विश्वकप २०१८

बटुक भैरव बचे यायेत नाराबाजी व ज्ञापनपौ

यल- सतक विस्तारया नामय् थनया वटुक भैरव देगः समेत अतिक्रमण यायेत स्वःगु विरुद्ध म्हिगः स्थानीय जनता व सम्पदाप्रेमितय्सं देगःया पिनेसं च्वनाः प्रदर्शन यात । प्रदर्शनकारीतय्सं अन १५ मिनेट ति चक्का जाम समेत याना बिउगु खः । लिसें उमिसं अन हे दनाः ‘सम्पदा झीगु प्राण खः’, ‘विकास मखु विनाश खः’, ‘देगः थुने दइ मखु’, ‘उपत्यका विकास प्राधिकरण खारेज या’ धकाः नाराबाजी नं याःगु खः ।

लगंख्यःनिसें सातदोबाटो तकया सतक २२ मिटर तब्या यायेगु ताः तयाः अन हानं डोजर चले याःगु खःसा वंगु विहीवाः देगःया खालीगु थाय् नं प्रयोग यायेगु ताः तयाः पःखाः थुनेगु कुतः जूगु खः । तर स्थानीय जनताया विरोधं यानाः पःखाः थुनेगु ज्या रोके जुल । म्हिगः वहे विरोधयात जारी यासें नाराबाजी व प्रदर्शन याःगु खः ।

प्रदर्शन लिपा अनंनिसें यल महानगरपालिका तक ¥याली पिकयाः मेयर चिरिबाबु महर्जनयात छगू ज्ञापनपौ नं लःल्हाःगु खः । मेयर महर्जनं ज्ञापनपौ लःल्हाना कासें वटुक भैरव देगःया पःखाः थुनेगु लागिं महानगरपालिकायाके छुं हे कथंया अनुमति काःगु मदुसा थुने न्ह्यः जानकारी नं बिउगु मदु, उकिं थम्हं थ्व पःखाः थुंके बी मखु धकाः बचं बियादिल ।

लिसें अन सर्वसाधारण जनताया छेँ थुनेगु लागिं जूगु कुतःया बारे सम्बन्धित निकायया पदाधिकारीयात थःगु ज्याकुथी सःताः पीडित समेत न्ह्यःने तयाः वार्ता याकेगु बचं नं बियादिल । सरकारं स्थानीय जनताया छेँ बुँ लिपा आः सम्पदा समेत नष्ट यायेत्यंगुलिं थुकियात गम्भीर रुपं काःगु दु ।

सम्बन्धित बुखँ

LEAVE YOUR COMMENTS