एकताया अर्थ छु खः ?

दशराज शाक्य

थनथाय् लाक्क एमाले व माओवादी केन्द्र निगू पार्टी दथुइ जूगु एकता तसकं बय्बय् जुयाच्वंगु दु । केपी ओली व पिके दाहाल दथुइ निरन्तर खँल्हाबल्हा लिपा अन्ततः वंगु अनलाथ्व दुतिया (मनमास)कुन्हु हे निगू पार्टीया दथुइ एकता घोषणा जुल । निगू पार्टीया दथुइ जूगु थ्व एकतां व हे पार्टीया निंतिं फाइदा जूसां देय्या समग्र आदिवासी जनजातिया निंतिं थ्व एकतां खास हे छुं फाइदाजनक हसना बी फुगु खनेमंत ।

एमाले व माओवादी केन्द्रया अल्याख कार्यकर्ता दुने सिद्धान्तय् अडान मदुगुलिं असन्तोष व विद्रोह ब्वलंगु खनेदु । एमालेया झलनाथ खनाल, भीम रावल व माओवादी केन्द्रया गोपाल किराँतीं ला खुल्ला रुपं हे थ्व एकतायात कयाः असन्तोष प्वंकूगु जक मखसे विरोधय् प्रतिक्रिया तकं बीगु यानाच्वंगु खः ।

खनाल व रावलं पदीय भागबन्डा पाय्छि मजू धकाः असन्तोष प्वंका वयाच्वंगु खःसा एकीकृत पार्टीया महासचिव पद थःपिंत मलाःगुलिं नं उकथं विरोध याना वयाच्वंगु खः । थ्व खँ न्हापा हे सहमति जुयाः वःगु खःसां व्यवहारिक रुपं कार्यान्वयन धाःसा मजुल । ओली गुटया पक्षधरतय्सं जालसाजी यानाः उगु सहमतियात ध्याकुनय् लाका बिउगु खः ।

अथे हे गोपाल किराँतीं माओवादी केन्द्रया हे पुनर्गठन यायेमाः धकाः सः तयाः पलाःतकं न्ह्याकूगु खः । खनाल व रावल पदीय मामिलाय् गुटबन्दीया शिकार जूगु खने दुसा किराँती समग्र पार्टीया हे पुनर्गठन याना वनेमाःगु पक्षय् दुगु खः । रावल नेपाल कम्युनिष्ट पार्टीया इतिहास सफूया च्वमि नं खः । आखिर छु गथे जुयाः आदिवासी जनजाति व पहिचानया पक्षधरतय् पक्षय् थ्व एकताया हसना मवल ?

पहिचानया सैद्धान्तिक मिखां स्वयेबलय् वास्तविककथं सुं नं कम्युनिष्ट जुइ फुगु खनेमदु । थ्व छगू राजनैतिक कासाया ल्वाभः जक जुयाबिउगु खनेदु । कम्युनिष्ट सिद्धान्तयात व्यवहारय् छ्यलाः जनस्तर व देय्या विकास याइम्ह जक वास्तविक व सच्चा ‘कम्युनिष्ट’ जुइ फइ । गथेकि माओत्से तुङया जीवनी व युद्धया अध्ययन याना स्वत धाःसा गाक्कं थुइका व सीका काये फइ । एमाले व माओवादी केन्द्रया एकताय् कम्युनिष्ट सिद्धान्तया आधारभूत बुँदात छुं नं खनेमदु ।

थ्व छगूकथंया संसदवादी पूँजीवादीतय् एकता जक खः । जातिगत रुपं स्वयेबलय् अवसरवादी ब्रम्हु एकता खः ।साम्यवादी राजनीतिक सिद्धान्त एवं मान्यता व संसदीय लोकतान्त्रि राजनीतिया निपाः ख्वाःपाः थें खनेदुसां कम्युनिष्टया (?) नेतृत्वय् संसदीय अभ्यास खः । कम्युनिष्ट पार्टीया सच्चा सिद्धान्त न्हापांगु प्राथमिकता दुथ्याइसा संसद निगूगु प्राथमिकताय् लाइ ।

यदि संसदयात न्हापांगु प्राथमिकताय् लाकेगु खःसा थ्व एकीकृत पार्टीयात कम्युनिष्ट पार्टी धाये फइमखु, थुकियआत ला लोकतान्त्रिक पार्टी जक धाये फइ । थ्व हे सैद्धान्तिक मतभेद विश्वन्यंकं जुयाच्वंगु खनेदु । पार्टीया जनमुखी ज्याझ्वः व नीतित न्ह्यब्वयाः देय्यात आर्थिक व भौतिक समृद्धिया लँय् यंकेगु लागि ‘कम्युनिष्ट पार्टीया नेतृत्व’ आवश्यक जू वइ ।

संसदं हे ज्याझ्वः व नीतित न्ह्यब्वयेगु धइगु कम्युनिष्ट नेतृत्व व सिद्धान्तय् आधारित जुइ फइमखु । समाजवादय् रुपान्तरण याना यंकगु लागि कम्युनिष्ट पार्टीया हे नेतृत्व आवश्यक जू वइ, संसदया नेतृत्व मखु । छाय्धाःसां संसद व आदिवासी जनजातिया दथुइ स्वापू मदुगु तःधंगु गाः विद्यमान अवस्थाय् स्पष्ट खनेदु । जनताया लागि संसदीय व्यवस्था बिल्कुल हे गलत खः ।

राष्ट्रपति व प्रधानमन्त्री ल्ययेगु वा ल्यज्या यायेगु ज्या कम्युनिष्ट पार्टीया नेतृत्वय् जुइमाः, अथवा जनतापाखें ल्ययेगु याके बीमाः । संसदं ल्यइम्ह राष्ट्रपति व प्रधानमन्त्री गलत पूँजीवादी व सामन्ती नेतृत्वय् रुपान्तरण जूवनाच्वंगु अवस्था न्हाय्कं थें यच्चुक खनेदु । २०३६ सालय् जनमत संग्रह जूबलय् प्रतिनिधिसभा अर्थात सामन्ती संसदीय व्यवस्था दुगुलिं चौथो महाधिवेशन व माले पार्टीं कम्युनिष्ट पार्टीइ सैद्धान्तिक मतभेद दुगु धासें ‘जनमत संग्रह’ बहिष्कार याःगु खः ।

उकथं हे २०३८ सालं जूगु आम निर्वाचनं नं सामन्ती संसदया ख्वाःपाः पुनातःगुलिं कम्युनिष्ट नेता मोहनविक्रम सिंह घर्तीमगरया नेतृत्वय् बहिष्कार अभियान न्ह्याकूगु खः । ‘संसद’ धइगु खँग्वः हे सामन्ती व्यवस्थाया विरोधी जूगुलिं निषेध व बहिस्कृतया संघर्ष जूगु खः । थुकथंया संघर्ष थौंतक नं क्वचाःगु मदुनि । थौंकन्हय् संसद विरुद्ध विप्लव माओवादीं जक संघर्ष यानाच्वंगु अवस्था दु ।

उकुन्हु अनलाथ्व दुतियाकुन्हु जूगु गुगु पार्टी एकता खः, उकिं संसदयात निषेध याइगु छाँटकाँट खनेमदु । सच्चा कम्युनिष्टतय्गु नेतृत्वं संसदया लगाम ज्वने फुगु मदुनि । संसदीय व्यवस्थाय कम्युनिष्टया ख्वाःपालं पुनातःपिनिगु बहुमत जक थ्यंगु दु । अज्याःगु ख्वाःपाः पुनातःपिनिगु कम्युनिष्ट पार्टीया आज्जु व गन्तव्य छु खः धकाः आदिवासी जनतायात जानकारी बीमाः बोध याके फयेकेमाः ।

जनतां ल्यंपिं जनप्रतिनिधित नं कम्युनिष्ट सिद्धान्तं प्रेरित जुइफुगु खनेमदु । कम्युनिष्ट पार्टी धइगु हे जनताया आकांक्षा पलिस्था याइगु व व्यावहारिक जुइमाः । देय् व जनतायात सुखानुभूति याकेमाः । थ्व हे खः वास्तविक जनमुखी कम्युनिष्ट पार्टी ।

# लिखँ ः
यदि मनुखं छुं नं पुचः वा समाज ल्ययेगु खःसा पहिचान दुगु समाज ल्ययेमाः, पहिचान मदुगु समाज छु समाज ? पहिचानयात स्वीकार मयाइगु समाज धइगु भ्रम व भुलभुलैयाया पुचः जक खः । मनूत धइपिं क्रान्तिकारी जुइमाः । सुं मनू अवसरवादी वा न्याक्वाः झंगः जूसा वयात सुनां विश्वास याइ ? विश्वासया हे आधारय् मनूत पुचः व दल दथुइ एकता जुइगु खः । निरन्तरया संघर्ष, आन्दोलन व क्रान्तिं छगू सुसंस्कृत समाज निर्माण यायेफइ ।

अले भ्रमय् लाकीगु पुचःयात नं हिइके फइ । आःया धरातलय् गुगु एकता जुल धइगु बुखँ वःगु दु, थ्व वास्तवय् अवसरवादी, पूँजीवादी व न्याक्वा झंगःतय् पुचलय् ल्वाकज्याः वंगु जक खः पार्टीगत रुपं एकता जूगु मखु । आः हे नं धायेफु थुमिगुपाखें समाजय् हिउपाः हयेगु सोचविचाःया विकास जुइ मखु ।

देशय् लोकतन्त्र, गणतन्त्र जुयाः संघीयता वःगु दुसां थ्व नांजकया खः, थुकिं धाथें समाजय् छुं हिउपाःया अनुभूति वा प्रत्याभूति बी फुगु खनेमदु । महँगी, बेरोजगारी, हत्याहिंसा इत्यादि समस्यां थ्व देय्ग्रस्त जुयाच्वंगु दु । थनया जनतां तसकं दुःख सियाच्वंगु दु । आक्रान्त जुयाच्वंगु दु । थ्व हे खः सत्य, सकसितं दायित्वबोध जुइमा ।

सम्बन्धित बुखँ

LEAVE YOUR COMMENTS