कोरियाली प्रायद्वीपय् निःशस्त्रीकरणया सहमति

उत्तर कोरियाली नेता किम जोङ अन निःशस्त्रीकरणय् वनेत सहमत जूगु दु । थौं सुथय् अमेरिकी राष्ट्रपति डोनाल्ड ट्रम्प लिसे जूगु शिखर वार्ता लिपा निम्ह नेतातय्सं कोरियाली प्रायःद्वीपय् बुलुहुँ निशस्त्रीकरण याना वनेगु सहमति याःगु खः । निःशस्त्रीकरण वनकि उत्तर कोरियाया सुरक्षाया ग्यारेन्टी अमेरिकां काइगु जूगु दु ।

निम्ह नेता दथुइ कोरियाली प्रायद्वीपय् निःशस्त्रीकरणया सहमति जूसां गुबलय् तक यायेगु, गुकथं यायेगु धयागु छुं खँ मजूगुलिं थुगु वार्ताय् ठोस रुपं छुं लिच्वः पिहां मवःगु राजनीतिक विश्लेषकतय्सं धाःगु दु ।

शिखर वार्ता लिपा पितबिउगु विज्ञप्तिइ धयातःगु दु, ‘उत्तर कोरियाली नेता किम जोङ अन कोरियाली प्रायःद्वीपय् निशस्त्रीकरणया निंतिं प्रतिद्धता प्वंकादीगु दु । थुकिया निंतिं राष्ट्रपति ट्रम्पं उत्तर कोरियाया सुरक्षाया जिम्मा काःगु दु ।
निम्ह नेता दथुइ जूगु प्यंगू बुँदाया सहमति –

१. शान्ति व समृद्धिया लागि निगुलिं देय्या जनताया चाहना कथं संयुक्त राज्य अमेरिका व प्रजातान्त्रिक गणतन्त्र कोरिया (उत्तर कोरिया) दथुइ न्हूकथं स्वापू स्थापना यायेत प्रतिबद्ध दु ।

२) अमेरिका व उत्तर कोरिया निगुलिं देशं कोरियाली प्रायद्वीपय् स्थिर व शान्त व्यवस्था निर्माणया निंतिं थःथःगु थासं कुतः याइ ।

३. सन् २०१८ अप्रिल २७ य् पान्मुनजोन सम्झौतायात पुनःपुष्टि यासें उत्तर कोरिया कोरियाली प्रायद्वीपया सम्पूर्ण निःशस्त्रीकरणया निंतिं ज्या यायेत प्रतिबद्ध दु ।

४. संयुक्त राज्य अमेरिका व उत्तर कोरिया युद्धबन्दीत व तनाच्वंपिं मालेत प्रतिबद्ध दु व लुइधुंकूपिं युद्धबन्दीतय्त तुरुन्त थःथःगु देशय् लित छ्वइगु जुइ ।

याकः याकः वार्ता
अमेरिकी राष्ट्रपति ट्रम्प व उत्तर कोरियाली नेता किम जङ अनं सहमतिइ हस्ताक्षर याये न्ह्यः याकःयाकः भेटवार्ता याःगु खः । याकःयाकः वार्ता याये न्ह्यः पत्रकारतलिसे खँ ल्हासें ट्रम्पं बांलाःगु स्वापू कायम जुइगु आशा प्वंकूगु खःसा किमं थीथी पंगःत चीकाः थन तक थ्यंगु प्रतिक्रिया बिउगु खः ।
याकःयाकः वार्ता न्ह्यः सिंगापुरया पर्यटकीय टापु सेन्टोसाय च्वंगु कापेला होटलय् निम्हं नेतातय्सं ल्हाः मिले याःगु खः । थःथःगु देय्या ध्वाँय् क्वय् च्वनाः निम्हं नेतातय्सं वं वयागु वं वयागु जन्हुफातय् धाप मारे यानाः अंकमाल याःगु खः । अले निम्ह नेतातय्सं थः अनुवादकतय ग्वाहालिं छुं खँ ल्हाये धुंकाः याकःयाकः वार्ता यायेत होटलया पुस्तकालयय् वंगु खः ।

सम्बन्धित बुखँ

LEAVE YOUR COMMENTS