स्पेन, पोर्चुगलयात त्याके माःगु कासा

विश्वकपया न्हापांगु चरण अन्तर्गत फुक्कं समूहया छगू छगू कासा क्वचायेधुंकूगु दु । थौं समूह ‘ए’ पाखें उरुग्वे व सउदी अरबं दथुइ निगूगु कासा जुइत्यंगु दुसा समूह ‘बी’इ स्पेनं इरान लिसे व पोर्चुगलं मोरक्को लिसे म्हिते त्यंगु दु । समूह ‘ए’पाखें ग्वसाः देय् रुस व इजिप्ट दथुइ कासा जुइधुंकूगु दु । थौं धेंधेंबल्लाः यायेत्यंगु उरुग्वें न्हापांगु कासाय् इजिप्टयात बुकाः ३ अंक कयातयेधुंकूगु दुसा सउदी धाःसा थःगु न्हापांगु कासाय् रुसपाखें पराजित जूगु खः ।

उरुग्वे व सउदी दथुइ थ्वयां न्ह्यः निक्वः कासा जुइधुंकूगु दु । तर दक्षिण अमेरिकाया हे बल्लाःगु टिम उरुग्वें नं सउदीयात छक्वः नं बुकेफुगु मदुनि । सन् २००२ लय् जूगु मैत्रीपूर्ण कासाय् सउदीं उरुग्वेयात बुकूगु खःसा सन् २००४ य् जूगु कासा बराबरीइ क्वचाःगु खः । थौंया कासाय् उरुग्वे त्यात धाःसा निगूगु चरणय् दुहां वनीगु पक्का जुइ ।

मेखे समूह बीइ मोरक्कोयात बुकूगु मेगु एशियाली देय् इरान शीर्षस्थानय् दुसा थुगुसीया विश्वकप दावेदारत स्पेन व पोर्चुगल धाःसा थःपिनिगु न्हापांगु कासा बराबरीइ म्हिताः १–१ अंकय् दु । थांै स्पेन व पोर्चुगलं थः प्रतिद्वन्द्वी छसिकथं इरान व मोरक्कोयात बुकेगु हे ल्याखं म्हितेमाःगु जुइ । पोर्चुगल थौंकन्हय्या ल्याखं थः प्रतिद्वन्द्वी मोरक्को स्वयां बल्लाःगु हे खनेदु ।

तर थुपिं निगू टिम दथुइ थ्वयां न्ह्यः सन् १९८६या विश्वकपय् जूगु कासाय् धाःसा मोरक्को त्याःगु खः । तर आःतकया दुने पोर्चुगलं फुटबलय् तःधंगु हिउपाः हयेधुंकूगु दु । विश्वया हे छम्ह उत्कृष्ट कासामि जुयाच्वंम्ह रोनाल्डों थुगुसी न्हापांगु कासाय् हे ह्याट्रिक यायेधुंकूगु दु । मेखे स्पेन व इरान धाःसा न्हापांखुसी धेंधेंबल्लाः यायेत्यंगु दु । स्पेनयात निगूगु चरणय् वनेगु निंतिं आः थःगु समूहय् शीर्षस्थानय् लानाच्वंगु इरानयात बुके हे माःगु जुइ ।

निक्वःतकया युरो कप विजेता व छक्वः विश्वकप त्याकेधुंकूगु स्पेनं थःगु न्हापांगु कासाय् पोर्चुगललिसे बराबरी यायेमाःसां बांलाःगु कासा धाःसा न्ह्यब्वःगु खः । थ्व ल्याखं थौं इरानयात बुकीगु खँय् विश्वस्त जुइथाय् दु । तर न्हापांगु कासा त्याकावःगु इरान आत्मविश्वासीसाथ कुहां वइगु जूगुलिं स्पेनयात दबाब धाःसा लाइगु खनेदु ।

इरानं नं विश्वकपय् न्हापांखुसी निगूगु चरणय् दुहां वनेगु निंतिं मैदानय् कुहां वइगु जुइ । इरानयात थ्व कासाय् स्पेनयात बराबरीइ जक पनेत फत धाःसा निगूगु चरणय् दुहां वनेगु निंतिं अःपुइगु जुइ । उकिं इरान त्याके मफुसां बराबरीया निंतिं पूवंक डिफेन्सय् म्हितेफु । मोरक्को लिसेया कासाय् भाग्यं चूलाःगु आत्मघाती गोलया कारणं इरान थुगुसी विश्वकपय् न्हूगु इतिहास दयेकेगु लँय् दु ।

सम्बन्धित बुखँ

LEAVE YOUR COMMENTS