कुमारि सेवा समितिया साधारणसभा व हनेज्या

येँ- श्री श्री श्री कुमारि सेवा समितिया साधारणसभानापं हनेज्या संस्थाया अध्यक्ष दुर्गादेवी शाक्यया सभापतित्वय् जुल । येँ क्षेत्र नं. ८ (क)या प्रदेशसभा सदस्य अष्टलक्ष्मी शाक्य मूपाहांकथं झायादीगु ज्याझ्वलय् मेम्ह प्रदेशसभा सदस्य जीवन डंगोल विशेष पाहांकथं झायादीगु खः ।

साधारणसभाया उलेज्या यासें मूपाहां शाक्यं कुमारि चुकया अवस्थायात कयाः फक्व याकनं अनच्वंगु तू नकातःगु चिइका छ्वयेगुपाखे पहल यायेमाः धयादिल । वय्कलं नेपालय् प्रजातन्त्र, लोकतन्त्र, गणतन्त्रनिसें संघीयता प्राप्तिया आन्दोलनय् मिजंतय्सं थें हे मिसातय्सं नं मात्र सहकर्मिया रुपय् जक मखसे आपालं त्याग, बलिदान, योगदान बिउगु खःसां राज्यं मिसातय्त स्वयेगु दृष्टिकोणय् धाःसा हिउपाः मवःगु खँय् असन्तुष्टि प्वंकादिल ।

अथे हे विशेष पाहां डंगोलं थःपिंसं प्रदेशसभाय् वनाः आपालं ज्या यायेगु नापं संविधान व संघीयता कार्यान्वयन यायेत आपालं नीति, ऐन कानुन दयेकेगु जिम्मेवारी वयाच्वंगु धासें थ्व इलय् थःपिनिगु ध्यान विशेष यानाः प्रदेशया स्थायी राजधानी ल्ययेगु व प्रदेश नामाकरणय् केन्द्रीत जुयाच्वंगु धयादिल ।

ज्याझ्वलय् श्री कुमारि माजुया विषयय् अध्ययन अनुसन्धान याना वयाच्वनादीम्ह अनुसन्धाता काशीनाथ तमोट, श्री कुमारि माजुया विषयय् विद्यावारिधी यानादीम्ह डा. रमा पाण्डे, नेपाल सरकारया सचिवनापं येँ महानगरपालिकाया पुलांम्ह कार्यकारी प्रमुख लक्ष्मण अर्याल, येँ महानगरपालिका हनुमानध्वाखा दरवार क्षेत्र संरक्षण कार्यक्रमया पुलांम्ह प्रमुख नरेन्द्रविलास वज्राचार्य व हरिकुमार श्रेष्ठयात हनापौ लःल्हासें दोसल्लां न्ययेकाः हंगु खः ।

संस्थाया सचिव रमेशमान मुनिकारं वार्षिक प्रतिवेदन व कोषाध्यक्ष कुमारदेव मानन्धरं आर्थिक प्रतिवेदन न्ह्यब्वयादीगु ज्याझ्वलय् सम्मानित व्यक्तित्व तमोटं नं नुगःखँ प्वंकादीगु खः ।

सम्बन्धित बुखँ

LEAVE YOUR COMMENTS