अर्जेन्टिनाया सम्भावना दनि, फ्रान्स व क्रोएसिया निगूगु चरणय्

एजेन्सी÷ गोलकिपर विली काबालेरोया अक्ष्यम्य गल्ती व डिफेन्डरतय् खराब प्रदर्शनया कारणं अर्जेन्टिना वंगु चान्हय् सर्बियापाखें ३–० गोलं पराजित जुल । थ्व पराजय लिसें अर्जेन्टिनाया समूह चरण पार यायेगु लँ धाःसा तसकं कठीन जूगु दु । अर्जेन्टिनाया निगूगु चरणय् वनेगु सम्भावना हे मदुगु धाःसा मखु, तर मेपिनिगु कासाय् निर्भर जुइमाःगु अवस्था वःगु दु ।

न्हापांगु कासाय् अर्जेन्टिनायात बराबरीइ पंगु आइसल्यान्डयात नाइजेरिया व क्रोएसियां बुकल व अर्जेन्टिनां नाइजेरियायात बुकेफत धाःसा जक अर्जेन्टिना निगूगु चरणय् वनी । आइसल्यान्ड धाःसा छगू कासा त्याकाः छगू बराबरी याःसां निगूगु चरणय् वनीगु जुइ । मेखे नाइजेरियायात नं निगूगु चरणय् वनेगु निंतिं थःगु निगुलिं कासा त्याके हे माःगु अवस्था दु । आइसल्यान्डं थौं नाइजेरिया नाप म्हितेत्यंगु दु ।

वंगु चान्हय् जूगु कासाय् गोलकिपर काबालेरों थःत वःगु पासयात बांलाक क्लियर यायेमफयेवं कासाया ५३ औं मिनेटय् क्रोएसियाया एन्टे रेबिकं गोलकिपरं थ्वानाहःगु बलयात दथुइ तुं पनाः भलिपाखें न्हापांगु गोल याःगु खः । कासाया ८० औं मिनेटय् लुका मोडरिकं गोल यासें क्रोएसियाया विजय सुनिश्चित याःगु खःसा कासा क्वचायेत इन्जुरी इलय् इभान राकिटिकं थप छगू गोल याःगु खः । थ्व विजय लिसें क्रोएसिया निगूगु चरणय् दुहां वंगु दु ।

म्हिगः हे जूगु मेगु कासाय् काइलिन म्बापेया छगू गोलया ग्वाहालिं पेरुयात १–० गोलं बुकुसें फ्रान्स नं निगूगु चरणय् दुहां वंगु दु ।
म्हिगः हे जूगु मेगु कासाय् धाःसा अस्ट्रेलियां डेनमार्कयात १–१ गोलया बराबरीइ पंगु दु । कासाया ७ औं मिनेटय् क्रिस्टियन इरिक्सनं डेनमार्कयात अग्रता बिउगु खः । तर डेनमार्कया युसुफ पोउलेसनं डिबक्सय् ह्याण्डबल याःगु भिडियो एसिस्टेन्ट रेफ्री (भार) प्रविधिं क्यनेवं अस्ट्रेलियायात वःगु पेनाल्टिइ माइल जेडेनिकं गोल यासें कासा बराबरी याःगु खः ।

सम्बन्धित बुखँ

LEAVE YOUR COMMENTS