बेलायती मय्जुं नेवाः भासं न्ह्याकादिल ज्याझ्वः

येँ- बेलायतया राजधानी लण्डनय् निक्वःगु ‘नेवाः ल्यांग्वेज एण्ड कल्चर वर्कशप’ जुल । एसओएसए युनिभर्सिटी रसेल स्क्वायरय् एसओएसए नेवार ल्यांग्वेज सोसाइटीया ग्वसालय् उगु ज्याझ्वः जूगु खः । उगु वर्कशप लण्डनय् हे च्वनादीम्ह स्थानीय मय्जु मरिलिनां नेवाः भासं हे न्ववासें सुरु यानादीगु खः । वय्कलं युनिभर्सिटीया विद्यार्थी व पासा पुचः गुथि युकेया दुजःपिंत लसकुस यासें नेवाः भाय्या आधारभूत खँग्वःतय् बारे म्हसीका बियादीगु खः । ज्याझ्वलय् लण्डनय् च्वंपिं स्थानीय बेलायतवासीतय्गु नं उपस्थिति दुगु खः ।

थःगु प्रस्तुतीया झ्वलय् वय्कलं राष्ट्र संघं नेवाः भाय् लोप जुइफु धाःगुलिं थम्हं नं थ्व भाय् ल्यंकेमाः धकाः सयेकागु खँ कनादिल । उगु इलय् यःमरि पुन्हिया बारे जानकारी बिसें यःमरि दयेकाः नयेगु समेत स्यनेगु ज्या जूगु खः । नापं ज्याझ्वः लिपा समय्बजि नकेज्या जूगु खः ।
ज्याझ्वःया निगूगु ब्वय् स्वंगू नेवाः कासा म्हितकेगु ज्या जूगु खः । भाजु सुशील प्रजापतिं धुँ कासा, ध्वंच्वलेचा व कस्सी पाय्चा कासा न्ह्यब्वयादीगु खः ।

अथे हे नेवाःतय् ख्वाःपाः प्याखं व नेवाः संगीत नं अन न्ह्यब्वयेगु ज्या जूगु खः । अन ख्वाःपाः पुनाः ख्वपया भैलः प्याखं नं न्ह्यब्वःगु खः । प्याखं न्ह्यब्वये न्ह्यः भैलः प्याखंलिसे सम्बन्धित ख्वाःपाः, चमर, खड्ग, जाइ घंघला, छुस्या घंघला, पौ, कली, लपुसा, जामा, जनी व फेता न्ह्यःने तयाः उकिया महत्व बारे कनादीगु खः । वय्कलं प्याखं हुलाः न्ह्यब्वसें उकिया हरेक मुद्राया बारे समेत जानकारी बियादीगु खः ।

सम्बन्धित बुखँ

LEAVE YOUR COMMENTS