सिथिनखः व कुमार द्यःया महिमा

लक्ष्मण राजोपाध्याय

येँ – थौं सिथि नखः हनाच्वंगु दु । सिथिनखःयात थुगु दँया अन्तिम नखःया रुपय् माने याइ । लिसें देपुजा मदुपिं वा दुसां माने याये मखंपिनि नं थौं हे देपुजा याइ । थौंयां लिपा मेगु गथांमुगः तक छुं नं नखःचखः माने यायेगु वा बाजं थायेगु ज्या जुइ मखु । आः पूवंक सिनाज्या सुरु जुइगु जूगुलिं थौं तुं, बुंगाः, ल्वहंहिति आदि लःया मुहान फुक्कं यचुपिचु याइगु नं चलन दु । वातावरणवादीतय्सं थ्व न्हियात ‘लः दिवस’ कथं नं माने याः।

थुगुसी २०७५ सालया मलमास वंगु जेठ २ गतेनिसें जेठ ३० गते तक लाःगु खः । थ्व लछिया ईयात पुरुषोत्तम मास नं धायेगु चलन दु । थ्व पुरुषोत्तम महिनाय् संल्हू लाइमखु । नापं मेगु छुं नं नखःचखः व साइतय् याःगु पुजा, आराधनाया ज्या नं जुइमखु । थ्व पुरुषोत्तम मास सिधयेवं धाःसा सिथिनखः वइ । दँय्दसं जेठ महिनाया शुक्ल पक्ष षष्ठिकुन्हु थ्व सिथिनखः लाइ । महाद्यःया कायया नां कुमार षष्ठि खः । वयात सिद्धिकुमार नं धाइ । थ्व दछिया दुने गुलि नं नखःचखः दु उकी मध्ये दकलय् लिपांगु नखः जूगुलिं सुयां नं छुं गुगुं कारणं देपुजा न्याये मफुत धाःसा थ्वकुन्हु देपुजा न्यायेकेगु चलन दु ।

येँय् न्हूघलय् सिथि द्यःया दँय्दसं जात्रा जुइ । सिथिनखःकुन्हु सिथि द्यःया जात्रा यायेगु झ्वलय् पुजाया नापनापं कुमार द्यःयात नं कुमार षष्ठि प्यन्हु न्ह्यः अर्थात जेठ शुक्ल तृतिया कुन्हु न्हवं यायेमाः । थसिं वइपिं नेम्कुलतय्सं जवंखवं च्वनाः सिद्धि द्यःया न्ह्वं याइगु चलन दु । सिथिनखः कुन्हु राजोपाधयाय ब्राम्हणं विधिपूर्वक यज्ञाहुति यानाः कलशार्चन यानाः सिथि द्यः अर्थात कुमार द्यःयात कर्म खंकाः पुजा यायेगु चलन दु । जिं सिउकथं आतक जिमिगु स्वंगू पुस्तां थथे होम यानाः सिथि (कुमार) द्यःयात विधिविधानकथं पुजा याना वयाच्वंगु दु ।

ह्याउँगु वर्णया म्हय्खा गया च्वंम्ह कुमार द्यः स्वयेबलय् मचाचाम्ह खने दुगुलिं तसकं चचंलम्ह थें नं खनेदु । हिसिचा दुम्ह जूगुलिं न्ह्याक्व स्वःसां मगाःथें च्वनी। कुमार द्यःयात नेम्कुलतय्स. द्यःपाःलाःनापं च्वनाः द्यःयात बांलाक हिसि दयेक समाः यानाः छायेपी । द्यःयात तिसा मतुलिं पुइकाः स्वांमाः क्वखायेकाः द्यःयात तसकं झःझः धायेकी ।

सिन्हाज्याया ई त्यःगुलिं थ्व सिथिनखःबलय् चुक, ननि, सुचुपिचु याइ, नापं तुं, बुंगाःनापं लःसा स्रोत नं सुचुकुचु यायेगु व थ्व कुन्हु म्वःल्हुयाः थःनं नीसी जुइ । झीसं सिद्धि द्यः (कुमार द्यः) वा सिद्धिकुमारयात पुजा यायेबलय्, आराधना ायेबलय् विशेष यानाः चौमरि, बीबः घासाता तयाः माय्वः, मूवः, कसूवःलिसें चतांमरि तयाः द्यःयात छायेगु चलन दु ।

कुमार द्यः स्वयेबलय् चंचलम्ह जुयाः बांलाःम्ह मचाथें खने दु । उकिं उमेर दयां नं चचंल मजुल धाःसा मस्तय्त थ्व द्यःयाथाय् यंकाः पुजा यानाः भागि याकेगु चलन नं दु । सिद्धि द्यः पुजा जक पुजा याइगु मखसे ताःई न्ह्यवंनिसें म्हं मफयाच्वन धाःसा वयागु नामं सछि व च्यापु न्यातु ल्हानातःगु इताः, हाम्व चिकनय् बुलां आइतवाःकुन्हु च्याकीगु चलन दु ।

यदि इताः बांलाक च्यात धाःसा म्ह सुख मदुम्हेसिया ल्वय् याकनं लना वनी धइगु जनविश्वास दु । अथे हे सिथि द्यःयात मुद्दा त्याकाबीम्ह द्यः धकाः नं धायेगु याः । अदालतय् मुद्दा दायर जुयाच्वंगु अवस्थाय् अन्याय जूपिंसं सिथि द्यःयाथाय् वनाः नं मत च्याकः वनेगु चलन दु । मत च्याःगु लिधंसाय् बांलाक मत च्यात धाःसा मुद्दा त्याइ धकाः धया हयेगु द्यःपाःलाःतय्सं धायेगु याः ।

अथे जूगुलिं कुमार द्यःया महिमा व महत्व अपरम्पार जूगुलिं झी सकसिनं सिद्धिकुमार द्यःयात दुनुगलंनिसें भक्तिभावपूर्वक, श्रद्धापूवर्क न्हियान्हिथं पुजा व आराधना यायेगु यायेमाः ।

सम्बन्धित बुखँ

LEAVE YOUR COMMENTS