एनिमिया ः छु नयेगु छु मनयेगु ?

छु नयेगु ?

थीथी सिसाबुसा ः सिसाबुसां हियात बल्लाकेगु ज्याय् महत्वपूर्ण भूमिका म्हिती । खास यानाः खोर्पानि, केरा, किवी, स्याउ, स्ट्रबेरी थेंज्याःगु सिसाबुसा । खोर्पानिइ प्रशस्त आइरन दइगु जुयाः थुकिं एनिमिया जुइके बीमखु । केराय् दुगु भिटामिन बी ६ तुयुगु रक्तकण (ह्वाइट ब्लड सेल्स) निर्माण यायेत ज्या वः ।

केराय् आइरन नं दइ, गुकिं यानाः आइरनया खतरा कम जुयाच्वनी । किवीइ क्याल्सियम, क्रोमियम, कपर, आइरन, म्याग्नेशियम, पोटाशियम, जिंक थेंज्याःगु तत्व दु ।

पाउँगु सिसाबुसा ः सन्तरासि, अं थेंज्याःगु पाउँगु सिसाबुसा नं एनिमियायात मदयेक मगाः । व थ्व कारणं, छाय्कि थुकी भिटामिन सी प्रशस्त दइ, गुकिं तरकारिइ दुगु आइरनयात छ्यलेत लायक दयेकाबी । थुकिं यानाः आइरन म्हय् बांलाक आत्मसात जुयावनी ।

सिमि व मेमेगु ध्ये दुगु तरकारि
एन्टिअक्सिडेन्ट, प्रोटिन, आइरन, कपर, म्याग्नेशियम, जिंक व भिटामिन बी, सी नं थज्याःगु तरकारिइ दइ

वाउँगु हः दुगु तरकारि ः एनिमिया जुइबलय् वाउँगु हः दुगु (वाउँचा) तरकारी आइरन प्राप्त यायेगु बांलाःगु स्रोत खः । थुकी सलाद पत्ता, तुकं, सलगम, ब्रोकोली, बन्दा आदि दुथ्याः । थुपिं तरकारि मध्ये गुगु सीजनय् छु सइ, व वहे दुथ्याकेगु बांलाइ ।

फसि, लौका, गाजर, चाकुहि
चाकुहि एनिमिया लंकेत यक्व हे सफल जू । थुकथं हे फसिइ म्याग्नेशियम, जिंक व आइरन दइ, गुकिं हियात समृद्ध दयेकी । लौकाय् नं आइरन दु । गाजरं हि सफा याइ ।

थीथी केँ व बूबः ः थीथी केँय् नं प्रोटिन, कार्बोहाइड्रेट, भिटामिन, फाइबर, फस्फोरस, आइरन आदि दइ । रहर केँ हिया गडबडि थासय् लाकाबी । माय्केँ नं शक्ति बी । राजमा (ह्याउँसिम्पु) प्रोटिनया भण्डार खः । थुकी आइरन व भिटामिन बी –९ विशेष रुपं दइ । मुसूकेँ हियात समृद्ध याइ । चानां झीत एनिमिया थेंज्याःगु समस्यां मुक्त यायेत ग्वाहालि याइ ।

चुलि वयेकातःगु अन्न व बीबः (स्प्राउट) स्प्राउटय् सिसाबुसा व तरकारिइ स्वयां अप्वः एन्जाइम दइ । स्प्राउटं झीत उगु मूल पदार्थं स्वयां सलंसः प्रतिशत अप्वः प्रोटिन, भिटामिन, मिनरल व फाइदा याइगु चिल्लो बी, गुकिं थ्व चुलि वइगु खः । थुकिं यानाः एनिमियायात जक लंकीगु मखु, झीगु म्हया ल्वय्लिसे ल्वायेगु क्षमता नं न्याक्क हे अप्वयेकाबी ।

नःलास्वां
छ्व ह्वलाः चुलि वयेकातइगुयात हे झीसं मोहिनिबलय् नःलास्वांया रुपय् कायेगु खः । नःलास्वांयात थीथी पोषक तत्वया गोदाम धकाः नं धाइ । थुकी कार्बोहाइड्रेट, प्रोटिन, फोलिक एसिड, फाइबर, भिटामिन व मिनरल प्रशस्त दइ । थुकियात फोलिक एसिडया दकलय् तःजिगु भण्डार नालातःगु दु ।

दुरु व उकिया उत्पाद ः दुरु व दुरुं दयेकातःगु थीथी नसाज्वलनं झीत भिटामिन बी–१२ बी । भिटामिन बी१२ मगातकि नं झीत एनिमिया जुइ, अथे जुयाः दुरु व उकिया उत्पादया सेवन यायेगु नं जरुरी जुइ ।

ख्येँ, न्या व ला ः ख्येँ, न्या व लाय् भिटामिन बी–१२ ला दुगु हे जुल, उकिया लिसें थुकी आइरन नं दु । उकिं मांसाहारीतय्त एनिमिया जुल धाःसा ख्येँ, ला, न्या, नियमित नकाबीमाः ।

छु मनयेगु ?
# प्वाः झ्यातुइगु, पचे याये थाकुइगु, पुकातःगु, मल्ता व मेमेगु मसला गाक्क तयातःगु नसाज्वलं भपादीमते ।
# फास्टफूड, जंक फूड, गथेकि पिज्जा, बर्गर, टिक्की, पानीपुरी, चाउचाउ, मैदां दयेकातःगु मेमेगु पदार्थं एनिमिया जूपिंसं नयेमजिउ ।
# च्या, कफि, कोल्ड ड्रिंक्स कम जक त्वनादिसँ ।
# चिन्वःगु छुं नं चीज भपादी मते ।

च्या, कफि, अंगूर व कःनि ः छगू पदार्थ दु टेनिन । थ्व पदार्थ च्या, कफि, अय्लाः व कःनिइ दइ । थ्व पदार्थ म्हय् दुहां वनाः म्हयात आइरन, एब्जर्भ यायेगुपाखें पनाबी । अथे जुयाः हि मगाइगु ल्वय् जूपिंसं थज्याःगु पदार्थया सेवन यायेमजिउ ।

दुरु व धौलिसें कयादी मते ला, केँ व बूबः
क्याल्सियमं नं म्हय् आइरनयात आत्मसात यायेत पंगः थनाबीफु । अथे जुयाः यदि छिं आइरन गाक्क दुगु नसाज्वलं भपीगु इलय् हे क्याल्सियम गाक्क दुगु नसाज्वलं नं नल धाःसा थुकिं सम्भव दु, आइरनया दक्वं मात्रा छिगु म्हय् मथ्यनी । थ्व समस्यां बचे जुइगु उपाय थ्व खः कि क्याल्सियमया तःमिगु पदार्थ व आइरनया तःमिगु पदार्थ अलग अलग इलय् हे जक कयादिसँ ।

थुकिया मतलब थ्व जुल कि केँ, बूबः ला थेंज्याःगु पदार्थयात दुरु व दुरुया उत्पाद नापं मकायेगु । लुमंकेमाःगु खँ थ्व खः कि निगुलिं हे वर्गया पदार्थं झीत आइरन दइ । तर दुरु व थुकिया उत्पादय् क्याल्सियम नं दइ । थ्व क्याल्सियमं हे आइरनयात म्हय् दुहां वनेत पनाबी । अथे जुयाः थुपिं नितां नापं नयेमजिउ ।

अय्लाः
ताःई तक अय्लाः त्वनेगु यानाच्वन धाःसां नं हि मगाइगु स्थिति वइ । अय्लाखं म्हय् दुहां वनाः फोलेटयात एब्जर्भ यायेत पंगः थनाबीगु ला या हे याइ, आइरनया ज्यायात पनाबी । यदि छिं आइरन प्रशस्त दुगु नसाज्वलं हि समृद्ध जुइ धइगु आशा यानाः भपादिल, अले वयां तुरुन्त लिपा हे वा नये स्वयां न्हापा हे छिं रेड वाइन वा मेगु छु अय्लाः त्वनादिल धाःसा आइरन म्हय् वनीमखु । रेड वाइनय् रेसरवेटोल नांगु तत्व दइ, गुगु आइरनया लँय् पंगः जुयाः वइ, अले हि मगाकाः एनिमिया जुइकाबी ।

ग्लूटेनया एलर्जी दुसा
यदि सुं मनूयात ग्लूटेनया एलर्जी दुसा वयात ग्लूटेन यक्व दुगु पदार्थं हि मगाइगु समस्या जुइकाबी, अले हि मगाइगु स्थितिइ उकिं अझ अप्वः शरीरयात नोक्सान याइ । ग्लूटेन छ्व, तछ्व, ओट्स व थुपिं अन्नं दयेकातइगु नसाज्वलनय् दइ ।

ग्लूटेनं एलर्जी जुइगु स्थितिइ आतापुतिया अंगः क्षतिग्रस्त जुइ, गुकिं यानाः फोलेट व आइरन थेंज्याःगु पोषक तत्व बांलाक शरीरं अब्जर्भ यायेफइमखु । थुकी एनिमियाया स्थिति पिहां वइ । अथे जूगुलिं ग्लूटेनया एलर्जी जुइगु अवस्थाय् ग्लूटेन गाक्क दुगु नसाज्वलंया सेवनं नोक्सान याइ ।

मेमेगु ध्यान बीमाःगु खँ
१) न्हिं न्हिं सुथय् व सनिलय् चाःहिउ झासँ २) हलुका व्यायाम यानादिसँ । ३) घौपलखं नांगां म्ह निभालय् पानादिसँ, थुकिं भिटामिन डी चूलाइ । ४) नियमित रुपं म्हय् मालिस यानादिसँ । ५) जिवं फक्व जक ज्या यानादिसँ । ६) न्ह्यः गाक्क द्यनादिसँ । सुथय् न्हापां दनादिसँ । ७) बहनी लिबाक तक मद्यंसे च्वनादीमते । म्ह न्ययेकीगु ज्या यानादी मते । ८) मानसिक तनाव व चिन्ता लहिनादी मते ।

सम्बन्धित बुखँ

LEAVE YOUR COMMENTS