सुभाष नीरव

जि गुगु त्वालय् च्वनेगु खः, अन आः आः हे तिनि जक बस्ती दयावःगु खः । थन आःपाः थें छेँ गरीब मजदूर व जागीर नयाच्वंपिं मनूतय्गु खः । छपुचः मनूत जानाः त्वाःया उत्थान यायेत छगू कल्याण समिति दयेकल । जि नं उकिया दुजः खः ।
दकलय् न्हापां मनूतय्सं त्वालय् मन्दिर (देगः) छगः दनेगु बिचाः याःगु खः ।

लिपा थवंथवय् सहलह याये धुंकाः थ्व खँ क्वःजित कि त्वालय् मन्दिर मखु, विद्या मन्दिर दयेकेमाःगु दु, गन गरीब परिवारया मस्तय्त ज्ञान व शिक्षा अःपुक चूलाकाबी फइ । सकलें जानाः छखा चिकिचाखागु ज्ञानमन्दिरया भवन दयेकल । अनंलि थ्व सुझाव वल कि थुकिया उद्घाटन छाय् सुं नेता वा मन्त्रीयात याके मबीगु ? थ्व खँय् खूब बिचार विमर्श जुल ।

अले सर्वसम्मतिं थ्व क्वःजित कि थ्व भिं–ज्या सुं नेता अथवा मन्त्रीया ल्हातं मखु, सुं छम्ह शिक्षाशास्त्री, समाजसेवी अथवा सुं छम्ह वरिष्ठ च्वमिया ल्हातं याकेमाली । अथे जूबलय् देशया नांजाःम्ह प्रगतिशील बिचाः दुम्ह वरिष्ठ च्वमि शास्त्रीजीयात स्वापू तल, गुम्ह थ्व हे शहरय् च्वंम्ह खः । वय्कः लय्लय् तायाः तयार जुल । उद्घाटन ज्याझ्वलय् शास्त्रीजी निघौ न्ह्यः हे थ्यंकः झाल । जिं वय्कःयात बसस्टपय् काःवना ।

‘झासँ, न्हापालाक छितः जिं जिथाय् छेँय् नि ब्वनायंके । ज्याझ्वः शुरु जुइत ताउ माली तिनि ।’ नमस्कार यायेधुंकाः जिं थथे धयाबलय् वय्कः मानय् जुयादिल । बसस्टपं जिगु छेँ सतिक हे लाः । जिपिं न्यासि हे वनाछ्वया । बछि ति लँ पुले धुंकाः शास्त्रीजी लँय् तक्क दिनादिल ।

‘छु जुल शास्त्रीजी ?’
‘मखं ला भाइ, नकतिनि हाकुम्ह भतिं लँ त्वाःल्हानावंगु । अपशकुन जुल । पलख द्यु आः ।’
जि गजब चाल कि थपाय्धंम्ह विद्वान व प्रगतिशील बिचाःयाम्ह च्वमि। थुबलय् हे जिं छुं बिचाः यानाः वय्कःयात धया, ‘झासं छितः विद्यामन्दिरय् हे यंके । थनं सतिक हे दु ।’

‘छाय् भाइ, छिं ला जितः थःगु छेँय् ब्वनायंकेत्यंगु खः नि ।’
जिं खःगु खँ धयाबीगु हे बांलाइ तायेका, ‘हनेबहम्ह, खँ छु धाःसां नि, जिगु छेँय् तःम्ह हे भौ दु । न्हिं न्हिं हे ग्वःक्वः ग्वःक्वः वयेवने यायेबलय् जिमिगु लँ त्वाःल्हानाबी । छितः समस्या जुइ, भौत दुगु छेँय् ।’

जिगु लिसः न्यनाः वय्कः गम्भीर जुयाः बिचारय् दुनादिल । ‘झासँ, विद्यामन्दिरया लँ उखेरं खः’, जिं वय्कःया तन्द्रा भंग जुइक इनाप याना । वय्कलं जिगु ख्वालय् छक्वः पुलुक्क स्वयादिल, अले मुसुहुं न्हिलाः धयादिल, ‘मखु, आः ला जि न्हापालाक छिगु छेँय् निं वये ।’
भाय् हिउम्ह ः रमेशकाजी स्थापित

सम्बन्धित बुखँ

LEAVE YOUR COMMENTS