ल्वय् लिसे ल्वायेगु क्षमता अप्वयेकीगु सिसाबुसा व तरकारि

ल्वय्लिसे ल्वायेगु क्षमता अर्थात ‘इम्यून सिस्टमं’ झीत यक्व हे कथंया ल्वय्पाखें प्राकृतिक रुपं हे सुरक्षित यानातइ । चिचिधंगु अज्याःगु गुलिखे ल्वय् दयाच्वनी, गुकियात झीगु म्हं थःथम्हं हे लंकी । ल्वय्लिसे ल्वायेगु क्षमता बमलातकि ल्वचं याकनं लिच्वः लाकी । अक्सर छिं अनुभव यानादीगु दयेमाः कि छखा हे छेँय् च्वंपिं मनूतय् दथुइ नं मौसमया प्रभाव अलग अलग हे खनेदयाच्वनी ।

गुलिसितं सर्दी वा गर्मी अप्वयेवं तुरुन्त म्हं मफयेकाबी, तर गुलिसितं धाःसा मौसमया प्रभाव गुगुं ल्वय्या रुपय् लाइमखु । थुकिं मनूया ल्वय्लिसे ल्वायेगु क्षमता गुलि दु धयागु खँ क्यनी । ख ला थन मौसम हिलीगुयात दसुया रुपय् जक कयागु खः, तर म्हया ल्वय्लिसे ल्वायेगु क्षमतां गुलिखे गम्भीर ल्वय् जुइगु वा मजुइगु खँय् निर्णायक भूमिका म्हिती ।

म्हया इम्यून सिस्टमयात अप्वयेकेत व फिट याना तयेत जरुरी जुइ, व्यायाम व आवश्यक विश्राम । अथे हे नियमित जीवनचर्या जुइमाः, गथेकि सुथय् इलय् हे दनेगु, बहनी नं इलय् हे द्यनेगु, पाय्छि इलय् पौष्टिक भोजन यायेगु आदि । दकलय् जरुरी ला मानसिक तनावं तापाक च्वनेगु खः ।

खराब मानसिक स्वास्थ्यं छिगु म्हया ल्वय्लिसे ल्वायेगु क्षमतायात बमलाका बीफु, गुकिं भावनात्मक रुपं कठिन इलय् छिगु निंतिं संक्रमणया सम्भावना अप्वयेकाबी । थ्व बाहेक जब छि तनावग्रस्त वा चिन्तित जुयादी, छिं नशालु पदार्थ कायेगु शुरु याइ वा उकिया मात्रा अप्वयेकी, व नं खराब मानसिक स्वास्थ्यया लक्षण जुइफु ।

थौं थन छिकपिंसं अज्याःगु सिसाबुसा व तरकारिया बारे सिइकादिसँ, गुकिया लगातार सेवनं छिं थःगु ल्वय्लिसे ल्वायेगु क्षमतायात अप्वयेकेफइ ।

स्याउ ः एन्टिअक्सिडेन्टं भरपूर अर्थात अनेतने ल्वय्पाखें रक्षा । थ्व एकदम ल्वय्लिसे ल्वाइगु सिसाबुसां प्वाः, वा, न्ह्यपु, नुगःस्येँ, मिखा व स्येँ अर्थात म्ह छम्हंयात फाइदा याः ।

सन्तरासि–मेवा ः सन्तरासिइ भिटामिन सी, ए, एन्टिअक्सिडेन्ट, डायटरी फाइबर करिब १७० फोटोन्यूट्रिएन्स दइ । थ्व कारणं थुकिं म्हया मनावःगु, हियूगु, अल्सर व कोषया क्षयपाखें रक्षा याइ । थ्व एकदम ल्वय्लिसे ल्वायेफु । थुकिं हियात नं शुद्ध यानाबी । सन्तरासि थें हे मेवा नं भिटामिन सीया बांलाःगु स्रोत जूगुलिं थुकिं ल्वय्लिसे ल्वायेत म्हयात यक्व हे ग्वाहालि याइ ।

अम्बः ः अम्बलय् सन्तरासिइ स्वयां नं अप्वः भिटामिन सी दइ । थुकिं म्हया ल्वय्लिसे ल्वायेगु क्षमता अप्वयेकाबी ।

अं ः अंलय् दुगु थ्यंमथ्यं न्हय्ताजि एन्टिअक्सिडेन्ट व मेमेगु एन्जाइमं झीत तःता हे कथंया क्यान्सरपाखें रक्षा यानातइ । भिटामिन सी दुगुलिं अंनं ल्वय्लिसे ल्वायेत नं ग्वाहालि याइ ।

बःसि ः बःसिइ आइरन, जिंक, म्याग्नेशियम, म्यागनीज, क्याल्सियम, सल्फर व भिटानि ए, बी, सी व ई थेंज्याःगु तत्व दइ । थ्व सिसाबुसां नं म्हय् ल्वय्लिसे ल्वायेगु क्षमता अप्वः दयेकाबी ।

पासि ः पासिइ फाइबर, भिटामिन बी, सी, ई व कपर पोटाशियमया भण्डार दइ, गुकिं यानाः झीगु स्वास्थ्य बांलाकातयेत थ्वं ग्वाहालि यानाच्वनी । थुकिं म्हया तापक्रम नं क्वकाइगु जूगुलिं ज्वर वःपिंत थ्व नकेगु बांलाः धाइ ।

खरबुजा ः खरबुजाय् भिटामिन ‘ए’ बीटा क्यारोटिन, भिटामिन सी, यक्व दइ । भिटामिन सीया भण्डार जूगु कारणं थुकिं एन्टिअक्सिडेन्टया ज्या याइ । याकनं बुराबुरि खने मदयेकातइ, अले थीथी हमलापाखें कोषयात रक्षा यानातइ । थुकिं ल्वय् लिसे ल्वायेगु क्षमता बल्लाकाबी ।

किवी ः किवीइ दुगु फोटो न्यूट्रिएन्टं डिएनएया मरम्मत याइगु कारण शानदार एन्टिअक्सिडेन्टया ज्या याइ ।थुकिया फोलिक एसिडं हिइ ह्याउँगु कण दयेकी, अले भिटामिन सीं म्हयात ल्वय्लिसे ल्वायेफयेका बी । किवीइ क्याल्सियम, क्रोमियम, कपर, आइरन, म्याग्नेसियम, पोटाशियम, जिंक थेंज्याःगु तत्व नं दइ ।

अंगूर ः अंगूरय् प्रोटीन, फाइबर, भिटामिन, ए, बी–५ व सी दइ । लिसें आइरन, क्याल्सियम, सेलेनियम, फस्फोरस, पोटाशियम, म्याग्नेशियम थेंज्याःगु खनिज तत्व दइ । अंगूरय् फ्लेभोनायड नांयागु एन्टिअक्सिडेन्ट दु,गुकिं फ्री रेडिकल्सं म्हयात रक्षा यानातइ । अंगूरं झीत इन्फेक्सन व त्यानुइगु नं जुइके बीमखु ।

पलः ः पलखय् फाइटान्यूट्रियन्ट, भिटामिन सी, ई, बीटा क्यारोटिन, सेलेनियम, जिंक, म्याग्निज आदि दइगुलिं यानाः म्हय् ल्वय्लिसे ल्वायेगु क्षमता बल्लाकाबी । थुकथं हे मेमेगु वाउँचा तरकारिं नं ल्वय्लिसे ल्वायेगु क्षमता अप्वयेकाबी ।

म्हुकं ः म्हुकं (मसरुम) भिटामिन डीया भण्डार खः । थुकियात म्हय् ल्वय्लिसे ल्वायेगु क्षमता अप्वयेकेगु शक्ति दुगु भाःपियातःगु दु । छाय्कि थुकिं एन्टि भाइरस व मेमेगु प्रोटिन दयेकेगु ज्या याइ । थुकी एन्टिअक्सिडेन्ट तत्व नं दइ, गुकिं यानाः थ्व थीथी ल्वय्लिसे ल्वायेत सक्षम जुइ ।

म्हुकंचां साइटोकिसया उत्पादन वृद्धि यानाबी । साइटाकिस अज्याःगु कोष खः, गुगु इन्फेक्सनलिसे ल्वायेत तयार जुयाच्वनी । म्हुकंचाय् पोलिसेकराइड्स नं दइ । गुकिं झीगु ल्वय्लिसे ल्वायेगु क्षमता अप्वयेकाबी । सर्दी व फ्लूया अवस्थाय् म्हुकंचाया सेवन यायेगु तसकं बांलाः ।

भिटामिन सी दुगु तरकारि ः गोलभ्यारा, ब्रोकाउलि, चाकुहि, ह्याउँगु ग्वारामल्तां नं झीगु ल्वय्लिसे ल्वायेगु क्षमता अप्वयेकाबी, छाय्कि थुकी प्रशस्त मात्राय् भिटामिन सी दइ ।

ल्वय्लिसे ल्वायेगु शक्ति अप्वयेकेत म्याग्नेसियम भपियादिसँ –
गुगु पदार्थय् म्याग्नेशियम बांलाःगु मात्राय् दइ, अज्याःगु पदार्थं ल्वय्लिसे ल्वायेगु क्षमतायात यक्व हे थकयाबी । म्याग्नेशियम, फसि व फसिपु, चाकुहि आलु, हाम्वः, सूर्यमुखीया पु, ख्वःसिं व काजु, ब्राउन राइस व मेमेगु अन्नय् यक्व हे दइ ।

थ्व केरा, स्याउ, सन्तरासि, अंगूर, किवी, बःसिइ नं यक्व दइ । थुकी मध्ये अप्वः थें पदार्थया बारे हे च्वय् न्ह्यथने धुंगु दु । ल्यं दुगु फसि, आलु, चाकुहि, हाम्वः, सूर्यमुखीया पु, नट्स व केरायात नं नसाज्वलनय् दुथ्याकादिसँ ।

हलू ः हलू छताजि मसला खः । थ्व छताजि उच्च एन्टिअक्सिडेन्ट खः, अले झीगु ल्वय्लिसे ल्वायेगु क्षमता अप्वेकेगु ज्या नं थ्वं याइ । थुकिं म्हय् मनावइगु व हिइसे च्वनीगुयात विरोध याइ । थुकिं एन्टिसेप्टिकया ज्या नं याइ । अले म्हया यीस्ट व परजीवीतय्त स्यानाबी ।

पालु ः थ्व नं छताजि सक्षम रोगप्रतिरोधी पदार्थ खः । पालु छताजि एन्टिअक्सिडेन्ट थें ज्या याइ । थ्वयाके म्हया दुने व पिने निथासं च्वनाच्वंपिं नोक्सान याइपिं ब्याटेरियातय्त स्यानाबीगु क्षमता दु ।थुकी निताजि प्राकृतिक एन्टिबायोटिक नं दु ।थुकी जिगोबेन नांयागु पदार्थ दइ, गुकी म्हय् दयाच्वंगु परजीवी व इमिगु ख्येँ नायेकाछ्वयाबी ।

धौ ः धौ प्वाः व आतापुतिया दकलय् भिंम्ह पासा खः । अले ल्वय्लिसे ल्वायेगु क्षमता अप्वयेकाबीम्ह खः । प्वाःया निंतिं एन्टिबायोटिक गुण नं दइ । अध्ययनं सीदयेधुंकूगु दु कि न्हिं छगू कप धौया सेवन यानाच्वन धाःसा सर्दीं सेखं चाइगु आशंका २५ प्रतिशत तक कम जुइ ।

तर बिचाः यायेमाःगु छता खँ छु धाःसा धौ ठण्डि खः । अले थुकिं कफ नं दयेकाबी । सेखं चाइबलय् मुसु वइबलय् कथु खराब जुयाच्वनी । अज्याःबलय् धौ नयेमजिउ । थः पूवंक स्वस्थ जुयाच्वंबलय् धाःसा धौ नियमित नयाच्वनेमाः । थुकिं ल्वय्लिसे ल्वायेगु क्षमता अप्वयेका बियाच्वनी ।

कुनू ः थुकी तःता हे मिनरल, भिटामिन, अमिनो एसिड, फोलिक एसिड, जिंक, म्याग्नेसियम, क्याल्सियम, कपर, आइरन आदि दइ । थुकिं एन्टिसेप्टिक व एन्टिबायोटिक नितांया ज्या याइ । भोज्य पदार्थ (जूस) या रुपय् थुकियात प्वाथय् क्वत छ्वयेगु व पिने छ्यंगुलिइ पायेगु, न्ह्यागु याःसां थुकिं फाइदा हे याइ ।

मेमेगु ः यक्व मेगु नं अज्याःगु चीज दु, गुकिं म्हय् ल्वय्लिसे ल्वायेगु क्षमता अप्वयेकी । गथेकि कस्ति, लाभा, मलय् अश्वगन्धा आदि ।

ल्वय्लिसे ल्वायेगु क्षमता अप्वयेकीगु
छुं छुं मेमेगु पदार्थ –

# फ्वयाः चुलि वयेकातःगु अन्न, व बीबः (स्प्राउट)य् सिसाबुसा व तरकारिइ स्वयां यक्व हे अप्वःएन्जाइम दइ । स्प्राउटं झीत उगु मूल पदार्थं स्वयां सयौं प्रतिशत अप्वः प्रोटिन, भिटामिन, मिनरल व फाइदा याइगु चिल्लो बी, गुकिं थ्व चुलि ह्वइ । अथे जुयाः थुकिं झीत खालि अप्वः तागत बीगु जक मखु, एकदम नक्सां झीगु ल्वय्लिसे ल्वायेगु क्षमता अप्वयेकाः झीत ल्वय् जुइगु पाखें रक्षा यानातइ ।

# ओट्सं नं ल्वय्लिसे ल्वायेगु क्षमता अप्वयेकी । ओट्सय् प्रोटिन, फाइबर, म्याग्नेशियम, म्याग्नीज व भिटामिन बी प्रशस्त दु । थुकिं क्वँय्या नं विकास याइ ।

ल्वय्लिसे ल्वायेगु क्षमता अप्वयेकेत थथे नं यानादिसँ –
– लय्तायादिसँ । तनावयात तापाक तयादिसँ ।
– न्हय्घौ निसें गुघौ तक द्यनादिसँ । न्ह्यलं झीगु रोग प्रतिरोधी तन्त्रयात बल्लाकी ।
– सिन्थेटिक परफ्यूम तयादी मते । साब्वं, लोशन, स्याम्पु, कन्डिश्नर, कस्मेटिक व स्प्रेय् दुगु कडा नस्वालं झीगु रोग प्रतिरोधी तन्त्रयात कमजोर याइ ।
– नियमित व्यायाम यानादिसँ ।

सम्बन्धित बुखँ

LEAVE YOUR COMMENTS