विश्वकप २०१८

ओभरड्राफ्ट त्यासाया सीमा अप्वयेकेत सुझाव

येँ  – वइगु आर्थिक दँया मौद्रिक नीतिया निंतिं बैंकतय् मंकाः संगठन नेपाल बैंकर्स संघं नेपाल राष्ट्र बंैंकयात थीथी सुझाव बिउगु दु । थ्व झ्वलय् बैंकतय्सं ओभरड्राफ्ट त्यासा बीगु सीमा अप्वयेकेत माग याःगु दु । थौंकन्हय् ७५ लाख तक जक व्यक्तिगत ओभरड्राफ्ट बीदुगुलिं थ्व सीमा अप्वेकेत बैंकर्सतय्सं माग याःगु खः ।

बैंकतय्सं शेयर त्यासा सीमा तोके यायेधुंकूगु अवस्थाय् ओभरड्राफ्टय् नं सीमा तयातःगुलिं निखेरं मार लानाच्वंगु खँ धाःगु दु । राष्ट्र बैंकं मार्जिन लेन्डिङय् नं ७५ लाखया सीमा किटान यानातःगु दु । संघं न्हापाया मौद्रिक नीति ओभरड्राफ्ट प्रकृतिया त्यासा १५ प्रतिशतया सीमा दुने जक बीफइ धकाः यानातःगु व्यवस्थायात व्यक्तिगत प्रकृतिया ओभरड्राफ्ट धकाः व्याख्या यायेत सुझाव बिउगु खः ।

नेपाःया अर्थतन्त्र हे आयातमुखी जूगु व व हे कथं बैंकतय्थाय् तःधंगु मात्राया वर्किङ क्यापिटल लोन दइगु जूगुलिं समग्र ओभरड्राफ्टयात १५ प्रतिशत दुने जक सीमित यायेगु उपयुक्त मखु

संघं बिउगु सुझाव पतिइ नेपाःया अर्थतन्त्र हे आयातमुखी जूगु व व हे कथं बैंकतय्थाय् तःधंगु मात्राया वर्किङ क्यापिटल लोन दइगु जूगुलिं समग्र ओभरड्राफ्टयात १५ प्रतिशत दुने जक सीमित यायेगु उपयुक्त मखु धयातःगु दु । अथेहे बैंकतय्सं पुनकर्जाया सीमा नं अप्वयेकेत माग याःगु दु ।

वइगु दिनय् त्यासाया माग अप्वइगु खनेदुगुलिं राष्ट्र बैंकं उत्पादनशील क्षेत्रय् बीगु पुनर्कर्जाया भूमिका महत्वपूर्ण जुइगुलिं थज्याःगु त्यासा नं अप्वेकेत माग याःगु खः ।संघं छेँ दयेकेगु निंतिं बीगु त्यासाया सीमा नं अप्वयेकेत माग याःगु दु । छेँ, जग्गाया भाः तसकं थहां वनाच्वंगुलिं थौंकन्हय् १ करोड अप्वः छेँ त्यासा बीमदु धयातःगु अपर्याप्त जूगुलिं निगू करोड तक थज्याःगु त्यासा बीदयेमाःगु खँ बैंकर्सतय्सं धाःगु दु ।

अथेहे मार्जिन लेन्डिङया सीमाय् नं छुं राहत बीत बैंकर्सतय्सं धाःगु दु ।शेयर बजाःया भाः तसकं थहां कुहां जुइगु जुयाच्वंगुलिं भाः तसकं कुहां वनीबलय् छक्वलं मार्जिन कल यायेबलय् लगानीकर्तातय्त तसकं थाकुइगु जूगुलिं मार्जिन लेन्डिङय् छुं राहत बीत बैंकतय्सं सुझाव बिउगु खः ।

‘सहुलियत मबिल धाःसा लगानीकर्तातय् तःधंगु असन्तुष्टी खनेदइ’ संघं धाःगु दु । विदेशं डलरय् त्यासा कायेमाल धाःसा तसकं थाकुइगु जूगुलिं भारतीय बैंक वित्तीय संस्थापाखें भारतीय मुद्रां हे त्यासा कायेफइगु व्यवस्था यायेत नं बैंकर्सतय्सं सुझाव बिउगु दु ।

 

सम्बन्धित बुखँ

LEAVE YOUR COMMENTS