तःधंगु यातायात समिति पञ्जिकरणय् मवःनि

येँ – सरकारं साउनं निसें यातायात समितिया नवीकरण यायेगु ज्या पनेगु निर्णय याःसां नं तःधंगु यातायात समितिं अझ नं कम्पनी पञ्जीकरण यायेगु ज्याय् चिउताः क्यनामच्वंगु खँ धाःगु दु । चीधंगु व्यवसायी व समितिं पञ्जीकरण यायेगु ज्या तीव्र यानाच्वंसां नं तःधंगु समिति अझ नं विभागय् पञ्जीकरण यायेत वनाच्वंगु मदु ।

वइगु साउन महिनां निसें समिति स्वतः खारेज जुइ । तर, उगु समितिइ आवद्ध गाडी आः तक नं विभागय् पञ्जीकरणया निंतिं वंगु मदुनि । पश्चिम नेपाल यातायात व्यवसायी संघ, नारायणी यातायात व्यवसायी संघ, अरनिको यातायात, पृथ्वी राजमार्ग बस व्यवसायी संघ अझ नं विभागय् पञ्जीकरण यायेत मवःगु खँ विभागं धाःगु दु ।

अरनिको यातायातं कम्पनी रजिष्ट्रर ज्याकुथि कम्पनी दर्ता याःसां नं विभागय् पञ्जीकरणया निंतिं वंगु मदुनि । विभागं थीथी रुटय् सिन्डिकेट त्वाथलेधुंकाः फुक्कं कथंया यातायात सम्बन्धी संस्थायात खारेज यायेगु निर्णय याःगु खः । यातायात व्यवसायी समितिं सरकारं याःगु निर्णय लित काइगु आसाय् विभागय् पञ्जीकरण मयासे च्वनाच्वंगु खः ।

विभागं पञ्जीकरण व कम्पनी दर्ता अनिवार्य यायेधुंकाः १९२ कम्पनीं पञ्जीकरण यायेधुंकूगु दु । तर आपाः गाडी दुपिंसं पञ्जीकरण याःगु मदुनि । विभागं पञ्जीकरण जुइधुंकूगु यातायात कम्पनीयात रुट इजाजत बीधुंकूगु दु ।