विश्वकप २०१८

योजना न्हूगु सहरया, ज्या गनं मजू

सरकारं देय्न्यंकं हे पीगू आधुनिक सहर व व्यवस्थित बस्ती निर्माण यायेगु योजना न्ह्यःने हःसां नं प्रगतिया ल्याखं धाःसा अज्याःगु परियोजना प्रभावकारी रुपं न्ह्याः वने फयाच्वंगु मदु । सरकारं आर्थिक दँ ०६७÷६८ निसें मध्यपहाडी राजमार्गय् लाःगु १० सहरया छनोट यानाः न्हूगु सहरया रुपय् विकास यायेगु लक्ष्य काःगु खः । तत्कालीन न्यागू विकास क्षेत्रया निगू निगू बस्तीया छनोट यानाः ज्या न्ह्याकूगु खः।

तर अज्याःगु आयोजनाया ज्या धाःसा कछुवा गतिं न्ह्याः वनाच्वंगु सीदुगु दु । उपिं परियोजनाया निंतिं १० गू आयोजना ज्याकू तकं स्थापना याःगु खः । भौतिक व वित्तीय प्रगतिया मात्रा धाःसा प्रभावकारी, विश्वस्त व अपेक्षित खने दयाच्वंगु मदु । अथे हे सरकारं आर्थिक दँ २०७३÷७४ य् सुर्खेतया भेरी गंगा उपत्यका व प्यूठानया भिंग्रीयात न्हूगु सहरया रुपय् विकास यायेगु योजना न्ह्यःने हःगु खः । तर थुगु परियोजनाया ज्या न्ह्याः वने फयाच्वंगु मदु ।

उगु हे आर्थिक दँय् तराई मधेशया हुलाकी राजमार्गय् लाःगु १० गू बस्ती व तराई मधेशया न्यागू बस्तीयात न्हूगु सहरया रुपय् विकास यायेगु ज्याझ्वःयात बजेटय् तकं दुथ्याकूगु खः । सरकारं सघन सहरी विकास ज्याझ्वः अन्तर्गत तराईया १८ गू नगरपालिकाय् ५० करोडया सहरी सतक निर्माण, धः, बसपार्क, हात बजाः, पुखू, मनोरञ्जन पार्कया निंतिं फ्याःगु बजेट तकं खर्च जुइ फयाच्वंगु मदु ।

महालेखा परीक्षकया प्रतिवेदनय् तकं २१ गू प्याकेजया ठेक्का ५ गू अर्ब ३६ गू करोड तकाय् सम्झौता जूगु व ३० गू प्यकेजया २५ गू अर्ब ९७ गू करोडया ठेक्का सम्झौता जुइ मफुगु खँ न्ह्यथनातःगु दु । उगु हे प्रतिवेदनकथं हुलाकी राजमार्गय् १० गू न्हूगु सहरया थाय्या पहिचान, विस्तृत परियोजना प्रतिवेदनया तयारी व पूर्वाधार निर्माण यायेगु धाःसां नं पहिचान जूगु सहरया गुगुं नं प्राविधिक तयारी तकं जुइफुगु मदुनि ।

पूर्वाधार निर्माणया ज्या जुइ फयाच्वंगु मदु । गोरखाया पालुंगटारयात स्मार्ट सिटी दयेकेगु योजना नं गुरुयोजनाया अभावं न्ह्याः वने फयाच्वंगु मदु । थ्व स्वयां न्ह्यःया ज्याझ्वःया अवस्था हे थातिं लानाच्वंगु इलय् सरकारं हाकनं २०७४ असार २८ गते थप १० गू सहरयात स्मार्ट सिटीया रुपय् विकास यायेगु निर्णय यात । लिपांगु इलय् याःगु निर्णयया तकं आतक खने दयेक छुं ज्या जूगु मदुनि ।

सहरी विकास तथा भवन निर्माण विभाग न्हूगु सहर आयोजना समन्वय ज्याकूया कार्यक्रम निर्देशक पराग कायस्थया कथं योजनावद्ध रुपं सहरीकरण यानाः केन्द्रया रुपय् विकास यायेगु व प्रत्येक न्हूगु सहरय् छगू लाखतक जनसंख्या थ्यंकेगु निंतिं आवश्यक पूर्वाधार विकास यायेगु लक्ष्य कयातःगु दु ।

ततःधंगु सहरी क्षेत्र तराई व कृषि योग्य उपत्यकाय् जुइ फुगु बसाइँ सराइयात नियन्त्रण यायेगु, उगु क्षेत्रपाखें बसाइँ सराइ याःपिं परिवारयात आकर्षित यायेगु, कृषि, पर्यटन, शैक्षिक व औद्योगिक क्षेत्रया विकास व प्रवद्र्धन यानाः आर्थिक क्रियाकलाप यायेगु सरकारया लक्ष्य दुगु कायस्थं कनादी ।

सरकारं पाँचथरया फिदिम, ते¥हथुमया बसन्तपू, सिन्धुलीया खुर्कोट, धादिङया बैरेनी–गल्छी, बाग्लुङया बुर्तिबाङ, अछामया साँफेबगर, तनहुँया डुम्रे, रुकुमया चौरजहारी, दैलेखया राकम कर्णाली, बैतडीया पाटन, प्यूठानया भिंग्री, सुर्खेतया भेरीगंगायात मध्यपहाडी राजमार्ग अन्तर्गतया १० गू न्हूगु सहर निर्माण यायेगु लक्ष्य तःगु खः ।

अथे हे हुलाकी राजमार्गमध्ये झापाया गौरीगञ्ज, मोरङया रंगेली, महोत्तरीया मनरा, सर्लाहीया ब्रह्मपुरी, रौतहटया भोलापुर व कटहरिया, बाराया महागढीमाई, बर्दियाया राजापुर, कैलालीया भजनी व कञ्चनपुरया बेलौरीलाई स्मार्ट सिटी शहर दयेकेगु लक्ष्य कयातःगु दु ।

थुकथं हे तराई मधेशया न्यागू सहरय् सप्तरीया शम्भुनाथ, महोत्तरीया बलवा, सर्लाहीया ईश्वरपुर, नवलपरासीया बर्दघाट व दाङया गढवा दुसा स्मार्ट सिटीया रूपय् लुम्बिनी, पालुङ, निजगढ, धनकुटा, मिर्चैया, चन्द्रपुर, काभ्रे उपत्यका, भरतपुर, वालिङ, दुल्लु, अमरगढी, तुल्सीपुर र टीकापुरयात छनोट यानातःगु खः ।

न्हूगु सहर आयोजना समन्वय ज्याकुथिं बजेटया अभावं ज्या जुइ मफुगु स्वीकार याःगु दुसा दँय्दसं न्हूगु थप जुयाच्वंगु सहर आयोजना नं कार्यान्वयन जुइ फयाच्वंगु मदु ।

सम्बन्धित बुखँ

LEAVE YOUR COMMENTS