किपुलिइ पर्यटन प्रवद्र्धन यायेगु बारे अन्तरक्रिया

किपू – किपुलिइ ततःधंगु उद्योग व कलकारखामना स्थापना मजूसां पर्यटन उद्योगया तःधंगु सम्भावना दुगु किपू नगरपालिकाया मेयर रमेश महर्जनं धयादीगु दु । वय्कलं किपुलिइ च्वंगु ऐतिहासिक सम्पदा, मूर्त व अमूर्त संस्कृतिया प्रवद्र्धन, संरक्षण नापं पर्यटकीय पूर्वाधारया निर्माणपाखें आन्तरिक व बाह्य पर्यटन प्रवद्र्धन याये फइगु आपालं सम्भावना दु धयादिल ।

नेवाः पत्रकार राष्ट्रिय दबूया ग्वसालय् ‘किपूया संस्कृति, सम्पदा व पर्यटन प्रवद्र्धनय् संचारमाध्यमया भूमिका’ विषयय् जूगु अन्तरक्रिया ज्याझ्वलय् नवासें वय्कलं उगु खँ धयादीगु खः । वय्कलं पर्यटकीय उद्योग प्रवद्र्धन यायेत संचारमाध्यमया भूमिका महत्वपूर्ण व प्रभावकारी जुइ धासें संचारमाध्यकं पर्यटकीय गन्तव्यया प्रचारप्रसार, पर्यटकीय नीति कार्यान्वयन यायेमाः धयादिल ।

किपूयात सांस्कृतिक व पर्यटकीय नगरया रुपय् विकास यायेगु लक्ष्यं नगरपालिका न्ह्याः वनाच्वंगु धासें चम्पापुरय् केबुलकार स्थापनाया निंतिं सम्भाव्यता अध्ययन जुयाच्वंगु नं जानकारी बियादिल । उगु इलय् पर्यटनविज्ञ दिलेन्द्र श्रेष्ठं नेपालय् प्राकृतिक व सांस्कृतिक पर्यटनया सम्भावना आपालं दुगु धासें आःया इलय् सन्दर्भयात मिले जुइक प्रचारप्रसार व आवश्यकता कथं परिमार्जन यानाः न्हू न्हूगु सिर्जनात्मक ज्या यायेमाःगु खँय् बः बियादिल ।

ज्याझ्वलय् दबूया सल्लाहकार नापं वरिष्ठ पत्रकार पुष्करभक्त माथेमां संचारमाध्यमं पर्यटकतय्त लक्षित यानाः उपयोगी सूचना प्रवाह याना वनेमाः धयादिल । दबूया मेम्ह सल्लाहकार नापं नेपालभाषा टाइम्स न्हिपौया सम्पादक सुरेश मानन्धरं संस्कृति, सांस्कृतिक महत्वया जात्रा, पर्व, परम्पराया विषययात संचारकःमितय्सं पर्यटकयात लक्षित यानाः समाचारयाकोणं प्रस्तुति बीमाः धयादिल ।

दबूया अध्यक्ष श्रीकृष्ण महर्जनया सभापतित्वय् जूगु ज्याझ्वःया निगूगु चरण अन्तर्गत जूगु अन्तक्र्रियाय् सहभागि पत्रकार, पर्यटन व्यवसायी, पथप्रदर्शकनापं सम्बन्धित ख्यःलिसे सरोकारदुपिंसं संस्कृति, सम्पदायात ल्यंकेगु व मौलिकता गौरवयात कायम यानातयेमाःगु खँय् बः बिउगु खः ।

उगु हे ज्याझ्वलय् सर्वोच्च शिखर सगरमाथा सफल आरोहण यानादीपिं नेवाः पत्रकार कल्पना महर्जन व पूर्णिमा श्रेष्ठयात नं हनेज्या याःगु खः ।

सम्बन्धित बुखँ

LEAVE YOUR COMMENTS