अर्जेन्टिनाया निंतिं महत्वपूर्ण कासा

विश्वकप लिग चरणया निगूगु कासा म्हितेगु झ्वलय् थौं पुचः सी अन्तर्गत डेनमार्क व अस्ट्रेलिया दथुइ व फ्रान्स व पेरु दथुइ कासा जुइत्यंगु दुसा पुचः डी अन्तर्गत अर्जेन्टिनां क्रोएसियालिसे म्हिते त्यंगु दु । पुचः ‘सी’इ फ्रान्स व डेनमार्क थःपिनिगु न्हापांगु कासा त्याकाः ३–३ अंक सहित शीर्षस्थानय् दुसा अस्ट्रेलिया व पेरु निगुलिं पराजित जूगुलिं अंक कायेमफुनि ।

थ्व ल्याखं अस्ट्रेलिया व पेरुयात मेगु चरणय् वनेगु खःसा कासा त्याके हे मःगु स्थिति दु । थौं म्हितेत्यंपिं डेनमार्क व अस्ट्रेलिया दथुइ थ्वयां न्ह्यव स्वंगू मैत्रीपूर्ण कासा जुइधुंकूगु दु । थुकी निगुलिइ डेनमार्क व छगुलिं अस्ट्रेलिया त्याःगु खः । अस्ट्रेलियाया निंतिं थौंया महत्वपूर्ण कासाय् डेनमार्कया क्रिस्टियन इरिक्सन बाधक जुयाः दं वयेफु ।

डेनमार्कं थौं अस्ट्रेलियायात त्याकेफत धाःसा याउँक नकआउट चरणय् दुहां वनीगु जुइसा अस्ट्रेलियां लिहां वनेत प्याकअप सुरु याइगु जुइ । विश्वकप इतिहास स्वयेगु खःसा अस्ट्रेलियां आःतक गुक्वःतक युरोपियन देय् लिसे म्हितूगुलिइ न्हय्क्वः ला पराजित जूगु दु । अस्ट्रेलिया थौं थ्व इतिहासयात नं अःखः यायेगु कुतलय् जुइ ।

मेखे अस्ट्रेलियायात २–१ गोलं बुकाः वःगु फ्रान्स थुगुसीया विश्वकपया दावेदार कथं न्ह्यःने वयाच्वंगु टिम खः । फ्रान्सया निंतिं थौंया मू कासामि एन्टिनो ग्रिजम्यान हे जुइ । फ्रान्स आःतक दक्षिण अमेरिकी प्रतिद्वन्द्वी लिसे विश्वकपय् न्हय्क्वःतक म्हितूगु कासाय् छक्वः नं पराजित जूगु मदुनि । थ्व ल्याखं थौं नं फ्रान्सया मनोबल तच्वः जुइ ।

तर डेनमार्कलिसेया कासाय् कडा मेहनत यानावःगु पेरुयात बुके धाःसा अःपुइ मखु । पेरुं सन् १९८२ इ जूगु मैत्रीपूर्ण कासाय् छक्वः फ्रान्सयात बुके नं धुंकूगु दु । मेखे थौं हे लिबाक्क जुइगु क्रोएसिया विरुद्धया कासा अर्जेन्टिनाया निंतिं महत्वपूर्ण जुइ । नकतिनि विश्वकपय् डेब्यु याःगु आइसल्यान्डलिसे बराबरीइ म्हितेमाःगुलिं कप्तान मेसी लिसें अर्जेन्टिनायात थौंया कासा त्याकेमाःगु दबाब दु ।

थ्वयां न्ह्यवया कासाय् नाइजेरियात २–० गोलं बुकावःगु क्रोएसिया धाःसा उच्च मनोबलसहित मैदानय् कुहां वइगु जुइ । निगूगु चरणय् वनेगु खःसा थौं अर्जेन्टिनायात क्रोएसियायात बुके हे माःगु बाध्यता दु । मेखे छगू कासा त्याकेधुंकूगु क्रोएसियायात धाःसा बराबरीइ जक म्हिते दःसां निगूगु चरणय् दुहां वनेफइगु अवस्था ल्यं दनि ।

थ्व ल्याखं क्रोएसियां खुल्ला जुयाः दबाब मकासे म्हितीगु जुइ । क्रोएसियाया मिडफिल्डर माटिओ कोभाकिकं लियोनल मेसीयात छखे तयाः स्वयेगु खःसा क्रोएसिया अर्जेन्टिना स्वयां बांलाःगु टिम जूगु खँ धाःगु दु । थौंया कासाय् अर्जेन्टिनां मेस्सीइ जक निर्भर जुइगु स्वल धाःसा क्रोएसियां थःत बांलाःगु टिम धयागु प्रमाणित यानाः क्यनेफु ।

सम्बन्धित बुखँ

LEAVE YOUR COMMENTS