विश्वकप २०१८

राष्ट्र भाषाया अवस्थायात कयाः चिउताः

येँ – नेपालय् नवाइगु अप्वःथें राष्ट्र भाषा तना वनीगु अवस्थाय् थ्यने धुंकूगु धासें उकियात कयाः सम्बन्धित सरोकारवालातय्सं ध्यानाकर्षण याकूगु दु । नेपालभाषा क्लब तोखाया ग्वासलय् जूगु ज्याझ्वलय् नवासें राष्ट्र भाषा संकटय् लाना वनाच्वंगु धासें उकिया संरक्षणया निंतिं कुतः न्ह्याकेमाःगु खँय् सचेत याःगु दु ।

ज्याझ्वलय् नवासें नेवाः आन्दोलनया न्ह्यलुवा डा. महेशमान श्रेष्ठं राष्ट्रिय विभूति भगवान गौतम बुद्धया पालि भाय्निसें कयाः लिपांगु इलय् आपालं राष्ट्रभाषा मृत अवस्थाय् थ्यना वनाच्वंगु खँय् चिउताः प्वंकादिल । सन् २०११ य् काःगु नेपाःया जनगणनाकथं नेपालय् १२३ गू भाय् नवायेगु यानाच्वंगु दु । उकी मध्ये खस् भाषा बाहेक अप्वःथें राष्ट्र भाषा संरक्षणया अभावं लोप जुया वनीगु अवस्थाय् थ्यनेधुंकूगु वय्कःया धापू दु ।

देय् संघीय संरचनाय् वनेधुंकूगु अवस्थाय् प्रत्येक प्रदेशया बहुसंख्यक समुदायं नवाइगु राष्ट्र भाषायात विद्यालयस्तरया पाठ््यक्रमय् दुथ्याकेमाः’ डा. श्रेष्ठं धयादिल, ‘थौंकन्हय् लागू याःगु माध्यमिक तहया पाठ््यक्रमयात परिमार्जित याना यंकाः मातृभाषा (राष्ट्र भाषा)यात अनिवार्य यायेमाः ।

लिपांगु इलय् राष्ट्र भाषायात ऐच्छिक विषय दयेकाः प्राविधिक विषयय् नाप समावेश याःगु दु, थुकिं यानाः विद्यार्थीतय्सं राष्ट्र भाषा ब्वनेगु इच्छा दयेक दयेकं नं अध्ययन यायेमखंगु खँय् वय्कलं असन्तुष्टि प्वंकादिल । शिक्षासेवी विद्यादेवी चित्रकारं नं राष्ट्र भाषाया संरक्षण यायेगु खःसा छेँखाछेँखां हे अभियान न्ह्याकेमाःगु खँय् बः बियादिल । अभियानया झ्वलय् राष्ट्र भाषाया प्रयोगयात अवसर बियाः नीतिगत तहय् सही धंगं व्यवस्थापन यायेत नं वय्कलं सुझाव बियादिल ।

नेपाल सरकारं २०७३ भदौ २३ गते विहीवाःकुन्हु गठन याःगु भाषा आयोगयात राष्ट्र भाषा व लिपि सम्बन्धी किवासया मापन यानाः सुझाव बीत धयातःगु दु । नेपाःया संविधानया धारा २८७ य् नं भाषा आयोगया काम, कर्तव्य व व अधिकार उल्लेख यानातःगु दु । थ्व आधारय् नं नेपाःया राष्ट्र भाषा, मौलिक लिपि, संरक्षण व छ्यलाबुलाय् हयेगु खँय् चिउताः क्यनेमाःगु आवश्यक जूगु सरोकारवालातय् धापू दु ।

नेपालभाषा क्लबपाखें भाय् ल्यंकेया निंतिं अभियान न्ह्याकेगु झ्वलय् ग्वसाः ग्वःगु वाक कला, क्षमता अभिवृद्धि प्रशिक्षणय् सहभागि प्रशिक्षार्थीतय्त दसिपौ लःल्हायेगु ज्याझ्वलय् सरोकारवालातय्सं उकथंया चिउताः प्वंकूगु खः । संचारकःमि केके मानन्धरं प्रशिक्षण बियादीगु तालिमय् सहभागि ४५ म्हेसित दसिपौ लःल्हाःगु खः । श्रीकृष्ण मानन्धरया संयोजकत्वय् जूगु तालिमय् स्थानीय जनप्रतिनिधि, शिक्षक, साहित्यकार नापं ल्याय्म्हतय् सहभागिता दुगु खः ।

क्लबं वंगु छुं दँ न्ह्यवंनिसें राष्ट्र भाषा प्रयोगया निंतिं थीथीकथंया जनचेतनामूलक अभियान न्ह्याकेगु झ्वलय् ब्यानर, प्लेकार्डया ब्वज्या, ल्याय्म्हतय् दथुइ अन्तरनिहीत व्यक्तित्व विकास, सम्बन्धित क्षेत्रयात सचेत यायेगु, लगायतया ज्याझ्वःत याना वयाच्वंगु क्लबया नमस्ते साय्मिं जानकारी बियादिल । ज्याझ्वलय् क्लबपाखें कचा विस्तार यायेगु नापं कचापाखें नं थीथी गतिविधि याना वयाच्वंगु जानकारी बिउगु खः ।

सम्बन्धित बुखँ

LEAVE YOUR COMMENTS