विकास समृद्धिया लागि शक्ति आवश्यक

वंगु हप्ताय् विश्वया जनताया ध्यान सालाच्वंगु छगू अमेरिकी राष्ट्रपति ट्रम्प व किम जोङ उन दथुइ जूगु सिंगापुरया वार्ता खःसा मेगु चीनय् सांघाइ सहयोग संगठन (एससीओ)या शिखर सम्मेलन । थ्व निगू विषय मध्ये ट्रम्प व किमया दथुइ जूगु वार्तायात विश्वया जनतां अप्वः ध्यान बीगु यानाच्वंगु दु । थ्व वार्ताया परिणामं विश्वयात हे प्रत्यक्ष वा अप्रत्यक्ष रुपं लिच्वः लायेफु ।

अथे धयागु वार्ताया परिणाम सकारात्मक जुल धाःसा विश्वया जनतां शान्तिया अनुभव याये खनी । यदि वार्ताया परिणाम सकारात्मक जुल धाःसा विश्वया जनतां शान्तिया अनुभव यायेखनी । यदि वार्ताया परिणाम नकारात्मक जुल धाःसा वया लिच्वः नं नकारात्मक जुयाः विश्वयात प्रभाव लाकेफु । यदि ट्रम्प व किम हठबादी लँपुइ वन धाःसा अमेरिका व उत्तर कोरियाया दथुइ युद्ध तक नं जुइफु ।

यदि युद्ध जुल धाःसा खालि अमेरिका व उत्तर कोरिया दथुइ जक युद्ध जुइगु मखु, थ्व युद्धं तेस्रो विश्वयुद्ध तक नं जुइगु सम्भावना दु । यदि तेस्रो विश्वयुद्ध जुल धाःसा परिणाम अत्यन्त भयानक जुइफु । अथे जूगुलिं यानाः ट्रम्प व किमया वार्ता सकारात्मक परिणामय् वयेमाः धकाः विश्वया जनतां कामना यानाच्वंगु दु ।

थन छुं भचा अमेरिका व उत्तर कोरियाया दथुइ खिचोलो जुयाच्वंगु बारे उल्लेख यायेगु कुतः याये । वास्तवय् उत्तर कोरिया व अमेरिका अथवा दक्षिण कोरियाया दथुइ खिचोलो जुयाच्वंगु मुख्य कारण सिद्धान्तं यानाः खः । उत्तर कोरिया कट्टर कम्युनिष्ट शासनया सिद्धान्त ज्वनाः शासन चले जुयाच्वंगु देश खःसा अमेरिका व दक्षिण कोरिया पुँजीवादी सिद्धान्त अन्तर्गत चले जुयाच्वंगु देश खः ।

सिंगापुरय् जूगु वार्ता सफल जुल धायेमाः । छाय्धाःसा मुख्य बुँदा निःशस्त्रीकरण व मेगु कोरिया प्रायदीपय् शान्ति व्यवस्था निर्माण यायेगु खः । वार्ता सफल जूसां नं व्यवहार स्वयेगु बाँकी दनि ।

अमेरिका दक्षिण कोरियायात संरक्षण यानाच्वंम्ह देश खः । अमेरिका दक्षिण कोरियायात सुरक्षित याना तयेत द्वलंद्वः अमेरिकी सैनिकतय्त दक्षिण कोरियाया भूमिइ परेड म्हितकातःगु दु । थ्व हे कारणं यानाः उत्तर कोरियायात जक मखु चीनयात नं कपाः स्यानाच्वंगु दु । सन् १९५३ सालपाखे उत्तर कोरियां दक्षिण कोरियायात एकीकरण यानाः कम्युनिष्ट शासन व्यवस्था यायेगु हिसाबं सैनिक बलं कब्जा यात ।

जब दक्षिणयात कब्जा यात, अमेरिकां संयुक्त राष्ट्र संघपाखें आज्ञा कयाः जक मखु युरोपीय राष्ट्रतनाप मिले जुयाः उत्तर कोरियालिसे युद्ध यानाः उत्तरया राजधानी जक कब्जा याःगु मखु चीनया सिमाना याङ्सी खुसि तक अमेरिका व युरोपया सेना न्ह्यज्याकेगु कुतः यात । जब चीनया सिमानाय् अमेरिकाया फौज थ्यन, चीन झस्के जुल । चीन व उत्तर कोरियापाखें अमेरिका व युरोपया सेनापाखें मुक्त यायेया लागिं लाखौं सेना परिचालन यात ।

उत्तर कोरियायात मुक्त नं यात । व इलंनिसें उत्तर कोरियायात चीनं साथ बियाच्वंगु खः । राष्ट्रपति ट्रम्पनाप वार्ता याकेगु लागिं नं चीनं महत्वपूर्ण भूमिका म्हितल । वार्ता याये न्ह्यः किम जोङयात चीनय् निकः तक सःताः चीनया राष्ट्रपति सीनं धाल–देशयात शक्तिशाली यायेगु खःसा आणविक हतियार जक दयां मगाः । देशयात उच्च विकास याये फत धाःसा जक शक्तिशाली जुइ फइ । थ्व हे कारणं न्हापांगु ज्या कोरियन क्षेत्रय् शान्तिया अनुभव याके फयेकेमाः ।

थ्व हे खँयात मनन यानाः किम छपलाः न्ह्यःने बढे जुयाः ट्रम्पनाप वार्ता यायेत सिंगापुर वःगु खः । सिंगापुरय् जूगु वार्ता सफल जुल धायेमाः । छाय्धाःसा मुख्य बुँदा निःशस्त्रीकरण व मेगु कोरिया प्रायदीपय् शान्ति व्यवस्था निर्माण यायेगु खः । वार्ता सफल जूसां नं व्यवहार स्वयेगु बाँकी दनि । यदि अमेरिकां दक्षिण कोरियाय् तयातःगु थःगु सैनिक लित यंकल धाःसा वार्ता पूवंक सफल जुल धाःसां जिल ।

मेगु चर्चाया विषय खः एससीओया शिखर सम्मेलन । थ्व सम्मेलन नं विश्वया ध्यान सालेत सफल जुयाच्वंगु दु । वास्तवय् जब असंलग्न राष्ट्रया शिखर समम्ेलन (नाम)या महत्व कम जुयावन अन लिपां क्षेत्रीय संगठनया भावना विकास जुयावःगु खः । दसुया लागि आशियान संगठन, सार्क संगठन, युरोपियन युनियन, अझ अफ्रिका व ल्याटिन अमेरिकाया नं क्षेत्रीय संगठन विस्तार जुजुं वनाच्वंगु दु ।

तर संगठनं गुलि प्रगति यानाः वनेमाःगु खः, उलि जुया वनाच्वंगु खनेमदु । दसुया लागि आशियनया राष्ट्रतय्सं न सुरक्षा मजबूत यायेगुली वने फत न आर्थिक रुपं नं फड्को हे याये फत । मेगु दक्षिण एशियाया सार्क संगठन ला झन हे पंगु थें जुया वन । बरु सांघाइ सहयोग संगठन (एससीओ)या भविष्य बांलाना वनी थें च्वं ।

छाय्धाःसां थ्व संगठनया राष्ट्रत चीन, रुस, भारत, व पाक आणविक विकासया नापनापं आर्थिक क्षेत्रय् नं मजबुत यानाः विश्वया ध्यान सालेत सफल जनुयाच्वंगु देश खः । मेगु सदस्य राष्ट्रत कजाखस्तान, किर्गिस्तान, काजिकिस्तान, उब्जेकिस्तान ला प्राकृतिक श्रोत साधनया धनी राष्ट्र खः । थ्व संगठनय् अफगान, मंगोलिया, बेलारुस व इरान पर्यवेक्षक राष्ट्र खः । मेगु प्रभावहीन राष्ट्रत खः आर्मेनिया, अजरबैजान, कम्बोडिया, नेपाल व श्रीलंका ।

थुपिं खालि डाइलग पार्टनर जक खः । थ्व संगठनया मूल मूल भावनाया बारे चीनया राष्ट्रपति सी २०१६ सालय् उज्वेकिस्तानया राजधानी टासकेन्ट उदघाटन यायेगु क्रमय् उल्लेख यात । थ्व संगठनया उद्देश्य क्षेत्रीय सुरक्षायात सुनिश्चित यायेगु, क्षेत्रीय विकासय् मजबूत याना वनेगु वया नापनापं परस्पर विश्वास सम्मन व समानताया भावना विकास याना वनेगु धकाः प्रतिबद्धता यात ।

अझ ला सदस्य राष्ट्रया नापं जक मखु, युरोप व अफ्रिकाया मुलुक नाप नं विकासय् सहकार्य व सहभागी लागि बेल्ट रोड परियोजनाया अवधारण हःगु खः । बेल्ट रोड मार्फत औद्योगिक विकास, व्यापार विस्तारया नापनापं जनस्तर नं सम्बन्ध मजबूत याना वनेगु उद्देश्य खः धकाः घोषणा यात ।

थ्व हे कारणं यानाः विश्वया जनतां एससीओपाखें विकास समृद्धिया नापनापं शान्तिया वातावरण हयेफु धकाः आशा यानाच्वंगु दु । झीगु देशया नेतात देशभक्त दुपिं खःसा एससीओ पाखें देश विकास यायेगु अवसर जक मखु, देशया अखण्डयात नं सुरक्षित यायेत सफल जुइ । तर विडम्बना असक्षम नेतातय्सं देशया अखण्डता यात धरापय् लाकेगु स्वयाच्वंगु दु ।

 

सम्बन्धित बुखँ

LEAVE YOUR COMMENTS