेल पसलय् मूल्य सूची मतःगु व म्याद फूगु सामान तयातल धकाः ज्वनाः कुनेगु उचित मजूगु खँ वय्कलं धयादीगु दु । वय्कलं धयादिल, ‘छगू निगू पसलय् म्याद फुइधुंकूगु सामान वांछ्वयेत तया तयेफु, अज्याःगु छगू निगू म्याद फुगु सामान तयातःगु द्वपनय् व्यापारीयात ज्वनाः कुनेगु ज्या उचित खः हे मखु ।’

प्रहरीं थःगु अधिकार दुरुपयोग याःगु द्वपं बिसें वय्कलं व्यापारीयात ज्वनेगु जक मखु, म्याद थप यानाः कुनेगु ज्या तसकं गलत जूगु खँ धयादीगु दु । वय्कलं धयादी, ‘द्वःछि दां जरिवाना याःसा गाःम्ह व्यापारीयात न्यवः न्ह्याकाः ज्वना यंकेगु धइगु प्रहरी प्रशासनया ज्यादती खः, थुकिं यानाः व्यापारी ग्यानाः हे पसः मचायेकूगु खः ।’

वंगु शुक्रवाः तक १९ म्ह खुद्रा व्यापारीयात ज्वनेधुंकूगुलिं व्यापारीत थःत नं गुगुं नं इलय् ज्वनेफु धकाः ग्यानाः पसः बन्द याःगु खँ नं वय्कलं कनादीगु दु । वय्कलं थम्हं सिडिओ व प्रहरी प्रशासनयात थुकिया बारे जानकारी याकागु खःसां नं छम्हं मेम्हेसित चीकेगु ज्या यानाच्वंगु द्वपं नं बियादीगु दु । थुकथं थोक बजाः बन्द जुल धाःसा याकनं हे उकिया लिच्वः खुद्रा व्यापारय् लाइगु जानकारी बिसें बजारय् उपभोग्य वस्तुया अभाव जुइगु खँ नं वय्कलं कनादीगु दु ।