बजाः भाः अझ हे थहां वनीगु
येँ – पेट्रोलियम पदार्थया भाः थहां वनेवं बजारय् थीथी सामग्रीया भाः नं थहां वनेगु सुरु जूगु दु । अथेहे सरकारं उकुन्हु न्ह्यब्वःगु बजेटय् अन्त शुल्क लगायतया कर अप्वयेकेवं उकिया लिच्वः दैनिक उपभोग्य ज्वलनय् समेत लाःगु खँ नेपाल खुद्रा व्यापार संघया अध्यक्ष पवित्र वज्राचार्यं ‘नेपालभाषा टाइम्स’ यात कनादिल ।
थाैंकन्ह्य बजार नयेगु चिकं प्रतिलिटर १७ तका थहां वंगु दुसा जाकि बोरां (३० किलो) १०० तकां थहां वंगु दु । अथेहे चिनी प्रतिकेजी २ तका थहां वंग दुसा थीथी कथं केँय् प्रतिकिलो १० तका तक थहां वंगु दु । अथेहे प्याकेट चाउचाउ नं प्रति प्याकेट १ तका थहां वंगु दु ।
अध्यक्ष वज्राचार्यया कथं आः वइगु छुं ई लिपा मेमेगु सामानय् नं भाः थहां वनीगु सम्भावना खने दयाच्वंगु दु । वय्कलं उद्योगपाखें आः तक भाः थकयाः सामान मवःगुलिं छु छु ज्वलनय् भाः थहां वंगु खः सीमदुनिगु खँ कनादिसें धयादी, ‘उद्योगं रेट छ्वया महःगुलिं पूवंगु भाः थहां वंगु सीमदुनि, उद्योगं रेट छ्वया हयेवं हे भाः थहां वनी ।’
वय्कःया कथं बैंकया ब्याजदर अप्वःगुलिं उद्यमितय्सं बैंकयात पुलेमाःगु ब्याजया कारणं नं बजाःभाः थहां वनीगु सम्भावना दु । ‘उद्यमितय्सं ब्याजया ध्यबा नं थःगु उत्पादनपाखें हे सायेकीगु खँ कनादिसें वय्कलं धयादिल, ‘थुुगुसी उपभोक्तात थीथी कथंया मारय् लानाः अझ हे पीडित जुइमालीगु सम्भावना दु ।’ पेट्रोलियम पदार्थया भाः थहां वनेधुंकाः तरकारीया लिसें नसा ज्वलंया भाः नं थहां दु ।
मेखे खुद्रा व्यापारी हरि महर्जनं धाःसा सरकारं भाः बढे मयाःसां थोक बिक्रेतातय्सं हे दैकि उपभोग्य ज्वलंया भाः थकाःगु द्वपं बियादिल । वय्कलं धयादिल ‘बजेट भाषणय् उपभोग्य सामानया भाः थकाःगु मदु तर थोक व्यापारीतय्सं थःयसें भाः थकाःगु खः ।’
वय्कलं बजेटय् अन्तशुल्क थहां वंगुलिं अज्याःगु सामान आम उपभोक्तां मछ्यलीगु जुयाः छुं समस्या मदु तर न्हियान्हिथं उपभोग यायेमाःगु उपभोग्य वस्तुइ भाः थकायेगु धाःसा गलत जूगु खँ कनादिल । अय्लाः चुरोटय् भाः थहां वंगु धइगु सामान्य खँ खः धासें वय्कलं उपभोग्य वस्तुया भाः थकायेगु ज्या व्यापारीतय् चलखेलपाखें जूगु खँ नं कनादिल ।
सरकारं थ हे मकाःगु ज्वलंया भाः नं बजारय् थहां वनाच्वंगु खँय् सरकारं धाःसा छुं हे चिउताः मतःगु खँ खुद्रा व्यापार संघया नायः वज्राचार्यं कनादिल । बजारय् सरकारपाखें अनुगमन यानाः अज्याःगु ज्वलंया भाः थकाःपिंत कारवाही यायेमाःगु बिचाः वय्कलं प्वंकादिल ।
बजारय् उपभोग्य ज्वलं बाहेक निर्माण सामग्री, रंगरोगनया सामानय् नं भाः थहां वंगु दु ।
LEAVE YOUR COMMENTS