विश्वकप २०१८

सवारी साधनया राजश्व म्हो यायेत डब्ल्युटिओया दबाब

येँ – विश्व व्यापार संगठनं (डब्ल्युटीआें) नेपाःयात सवारी साधन व इलेक्ट्रोनिक सामानया भन्सार दर क्वकायेत दबाब बिउगु दु । डब्ल्युटीओं उद्योग वाणिज्य तथा आपूर्ति मन्त्रालय मार्फत भन्सार दर क्वकायेत दबाब बिउगु खः । नेपालं डब्ल्युटीओय् याःगु प्रतिबद्धता प्रतिकूल जुइकथं सवारी साधन, इलेक्ट्रोनिक लिसें प्यंगू श्रेणीया पीगू थीथी सामानया भन्सार दर अप्वयेकूगुलिं डब्ल्युटीओं सम्झौता कथं भन्सार दर कायम यायेत दबाब बिउगु खः ।

विज्ञतय् कथं डब्ल्युटीओलिसे नेपालं प्रतिवद्धता प्वंकेधुंकूगुलिं वहे कथं नियम नेपालं माने यायेमाःगु खँ धाःगु दु । वाणिज्य तथा आपूर्ति मन्त्रालयया अधिकारीया कथं गाडी इलेक्ट्रोनिक थीथी सामानय् डब्ल्युटीओया मापदण्ड पालना जुइ मफुगुलिं मन्त्रालयं अर्थ मन्त्रालययात भन्सार दर म्हो यायेत सुझाव बीधुंकूगु दु ।

तर अर्थ मन्त्रालयं धाःसा प्यंगू वस्तुया भन्सार दर अप्वयेकूगुलिं आः मेगु दँनिसें जक डब्ल्युटीओया मापदण्ड कथं भन्सार म्हो याना यंकेगु तयारी यानाच्वंगु दु ।वाणिज्य मन्त्रालयया कथं उच्चस्तरीय सहलह जुयाच्वंगुलिं बजेटय् व्यवस्था जुयाच्वंगु कथं भन्सार दर कायेगु खः कि उकियात संशोधन यानाः लागू यायेगु धइगु निष्कर्ष छन्हु निन्हु लिपा पिहां वइगु खँ धाःगु दु ।

मन्त्रालयया कथं व्यापार घाटा म्हो यायेत भन्सार दर म्हो यायेगु स्वयां डब्ल्युटीओया प्रावधानय् च्वनाः थीथी विकल्प मालेमाःगु खँ धाःगु दु ।डब्ल्युटीओया प्रावधान कथं नेपालं भन्सार दर म्हो याना यंकेमाःगु खः । लिपांगु इलय् भन्सार शुल्क स्वयां नं आन्तरिक राजश्वयात अप्वः बः बियाच्वंगु दु । भन्सारं वइगु राजश्व म्हो जुया वनाच्वंगु दु । नेपालं विस्तारं भन्सार दर शुन्यय् क्वकायेगु तयारी यानाच्वंगु दु ।

सम्बन्धित बुखँ

LEAVE YOUR COMMENTS