ख्वपय् अन्तर्राष्ट्रियस्तरया रंगशाला

सरकारं ख्वपय् ५० हजार दर्शक क्षमताया अन्तर्राष्ट्रियस्तरया रंगशाला निर्माण याइगु जूगु दु । १००० निसें १५०० रोपनी क्षेत्रफलया जमिनय् दयेकीगु रंगशालाया निंतिं जग्गा छनोट यायेत्यंगु खः । प्रतिनिधिसभा सदस्य लिसें पुलांम्ह उद्योगमन्त्री महेश बस्नेतया कुतलय् जिल्लाया प्रदेशसभाया सदस्य, सरोकारवाला व युवा तथा खेलकुद मन्त्रालय, भूमि सुधार मन्त्रालय, सहरी विकास मन्त्रालयया उच्चस्तरीय प्रतिनिधि दथुइ तःक्वःतक जूगु सहलह व जग्गा अनुगमनलिपा सरकारं रंगशाला निर्माण क्षेत्रया पहिचान यानाः ज्या न्ह्याकूगु खः ।

सूर्यविनायक नगरपालिका–१० नं वडाया पलाँसे व चाँगुनारायण नगरपालिका वडा नं. ९ स्थित ताथलीया जग्गाय् रंगशाला निर्माणया निंतिं प्रारम्भिक अध्ययन क्वचाये धुंकूगु काठमाडौं उपत्यका विकास प्राधिकरणया नायब विकास आयुक्त नापं जग्गा पहिचान, अध्ययन व छनोट कार्यदलया सहसंयोजक नवराज प्याकुरेलं जानकारी बियादिल ।

जेठ मसान्तया दुने कार्यदलं तयार याःगु प्रारम्भिक प्रतिवेदन सरकारयात लःल्हायेगु जुइ धासें प्याकुरेलं सूर्यविनायक व चाँगुनारायणया न्यागू वडायात न्हूगु नगर योजना (इशान) ज्याझ्वः अन्तर्गत विकास यायेकथं सार्वजनिक जग्गाया पहिचान यानागु जानकारी बियादिल ।

वय्कःया कथं रंगशाला निर्माण याइगु जग्गा अधिकरण यायेगु व अधिकरण याःगु जग्गाया जग्गाधनीयात न्हूगु नगर योजना अन्तर्गत व्यवस्थित आवास व जग्गाय् स्थानान्तरण याइगु जूगु दु । रंगशाला निर्माणया निंतिं न्हूगु नगर योजना अन्तर्गत चाँगुनारायणया वडा नं. ८ व ९ व सूर्यविनायक नगरपालिकाया वडा नं. ८, ९ व १० यात ल्यःगु दु ।

.उगु क्षेत्रय् च्वंगु सार्वजनिक जग्गायात व्यवस्थित जग्गा व आवासया रुपय् विकास यानाः अधिकरण याःगु जग्गाया जग्गाधनीयात लःल्हाइगु जूगु दु । प्रतिनिधिसभा सदस्य बस्नेतं रंगशाला दयेकेगु निंतिं पहिचान जुइधुंकूगु जग्गा व्यवस्थित यानाः ‘ल्याण्ड पुलिङ’मार्फत उकिया उचित मुआब्जा बीगु व विस्थापित जुइगु अवस्थाय् थ्यंपिं वासिन्दाया हकय् छेँ दनाः बसोबाससहितया स्थानान्तरण यायेगु योजना दुगु कनादिल ।

रंगशाला दयेकीगु क्षेत्रय् च्वंगु छेँ व अगः चिइकीगु जूगु दु । सरकारं रंगशाला निर्माणया निंतिं युवा तथा खेलकुद मन्त्रालयया सहसचिव अणप्रसाद न्यौपानेया संयोजकत्वय् भूमिसुधार मन्त्रालयया उपसचिव लक्ष्मीप्रसाद भट्टराई सदस्य सचिव, काठमाडौं उपत्यका विकास प्राधिकरणया नायब विकास आयुक्त प्याकुरेल सहसंयोजक, सहरी विकास मन्त्रालयया उपसचिव, राष्ट्रिय खेलकुद परिषद्या इन्जिनियर, निगुलिं नगरपालिकाया प्रमुख व सम्बन्धित वडाया वडाअध्यक्ष दुथ्याइकथं झिंन्याम्हेसिया जग्गा पहिचान व छनोट समिति गठन यानाः ज्या न्ह्याकूगु दु ।

युवा तथा खेलकुद मन्त्रालयं उगु समितियात जेठ मसान्ततकया दुने जग्गा छनोट यायेत, जग्गाय् छुं कथंया विवाद दुसा उकियात क्वचायेकेत, कुल क्षेत्रया नक्सांकन यायेत, सार्वजनिक व पर्ति जग्गायात छुटे यायेत, छेँ गुलि दु आदि दक्वं अध्ययन व अनुगमन यानाः उकिया रिपोर्ट लःल्हातयेत निर्देशन बिउगु दु ।

अन्तर्राष्ट्रियस्तरया रंगशाला वइगु स्वदँया दुने निर्माण यायेकथं ज्या न्ह्याकीगु जूगु दु । उगु रंगशालाय् स्वंगू खेल मैदानमध्ये छगू अन्तर्राष्ट्रियस्तरया कासा संचालन जुइसा मेगु निगुलिइ धाःसा राष्ट्रियस्तरया कासा संचालन यायेगु योजना दु । ५० हजार दर्शक क्षमता दइगु रंगशालाय् २५ हजार मोटरसाइकल व १० हजार प्यचाः घःचाः दुगु सवारी साधन पार्किङ याये फइगु कथंया जुइसा मेमेगु नं आपालं थीथी भौतिक पूर्वाधार तकं निर्माण जुइगु चाँगुनारायण नगरपालिकाया प्रमुख सोमप्रसाद मिश्रं जानकारी बियादिल ।

खेलकुदमन्त्री जगतबहादु विश्वकर्मां ख्वप जिल्लाया निगू थासय् अन्तर्राष्ट्रियस्तरया रंगशाला निर्माणया निंतिं आवश्यक जग्गाया पहिचान जुइधुंकूगु जानकारी बियादिल । वय्कलं जग्गा प्राप्तिया निंतिं प्रक्रिया नं न्ह्यायेधुंकूगु जानकारी बियादिसें जग्गा प्राप्त जुइवं रंगशाला निर्माणया निंतिं बोलपत्र आह्वान यायेगु जुइ धयादिल । सरकारं आर्थिक दँ २०७५÷७६य् खेलकुदया निंतिं जक स्वंगू अर्ब न्हय्न्यागू करोड तका दां विनियोजन याःगु दु ।

सम्बन्धित बुखँ

LEAVE YOUR COMMENTS