म्ह्याय्या नामं मांया समर्पण

‘लचना बौद्धिक अपांगता उत्थान समाज’

देय्या भविष्य निर्माण याइपिं धइपिं थौंकन्हय्या मचाखाचात हे खः । थः मस्त शिक्षित अले सक्षम जुइमा धइगु इच्छा सकल मांअबुपिंके दयाच्वनी । सन्तान जन्म जुइबलय् लय्मताइपिं सु दइ ? तर गबलें धाःसा सद्धेपिं मस्तय् पलेसा अपांग जूपिं बुल धाःसा मांअबुयात तःधंगु हे आघात जुइ । अथेखःसां मांअबुपिनि थः मचाप्रति मतिना धाःसा गबलें नं म्हो जुइमखु ।

खय्तला नेपालय् झन्डै निगू दशक न्ह्यवंनिसें अपांगता वर्ष शुरु जुइधुंकूगु खः । तर मेमेगुकथंया अपांगता स्वयां नं बौद्धिक अपांगता धाःसा छगू मेगु हे कथंया समस्या खः । शरीर वृद्धि जूसां मानसिक रुपं वृद्धि मजूपिंत न्हापा न्हापा सुस्त मनस्थिति धाइगु खः । अपांगता धालकि सकसियां माया वं धाःसा मांअबुपिंत मतिनाया नापं पीडा नं जुयाच्वनी । उकिसनं मिसामस्त जुल कि झन मांयात हे दुःख जुइगु स्वाभाविक हे जुल ।

अथे जुयाः यक्व अपांग मस्तय् अभिभावकपिनिगु तःधंगु कुतलं बौद्धिक अपांगपिनिगु हक अधिकारया निंतिं २०६८ सालय् बौद्धिक अपांगता अभिभावक महासंघ स्थापना जूगु खः ।न्हापां ला बौद्धिक अपांग जूपिं मस्तय्गु निंतिं छुं हे व्यवस्था मदु । अज्याःगु इलय् बौद्धिक अपांग मस्तय्त थम्हं पूmचाःगु शिक्षा, दैनिक व्यवहार, कमसेकम सुयागुं ग्वाहालि मकासे नयेत्वनेगु व साधारण व्यवहार याये फयेमा धइगु उद्देश्य तयाः मय्जु सुवर्णकेशरी चित्रकारया अध्यक्षताय् न्याम्ह मांपिं मिले जुयाः ‘सुनगाभा महिला व्यावसायिक तालिम केन्द्र’ स्थापना जूगु खः ।

थ्व हे झ्वलय् मय्जु सुवर्णकेशरीं धयादी, ‘बौद्धिक अपांगपिंसं सनेगु, म्हितेगु, न्यासि वनेगु ज्या उलि याइमखु । नसा जक नयाच्वनीगु जुयाः इमिगु शारीरिक वृद्धिया नापं ल्ह्वनीगु नं जुइफु । थज्याःपिंत मांपिंसं सुसाःकुसाः यायेगु तसकं थाकु । उकिसनं मिसापिं थी मजिउ जुइगु जुयाः ला झन हे थाकु ।’ अथे जुयाः बौद्धिक अपांगपिं मस्तय्त थीथीकथंया तालिम बीगु, व्यावहारिक खँत स्यनेगु, संगीत, नृत्य, बाजं, सिलाई, बुनाई, आधारभूत शिक्षा, चित्रकला, म्हितकेगु आदि खँत स्यनेफइ धइगु उद्देश्यं थ्व संस्था चायेकेगु ज्या जूगु खः ।

साक्कभिंक इमित यःयःगु नसात जक नका तयां बौद्धिक अपांग जूपिं मस्तय्गगु उन्नति गबलें नं जुइ फइमखु । थ्व हे सन्दर्भय् मय्जु सुवर्णकेशरीं धयादी, ‘सुनगाभा व्यावसायिक केन्द्रं मस्तय्त मस्तय्त बीगु थीथी तालिम, शिक्षां यक्व हे बांलानाच्वंगु ला अवश्य हे दु तर अभिभावक वा मांअबु मदयेधुंकाः थ्व बौद्धिक अपांग मस्तय्सं तसकं दुःख सीफु । अथे जुयाः थुमित छगू अन हे च्वनेगुकथं होस्टेलया रुपय् छगू संस्था दयेकेगु विचाः यासें न्हूगु भवन नं निर्माण यानागु खः ।’

मय्जु सुवर्णकेशरीया म्ह्याय् मय्जु लचना चित्रकार नं छम्ह बौद्धिक अपांग हे खः । अथे जुयाः वय्कलं थः म्ह्याय् लचनाया नामं हे छगू न्हूगु संस्था ‘लचना बौद्धिक अपांगता उत्थान समाज’ चायेकादीगु दु । थुकिया छोटकरी नां धाःसा ‘सुनगाभा होम्स’ खः ।वय्कलं धयादी, ‘जिमि म्ह्याय्या नामं मेपिं नं बौद्धिक अपांग जूपिं मिसा मस्तय्गु भविष्य बांलायेमा धकाः थ्व सुनगाभा होम्स शुरु यानागु खः ।’

थुकिया निंतिंवय्कलं व्यक्तिगत रुपं ९ आना जग्गा ‘लचना बौद्धिक अपांगता उत्थान समाज’या नितिं बियादीगु खः । थ्व येँया स्वयम्भूइ दु । वय्कलं न्ह्यःने धयादी, ‘थ्व जग्गा जिं बियागु खःसां भवनया क्वय् च्वंगु तल्ला लचनाया एकल बाद्यवादन ज्याझ्वःपाखें वःगु आम्दानी व हनेबहपिं व्यक्तित्व, संस्थापाखें वःगु चन्दां दयेकागु जुल । अथे हे निगूगु तल्ला धाःसा यलया झम्सिख्यःया ब्रिटिश स्कुलया ग्वाहालिं दयेकागु खः ।’

अले वय्कःया मां युरिमाया तुलाधरं थः छय् लचनायात थ्व जग्गा बियादीगु खँ नं वय्कलं कनादी ।मय्जु सुवर्णकेशरीया अथक मेहनतं थ्व ‘लचना बौद्धिक अपांगता उत्थान समाज’ स्थापना जूगु दु । थुकियात मेमेपिं थीथी व्यक्तित्वपिंसं नं ग्वाहालि यानादीगु दु । थ्व संस्थाया अध्यक्ष मय्जु चित्रकार हे जुल ।

उपाध्यक्ष मुकुन्द दाहाल (अभिभावक), सचिव रमेशकुमार महर्जन, कोषाध्यष रत्नबहादुर थापा खःसा सदस्यपिं पुष्पबहादुर चित्रकार (सुवर्णकेशरीया जहान), उर्मिला सुवाल (अभिभावक) गीता श्रेष्ठ (अभिभावक) अले ग्वाहालिमिपिं सोनी जोशी, यशाकान्ति भट्टचन, ताराकेशरी ढुंगाना, सानुकेशरी तुलाधर, मनोरमा तुलाधर, जुजुराजा तुलाधर व विजय चित्रकार खः ।

थःगु हक अधिकारया बारे छुं हे मसिउपिं बौद्धिक अपांगतय्गु निंतिं थुकथंया संस्था वा होस्टलय् च्वने दइगु तसकं भाग्यया खँ खः । थन इमित माःगु शिक्षा, तालिम, म्हितेगु, स्वास्थ्य जांच, सीप आदि फुक्कं हे व्यवस्था दइगु जुयाच्वन । थ्व सन्दर्भय् मय्जु चित्रकारं धयादी, ‘भवन निर्माण जुइधुंकल तर होस्टल संचालन याये फयाच्वंगु मदुनि ।

थुकिया लागि मस्तय्त नकेगु, ब्वंकेगु जक मखु, स्टाफ प्यम्ह न्याम्ह आवश्यक जुइ, छाय्धाःसां नसा ज्वरे यानाः नकीपिं, सुसाःकुसाः याइपिं, चौकिदार अले ज्याकू संचालनया निंतिं कर्मचारीत आवश्यक जुइ । अले इमित तलब बीगु निंतिं नं आर्थिक स्रोत माल ।’ आर्थिक स्थिति बल्लाःपिं बौद्धिक अपांगपिं धाःसा म्हो हे जुइगु जुयाच्वन । अथे जयाः सुं नं व्यक्ति, राज्य वा संस्थापाखें आर्थिक ग्वाहालि दइ ला धकाः आशा नं वय्कलं यानाच्वनादीगु दु ।

थुकिं भविष्यय् यायेगु योजनात नं यक्वं दु । वय्कःया ग्वसाः दु— छगू तल्ला थकाये फत धाःसा यक्व बांलाइगु खः । अथे मखुसा क्वय्च्वंगु तल्ला छुं नं व्यावसायिक संस्थायात बालं बी फत धाःसा उकिया आम्दानीं नं ‘सुनगाभा होम्स’ चले यायेत आर्थिक ग्वाहालि जुइ फइ अले सरकारपाखें नं रकम माग यायेगु ।अथे ला राज्यपाखें बौद्धिक अपांगपिंत न्हापा द्वःछि व आः न्हूगु संविधान लिपा म्हतिं लय् निद्वः तका बीगु धकाः घोषणा याःसां कार्यान्वयन धाःसा मजूनि ।

‘लचना बौद्धिक अपांगता उत्थान समाज’या निंतिं छगू अक्षय कोष हे खडा यायेगु नं वय्कःया ग्वसाः दु ।थः सन्तान सद्धेम्ह, अपांग व बौद्धिक अपांग न्ह्याथे जूसां इमिगु भविष्य बांलायेमा धइगु इच्छा सकसियां जुयाच्वनी । थ्व सन्दर्भय् मय्जु सुवर्णकेशरीं धयादी, ‘थ्व मचां यानाः जितः थुलिमछिं समाज सेवा यायेगु अवसर चूलात ।’ थः मचाया व अवस्थायात नं वय्कलं थुलि सकारात्मक रुपं कयादिल ।

वय्कलं राष्ट्रिय अपांग संस्थाय् नं उलि हे योगदान याना वयाच्वनादीगु दु । थ्व बाहेक वय्कः बौद्धिक अपांग अभिभावकहरूको राष्ट्रिय संघय् संस्थापक अध्यक्ष थौंकन्हय् संरक्षक, बौद्धिक अपांगता महासंघया नं संस्थापक अध्यक्ष व थौंकन्हय् सल्लाहकार खःसा राष्ट्रिय अपांग महासंघया सल्लाहकार, अपांग महिला संघया नं सल्लाहकार खः ।

उलिजक मखु वय्कः नेपाः राष्ट्रिय पार्टीया वरिष्ठ नेता व नेपालभाषा मिसा खलःया पुलांम्ह नायःलिसें आः संरक्षक नं खः ।थुकथं बौद्धिक अपांग जूम्ह थः म्ह्याय्या लागि जक मखु सकल नेपाःमिया बौद्धिक अपांग जूपिं मिसा मस्तय्गु लागि निरन्तररुपं योगदान याना वयाच्वनादीम्ह मय्जु सुवर्णकेशरी चित्रकारया थ्व पलाः सकस्यां लागिं प्रेरणादायी जुइगु खँय् शंका मदु ।

सम्बन्धित बुखँ

LEAVE YOUR COMMENTS