विश्वकप २०१८

स्वइच्छां याःगु दान जक दान जुइ

दान थःगु इच्छा कथं याइ । गच्छे कथं बी । गुलिसिनं जाकि छम्हू दान बी । गुम्हसिनं वसः छजु बी । तर गुलिसिनं थःगु दक्व श्रीसम्पत्ति दान बी । थ्व परम्परा थौंया जक मखु । कालान्तर न्ह्यवंनिसेंया खः । अझ बुद्ध शिक्षाय् ला दानया तःधंगु महत्व दु । बुद्धकालय् जक मखु बोधिसत्वपिनि इलय् नं दान बीगु परम्परा दु ।

बोधिसत्वपिंसं थःगु श्रीसम्पत्ति दान यात । काय् म्ह्याय् दान यात । थःगु अंग प्रत्यंग दान यात । थुलि जक मखु जीवन तकं दान यात । बुद्धकालय् नं अनाथपिण्डिक महाजनं जेतवन विहार दान यात । विशाखा पूर्वाराम विहार दान यात । अझ न्हियान्हिथं तथागत नापं संघयात भोजनदान याइपिं म्वः म्वः दु । भोजन दान यायेत थःगु सर्वश्व बीत तकं तयार ।

थम्हं मफुसा थः सन्तानयात तकं ज्याखँ ब्वइगु नं याः । बुद्धकालय् छम्ह बुराम्ह हजामं थथे हे यात । छगू इलय् छम्ह बृद्ध हजाम प्रवजित जुल । वया निम्ह कायपिं दु । भिक्षुया तथागतयात भोजन याकीगु इच्छा । उकिं भिक्षुं थः कायपिंत गामय् सँ खाकेगु ज्याय् छ्यल । हजामं मुंगु ध्यबां तथागतयात भोजन याकीगु खँ सकसिनं सिल । अले सँ चाये म्वाःपिं नं सँ चाः वल ।

थुकिं यानाः माःगु स्वयां अप्वः मुन । थुकथं थःगु आस्था व विश्वास कथं जक दान यायेगु खः । विशाखा उपासिकां नं थःगु मूवंगु तिसाया मू तल । मेपिं सुनानं तिसा न्याये मफुत । उकिं विशाखा थम्हं मू तयाः तिसा न्याना काल । उकी हानं गुंगू कोटी दां तन । मुक्कं वःगु दामं पूर्वाराम विहार दयेकल । विहार दयेके क्वचायेवं तथागत नापं संघयात विहार दान यात ।

माःगु इलय् माःकथं दान यायेगु हे दकलय् तःधंगु दान जुइ । बुद्धकालय् तथागत बुद्ध जुइगु लँपुइ विहार मदु । थुगु खँ अनाथपिण्डिक महाजनं सिल । महाजनं बिहारया लागिं ल्वःगु थाय् माला जुल । थुकिया लागिं गां स्वयाः सतीगु थाय् नं मखु । तापाःगु थाय् नं मखु । विहार वये न्ह्याःपिनि लागिं अःपुगु व हुलमुल म्हो जक जुइगु, होहल्ला मजइगु, एकान्त, ध्यान याये योग्यगु थाय् माल जुल ।

दान यायेत छुं कथं साइत स्वयेम्वाः । तिथिमिति चूलाके माःगु मदु । थुकी छुं निश्चित दिंया लागा नं मदु । माःगु इलय् माः कथं यायेगु दान दकलय् तःधंगु दान खः । थुकिं तःधं चीधं धाइ मखु । आपाः म्हो धकाः लनी नं मखु । अले दान बियाः थःत छु लबः दत धकाः मालेगु ज्या नं याइ मखु ।

श्रावस्तीइ थुकथंया थाय् मामां वंबलय् जेतकुमारया आम्रवन ल्वःगु थाय् कथं काल । तर जेतकुमार धाःसा थःगु आम्रवन मीत तयार मजू । वयात गुलि धालं नं व माने मजू । उखे अनाथपिण्डिक महाजनं नं वहे कायेगु धकाः जिद्दी यात । जेतकुमारं धाःसा जमीनय् दक्व लुँ लाःसां नं मी योग्य मजू धाल । थ्व न्यनाः अनाथपिण्डिकं जमिन थःगु जुल धाल ।

महाजनं गाडां लुँ ल्ह्यया हल । जमीनया छचालं लुँ लाना बिल । आम्रवन छचालं असर्फीया असर्फीं जाल । जेतकुमारं थ्व खँ सिल । अन्तय् असर्फी लाये मलाःगु छकूचा ल्यन । कुमारं व छकू तथागतयात थःगु नामं दान बिल । मेगु दक्वं महाजनं कुमारयाके न्याना काल । जेतकुमारं दान बिउगु छकू कुचाया सम्मान यासें बिहारया नां हे जेतवन विहार धकाः जू वन ।

खय्त ला महाजनं जमीनय् गुंगू कोटीया असर्फी लाःगु खः । गुंगू कोटी खर्च यानाः बिहार दयेकल । अले उलि हे खर्च यानाः संघयात दान बिल । अय्नं छकूचा उद्यान दान याःम्ह जेतकुमारया नामं हे बिहारया नां तल । खय्त ला थुलि हे दान यायेमाः धइगु मदु । मन क्वसायेकाः दान यायेगु हे तःधंगु ज्या खः ।

श्रद्धा ब्वलन कि थःत अतिकं यःगु वस्तु तकं त्याग यायेफु । बुद्धकालय् तेलप्पुनाली नांया गां दु । अन न्हापा अतिकं तःमिम्ह सुन्दरी छम्ह दु । तर लिपा व गरीब जुल । वया ताःहाकःगु बांलाःगु सँ दु । उगु सँ नगरया सेठया म्ह्याचं न्यायेगु इच्छा यात । उकिं सँ न्यायेगु धकाः उगु सँया मू तल । तर वं थःगु सँ धाःसा मीत तयार मजू । छन्हु वं भिक्षुपिंत भोजनया लागिं थःगु छेँय् सःतल । वयाके ध्यबा मदु । उकिं वं धाइयात सतल ।

अले थःगु सँ उम्ह हे सेठया म्ह्याय्या लागिं मीत तयार जुल । न्हापा उगु सँया लागिं सलंसः कर्षापण बी धाःगु । तर आः वयाः च्यागू कर्षापण जक बी धाल । भिक्षुपिंत भोजन याकेगु धकाः तयारी यायेधुंकल । उकिं वं थःगु सलंसः वंगु सँ च्यागू कर्षापण जक कयाः जूसां मीत तयार जुल । सँ चानाः मिया छ्वत । उकिं वःगु दामं भोजन दान यात ।

आस्था मंत कि धाःसा थःके न्ह्याक्व हे दःसां दान याइ मखु । थःके दु धायेवं दान याइ धइगु मदु । बुद्धकालय् राष्ट्रपाल नांया छगू गां दु । उगु गांया मुखियाया छम्ह याकः काय दुुगु जुयाच्वन । छन्हु कायम्हं प्रवजित जुइगु इच्छा यात । तर याकः काय जूगुलिं मुखियां अनुमति मबिउ । तर कायया जिद्दीं यानाः मां अबुं अनुमति बिल । प्रवजित लिपा रठ्ठपाल भिक्षु जुल । छुं दिं लिपा हे उम्ह भिक्षु अरहत नं जुल ।

अनंलि वं मांबौ नाप लाःवनेगु इच्छा यात । थः काय प्रवज्जित जुयाः वंगुलिं मुखियायात प्रवजित जूपिं धइपिं हे स्वये हे मयःगु जुयाच्वन । सुं भिक्षा वःसां वं गबलें छुं दान नं याइ मखु । रठ्ठपाल भिक्षु भिक्षाया लागिं छेँय् वन । मुखियां ‘थज्याःम्ह मुण्डे श्रवणं जिमि काय यंकल’ धकाः ब्वः बिल । भिक्षु जुया वःम्ह मनू थः हे काय खः धकाः वं म्हमसिल ।

उगु हे इलय् दासीं बासीगु केँ वांछ्वया हल । भिक्षुं धाल– ‘वांछ्वयेगु पलेसा थ्व पात्रय् तया बिउ ।’ दासीं बासिगु केँ पात्रय् तया बिल । दान धइगु थःगु गच्छे कथं याइ । आस्था कथं बी । दान यायेत छुं कथं साइत स्वयेम्वाः । तिथिमिति चूलाके माःगु मदु । थुकी छुं निश्चित दिंया लागा नं मदु । माःगु इलय् माः कथं यायेगु दान दकलय् तःधंगु दान खः ।

थुकिं तःधं चीधं धाइ मखु । आपाः म्हो धकाः लनी नं मखु । अले दान बियाः थःत छु लबः दत धकाः मालेगु ज्या नं याइ मखु । अथवा, उगु दानं यानाः थःगु गुलि खर्च जुल धकाः ल्याःचाः यायेगु ज्या नं जुइ मखु । यदि ल्याःचाः तयाः, द्याःत्याः स्वयाः दान यायेगु खःसा व दान मखु मिथ्याचार जक जुइ ।

सम्बन्धित बुखँ

LEAVE YOUR COMMENTS