रोमाञ्चक कासा जर्मनी पराजित

एजेन्सी- डिफेन्डिङ च्याम्पियन जर्मनीं थःगु न्हापांगु कासाय् पराजित जूगु दु । नकतिनि क्वचाःगु कासाय् जर्मनीयात मेक्सिकों १–० गोलं बुकल ।
थुगुसीया विश्वकपया छगू तसकं रोमाञ्चक कासाय् मेक्सिकोया निंतिं हार्भिङ लोजानों ३५ औं मिनेटय् छगू जक गोल याःगु खः ।

जर्मनी सन् १९८२ लिपा विश्वकपया न्हापांगु कासाय् पराजित थ्व हे न्हापांखुसी खः । विश्वकपय् डिफेन्डिङ च्याम्पियन न्हापांगु कासाय् पराजित जूगुलिइ जर्मनी स्वंगूगु देय् जूवंगु दु । थ्वयां न्ह्यः सन् २०१०य् इटली व सन् २०१४य् स्पेन डिफेन्डिङ च्याम्पियन जुयाः नं न्हापांगु कासाय् हे पराजित जूगु खः ।

जर्मनीयात पराजयपाखें बचे यायेगु निंतिं कप्तान व गोलकिपर म्यानुएल नुयुर तकं अन्तिम मिनेटय् जर्मनीयात वःगु कर्नरय् गोल यायेगु निंतिं विपक्षीया डिबक्स थ्यंक थ्यंगु खः । तर मेक्सिकों अन्तिम इलय् तकं उत्कृष्ट कासा न्ह्यब्वसें जर्मनीया फुक्क कुतः असफल यानाबिल । मेक्सिकोया गोलकिपरं जर्मनीया तःगू प्रहारयात बचे यासें उत्कृष्ट कासा न्ह्यब्वःगु खः ।

थौंया कासाय् निगूगु हाफय् दुहां वःम्ह मेक्सिकोया ३९ दँया राफेल माक्र्वेज न्याक्वःतक विश्वकप म्हितूम्ह स्वम्हम्ह कासामि नं जूगु दु । थ्वयां न्ह्यव जर्मनीया लुथर म्याथ्युस व मेक्सिकोया हे एन्टोनियो कार्बजालं जक न्याक्वःतक विश्वकप म्हितूगु कीर्तिमान तयातःगु दु ।