बल्लाःगु स्पेन विरुद्ध पाेर्चुगल

एजेन्सी- विश्वकप अन्तर्गत थौं जक स्वंगू कासा जुइत्यंगु दु । इजिप्टविरुद्ध उरुग्वे, मोरक्को विरुद्ध इरान व पोर्चुगलविरुद्ध स्पेनया यानाः स्वंगू कासा जुइ । स्वंगू कासा मध्ये दकलय् थौं बहनी लिबाक्क जुइगु पोर्चुगल व स्पेन दथुया कासा दकलय् स्वयेबहः जुइगु खनेदु ।

पोर्चुगल व स्पेन निगुलिं थुगुसीया विश्वकपया दावेदार टिम खः । थुपिं निगुलिं टिमं समूह बी अन्तर्गत च्वनाः थुगुसीया विश्वकपय् न्हापांगु कासा म्हितेत्यंगु दु । युरोपियन राष्ट्र स्पेन व पोर्चुगल दथुइ तःक्वः हे भिडन्त जुइधुंकूगु दु । थज्याःगु चीरपरिचित टिम दथुइ जुइगु कासायात ‘आइभेरियन वार’ अथवा ‘आइभेरियन डर्बी’ नं धायेगु याः ।

थुपिं निगू टिम दथुइ आःतक जूगु भिडन्तय् स्पेन हे बल्लानाच्वंगु खनेदु । निगू टिम दथुइ ३६ क्वः जूगु भिडन्तय् स्पेनं झिंखुक्वः त्याकेधुंकूगु दुसा पोर्चुगल मुक्कं खुक्वः जक त्याःगु दु । मेगु झिंस्वंगू कासा धाःसा बराबरीइ क्वचाःगु खः ।
विश्वकपया अन्तिम चरणय् धाःसा थ्व निगू टिम दथुइ मुक्कं छक्वः हे जक धेंधेंबल्लाः जूगु दु । सन् २०१०य् प्रिक्वार्टरफाइनलय् जूगु धेंधेंबल्लाखय् डेभिड सिल्भां याःगु छगू जक गोलया ग्वाहालिं स्पेनं कासा त्याकूगु खः ।

युरो कपय् धाःसा थुपिं दथुइ स्वंगू कासा जुइधुंकूगु दु । गुकी छगू स्पेन, छगू पोर्चुगल त्याःगु दुसा छगू बराबरीइ क्वचाःगु खः ।
आःया युरोपियन च्याम्पियन पोर्चुगल व निक्वःतक युरोपियन च्याम्पियन व सन् २०१०या विश्वकप विजेता स्पेन दथुया कासा सुनां त्याइ स्वये ल्यं हे दनि । थुपिं निगू हेभिवेट दथुइ जुइगु कासां समूह चरणय् धाःसा लिच्वः लाकेफु ।

स्वयेबहपिं कासामि

सम्बन्धित बुखँ

LEAVE YOUR COMMENTS