‘चीनया रेलं भारत ग्यायेम्वाः’

चिनियाँ सञ्चार माध्यमतय् विश्लेषण

येँ – नेपाः व चीन स्वाइगु रेलमार्गयात कयाः भारतं नं चिउताः प्वंकेगु यानाच्वंगु दु । चीनं नेपाःया केरुङ नाका तक रेल हयेगु आश्वासन बीधुंकाः भारतीय प्रधानमन्त्री नरेन्द्र मोदीं नेपाः भ्रमणया इलय् येँय् तक भारतीय रेल हयेगु आश्वासन बियाथकूगु खः । थ्वहे झ्वलय् नेपाःया प्रधानमन्त्री केपी ओली चीन भ्रमणय् वनाच्वंगु हे इलय् चिनियाँ सञ्चार माध्यमतय्सं नं नेपाः–चीन रेलमार्गयात कयाः सामग्रीत प्रकाशन याना हःगु दु ।

चिनियाँ सञ्चार माध्यमतय्सं भारतीय चिउताःयात लिसः बी कथं यदि नेपालय् चिनियाँ रेल दुहां वल धाःसा भारत ग्याये माःगु आवश्यकता मदु धइगु कोणं समाचारत प्रकाशन याःगु दु । चीन सरकारया मुखपत्र जुयाच्वंगु ‘ग्लोबल टाइम्सं’ च्वःगु दु, ‘यदि चीन व नेपाः रेलमार्गं स्वात धाःसा निगू पक्षीय व्यापार अप्वइ, हिमाली राष्ट्रय् दिल्लीया प्रभाव म्हो यायेत अवसर नं दइ ।

थ्व थुइकेत अःपुइ कि रेलमार्गं भारतय् सतर्कता अप्वयेकी, तर थुगु प्रोजेक्ट रणनीतिक रुपं भारत वा मेगु गुगुं स्वंगुगू मुलुक लिसे परिलक्षित मखु ।’
चीनं सिगात्से तक रेलमार्ग विस्तार यायेधुंकूगु दु । उगु रेलमार्गयात नेपाःया सीमालिसे स्वाःगु केरुङ तक सन् २०२० तक विस्तार यायेगु कथं ज्या यानाच्वंगु दु । यदि केरुङ–येँ रेलमार्ग दयेकेगु ज्या जुल धाःसा निगू देय् दथुइ यातायात सञ्जाल एकीकृत ढंगं न्हूगु चरणय् दुहां वनी । उगु रेलमार्गया निंतिं नेपाः सरकार नं सकारात्मक दुगु विश्लेषण नं उगु पत्रिकां याःगु दु ।

नेपाःया प्रधानमन्त्री ओलीं ‘ग्लोबल टाइम्स’लिसे खँ ल्हासें रेलमार्ग प्रोजेक्ट नेपाः व चीन सहकार्यया प्राथमिकताय् दुगु खँ कनादीगु दु । पत्रिकां चीन व नेपाःया रेलमार्गं दक्षिण एसियाया व्यापार, आवागमन व आर्थिक एकताया किपा हे हिले फइगु विश्लेषण नं यानातःगु दु । चीन व भारत दथुइ स्याण्डविच थेंज्याःगु अवस्थाय् दुगु नेपाः ताः इलंनिसें अन्तर्राष्ट्रिय व्यापार जमिनय् हे निर्भर जुयाच्वंगु छाय् धाःसां हिमाली देय्या गनं नं समुद्र थिउगु मदु ।

पत्रिकाय् चीन, नेपाः व भारतयात स्वाइगु न्हापांगु पलाःया रुपय् एकीकृत रेलमार्ग जुइ फइ धासें स्वंगुलिं देशय् कार्गो रेल स्वाये फत धाःसा पानीजहाज स्वयां याकनं व हवाइजहाज स्वयां दंक ढुवानी सम्भव जुइगु व भारतं थःगु कृषि उपज चीनय् निर्यात याये फइगु विश्लेषण नं यानातःगु दु ।
नेपाः व भारत दथुइ सडक सञ्जाल दु तर अन्तर्राष्ट्रिय व्यापारया गेट–वे मदु अथे जुयाः रेलमार्ग चीन, नेपाः व भारतयात स्वाइगु मूल आधार जुइगु विश्लेषण उकी यानातःगु दु ।

थौं सम्झौता
चीन–नेपाः रेलया डीपीआर तयार यायेगु समझदारीपत्रय् थौं हस्ताक्षर जुइगु खँ धाःगु दु । म्हिगः प्रम ओलीं चिनियाँ राष्ट्रपति सी जिनपिनलिसे खँल्हानादीगु खः ।

सम्बन्धित बुखँ

LEAVE YOUR COMMENTS