कार्यान्वयन यायेत थाकुइगु भौतिक पूर्वाधार लक्षित प्रदेशतय् बजेट

येँ – भौतिक पूर्वाधार व सामाजिक विकासय् केन्द्रीत यानाः न्हय्गुलिं प्रदेशं आर्थिक दँ २०७५÷७६या निंतिं वंगु शुक्रवाः बजेट न्ह्यब्वःगु दु । न्हय्गुलिं प्रदेशया बजेट जोडे यायेबलय् निगू खर्ब स्वयां अप्वः थ्यंगु दु । थ्व बजेट संघीय नेपाःया बजेटया १५ प्रतिशत थ्यंवः । दकलय् अप्वः बजेट १ नं. प्रदेशं फ्याःगु दुसा दकलय् म्हो प्रदेश नं. ४ या दु ।

प्रदेशया बजेटय् नं मोनोरेल, केबलकार, सुरुङमार्ग थेंज्याःगु महत्वाकांक्षी योजनात दुथ्यानाच्वंगु दु । विज्ञतय्सं प्रदेशं हःगु बजेट नं संघीय बजेट थें हे खनेदुगु व प्रदेशया आर्थिक मामिला मन्त्रीतय्सं नं संघीय अर्थमन्त्री बजेट न्ह्यब्वःगु हे शैलीइ बजेट पेश याःगु खँ धाःगु दु ।अले संघीय बजेटय् थें मुख्य रुपं भौतिक पूर्वाधार व सामाजिक विकास हे केन्द्रीत यानाः बजेट हःगु दु ।

फुक्क धयाथें प्रदेशं थःथःपिनि हैसियत कथं मोनो रेल, मेट्रो रेल, केबल कार निसें सुरुङ मार्ग दयेकेगु निंतिं बजेट फ्याःगु दु ।
प्रदेश नं. १ य् सगरमाथा क्षेत्रया नाम्चे तक केबलकार यंकेगु खँ न्ह्यथनातःगु दुसा ५ नम्बर प्रदेशय् लुम्बिनीइ मोनोरेल न्ह्याकेगु निंतिं बजेट फ्यानातःगु दु । सामाजिक विकासय् उल्लेखनिय बजेट फ्यायेगु झ्वलय् प्रदेश नं. २ लय् छात्रातय्त लक्षित यानाः विशेष कार्यक्रम तःगु दु ।

‘मुख्यमन्त्री बेटी पढाउ, बेटी बचाउ अभियान’ नामं मिसामस्तय्त आखः ब्वंकेगु निंतिं २० करोड तका फ्याःगु दु । अथेहे कर्णाली प्रदेशय् छुवाछुत व छाउपदी प्रथा थेंज्याःगु कुरीति विरुद्ध अभियान न्ह्याकेत बजेट फ्याःगु दु । थन सामाजिक कुरीति कथं दुगु छुवाछुत, छाउपडी, बोक्सी, बालविवाह व सडक बालबालिका मुक्त घोषणा याःगु स्थानीय तहयात न्यागू लाख तक प्रोत्साहन कथं बजेट बिइगु व्यवस्था याःगु दु ।

प्रदेशतय्सं संघीय बजेट थें ततःधंगु भौतिक निर्माणया आशा क्यनाः बजेट हःगुयात कयाः अध्ययन हे मयासे हःगु बजेट धकाः योजना आयोगया पुलांम्ह उपाध्यक्ष शंकर शर्मां धयादीगु दु । वय्कलं प्रदेशतय्सं हःगु बजेटय् दीर्घकालिन सोच व योजना अध्ययन यानातःगु खनेमदुगु खँ धयादीगु दु ।

‘आः प्रदेशतय्के दुगु क्षमता स्वयेगु खःसा थ्व बजेट कार्यान्वयन यायेत तसकं हे थाकुइगु खनेदु’ वय्कलं धयादीगु दु । वय्कःया कथं प्रदेशय् विकासया निंतिं फ्यानातःगु बजेट मध्ये ५० प्रतिशत नं खर्च यायेफइगु खनेमदु ।

प्रदेश ३ या बजेट

येँ – प्रदेश नं. ३ या आर्थिक दँ २०७५÷७६ या निंतिं ३५ अर्ब ६१ करोड ५६ लाख तका बजेट फ्याःगु दु । प्रदेशया आर्थिक मामिला तथा योजना मन्त्री कैलाश ढुंगेलं शुक्रवाः प्रदेश सभाय् बजेट न्ह्यब्वयादीगु खः ।बजेटय् चालु पाखे ३८.९२ प्रतिशत व पूँजीगतपाखे ६१.०८ प्रतिशत खर्च जुइगु अनुमान यानातःगु दु ।

मुक्कं बजेट मध्ये चालुपाखे १४ अर्ब ८६ करोड २५ लाख ९१ हजार व पूँजीगत पाखे २१ अर्ब ७५ करोड ३० लाख ९ हजार खर्च यायेगु प्रक्षेपण यानातःगु दु ।खर्चया निंतिं आन्तरिक राजश्व पाखें ९ अर्ब ३३ करोड ३६ लाख ७३ हजार, संघीय समानीकरण अनुदानपाखें ५ अर्ब ९६ करोड ९७ लाख, राजश्व बाँडफाँटपाखें ८ अर्ब ९९ करोड ६६ लाख, २७ हजार दां वइगु खँ न्ह्यथनातःगु दु ।

केन्द्रीय सरकारपाखें १० अर्ब ६१ करोड ५६ लाख सशर्त अनुदान पाखें वइगु जुइधुंकूगु दुसा नगद मौज्दात ७० करोड दुगु खँ बजेट न्ह्यथनातःगु दु ।बजेटय् येँ–हेटौंडा स्वाइगु पुष्पलाल सुरुङमार्ग, चक्रपथ दयेकेगु व अन्तर्राष्ट्रिय विमानस्थल दयेकेगुयात मू प्राथमिकता बियातःगु दु ।

अथेहे जलविद्युत आयोजना, विश्व सम्पदा धलखय् लाःगु संरचना संरक्षण व प्रवद्र्धन, वन्यजन्तु संरक्षण व पर्यटन प्रवद्र्धनया निंतिं नं बजेट फ्यानातःगु दु । अथेहे झिदँया दुने डिजेल, पेट्रोलया गाडी पूवंक चिकेगु लिसें स्वदँया दुने प्लाष्टिकयात पूवंक विस्थापित यायेगु योजना नं बजेटय् न्ह्यथनातःगु दु ।

सम्बन्धित बुखँ

LEAVE YOUR COMMENTS