वायु प्रदूषणया तथ्यांक संकलन व सहज प्रयोगया निंतिं सरोकारवालातय् जोड

येँ – देय्या राजधानी लगायत प्रमुख सहरया वायु प्रदूषणया तथ्यांक व्यवस्थित धंगं संकलन व उकिया सहज रुपं प्रयोग जुइमाःगु खँय् सरोकारवालातय्सं बः बिउगु दु । राजधनीलिसें देय्या प्रमुख सहरय् खने दयाच्वंगु वायु प्रदूक्षणया समस्या समाधानया निंतिं प्राप्त थ्व सम्बन्धी आवश्यक तथ्यांकयात व्यवस्थित धंगं संकलन यायेमाःगु व उकियात व्यवस्थित रुपं प्रयोगय् हयेमाःगु सरोकारावालातय् धापू दु ।

अमेरिकी दूतावासया ग्वाहालिइ स्वच्छ उर्जा नेपालं ग्वसाः ग्वःगु वायु प्रदूषण सम्बन्धी छगू ज्याझ्वलय् उकथंया सरोकार क्यंगु खः । नीति निर्माता, कार्यान्वयन तह व नागरिक–सरकारया निंतिं वायु गुणस्तर सम्बन्धी खुल्ला तथ्यांक विषयय् कार्यशाला गोष्ठिइ सहभागि वातावरण विज्ञतय्सं सन् १९८२ निसें हे वायु प्रदूषणसम्बन्धी तथ्यांक मुंकेगु शुरु याःगु खःसां उकिया सही प्रयोग मजुयाच्वंगु खँय् असन्तुष्टि प्वंकादिल ।

लिसें तथ्यांकया सही प्रयोग मजूगुलिं वायु प्रदूषणया समस्या लिपांगु इलय् झन् तच्वया वनाः विकराल जूगु धासें समाधानया निंतिं सम्बन्धित निकायं मंकाः कुतः यायेमाःगु विचाः प्वंकूगु खः ।गोष्ठिइ येँ महानगरपालिकाया प्रमुख विद्यासुन्दर शाक्यं देय्या राजधानीया वातावरणयात स्वच्छ यानातयेगु जिम्मेवारी हरेक नागरिकया खः धासें याकनं हे वातावरण प्रदूषण म्हो यायेगु निंतिं विद्युतीय सवारी साधन, मोनोरेल संचालन हयेगु निंतिं येँ मनपा लगे जुयाच्वंगु दु धयादिल ।

वय्कलं वायु प्रदूषणया नामय् थीथी अभियान संचालन यानाः उकिया फोटो सामाजिक संजालय् तयेवं जक सहर सफा जुइमखु धासें तुतिइ न्ह्यायेगु लाकांयात वातानुकूलित धंगं छेँय् तयातयेगु व तरकारि लगायत खाद्य पदार्थ, फोहर सतकय् वांछ्वयेगु सोचय् हिउपाः वयेमाःगु आवश्यक जू धयादिल ।

आयोजक संस्थाया कार्यक्रम प्रबन्धक राजन थापां नेपालय् वायु गुणस्तर व्यवस्थापनया निंतिं नीतिगत व्यवस्थासम्बन्धी ज्यापौ न्ह्यब्वयादीगु ज्याझ्वलय् अमेरिकी दूतावासया दक्षिण एसियाया निंतिं वातावरण अधिकृत सारा लिट्कें वायुया गुणस्तरीयता व्यवस्थापनया निंतिं सरोकारवाला निकायतय् दथुइ समन्वय व सूचनाया कालबिल जुइमाःगु खँय् बः बियादिल ।

सम्बन्धित बुखँ

LEAVE YOUR COMMENTS