निक्षेप स्वयां १६ प्रतिशत अप्वः त्यासा

येँ चालु आर्थिक दँया मंसिरतक बैंकं निक्षेप संकलन स्वयां अप्वः त्यासा लगानी याःगु दु । नेपाल राष्ट्र बैंकं सार्वजनिक याःगु चालु आवया न्यालाया दुने बैंक व वित्तीय संस्थां १६.१ प्रतिशत अप्वः त्यासा लगानी याःगु खः ।निक्षेप संकलन धाःसा १२.७ प्रतिशत जक दु । निक्षेपया तुलनाय् बैंक व वित्तीय संस्थां ३.४ प्रतिशत अप्वः त्यासा बिउगु खँ राष्ट्र बैंकं धाःगु दु । निक्षेप संकलन स्वयां त्यासा बीगु अप्वगुलिं आः राष्ट्रिय वाणिज्य बैंक व नेपाल बैंक बाहेक अप्वः धयाथें कर्जा–निक्षेप– कर्जा–पुँजी–निक्षेप अनुपात (सिसिडी रेसियो) ८० प्रतिशत लिक्क थ्यंगु दु ।

मंसिरतक बैंकं १ खर्ब ३८ अर्ब ९ करोड तका त्यासा बिउगु दु । अथेहे निक्षेप परिचालन १ खर्ब ५ अर्ब ९४ करोड तका जक याःगु दु । न्यालाया दुने निक्षेप संकलन स्वयां ३३ करोड तक अप्वः त्यासा बिउगु दु । छुं बैंकया तरलता असहजता खने दुसां नं मुक्कं वित्तीय प्रणालीइ तरलताया अवस्था सुविधाजनक दुगु राष्ट्र बैंक धाःगु दु । वइगु न्हिं सरकारी खर्च अप्वयेवं मुक्कं वित्तीय बजाः सहज जुयाः वनीगु राष्ट्र बैंकया अनुमान दु । बैंक व वित्तीय संस्थां कायम यायेमाःगु सीसीडी अनुपात स्पष्ट अडान व खुला बजार कारोबार व ब्याजदर करिडोरपाखें सतहीय रुपं तरलता प्रवाह यानागुलिं ब्याजदरय् स्थायित्व खनेदुगु राष्ट्र बैंकया धापू दु ।

वित्तीय स्थायीत्वया अंकुशया रुपय् दुगु कर्जा–पुँजी–निक्षेप अनुपातया सम्बन्धय् नेपाल राष्ट्र बैंकं नालाकाःगु नीति त्यासा जोखिम नियन्त्रणया लिसें निक्षेप अप्वयेकेत ग्वाहालि जुइगु खँ धाःगु दु । राष्ट्र बैंकया कथं मंसिरतक बैंक व वित्तीय संस्थाया निक्षेप परिचालन २४ खर्ब ८१ अर्ब ५ करोड थ्यंगु दु । कर्जा लगानी २१ खर्ब २४ अर्ब ३२ करोड थ्यंगु दु । थुगु ईया दुने व्यक्तिगत निक्षेप १३ खर्ब २० अर्ब ९६ करोड थ्यंगु दु । समीक्षा अवधिइ वाणिज्य बैंकं निजी क्षेत्रय् प्रवाह याइगु त्यासा ७.२, विकास बैंकया १२.२ व वित्त कम्पनीया १.९ प्रतिशत अप्वःगु दु ।

बैंक व वित्तीय संस्थां लगानी यानाच्वंगु त्यासा मध्ये ६१.९ प्रतिशत छेँबुँ ब¥हः तयाः व १४ प्रतिशत त्यासा चालू सम्पत्ति धितोय् कयाः त्यासा बियाच्वंगु दु । समीक्षा ईया दुने बैंक व वित्तीय संस्थापाखें प्रवाहित ट्रस्ट रिसिट (आयात) त्यासा ४८.९ प्रतिशत अथे धइगु ३१ अर्ब ५८ करोडं थहांवनाः ९६ अर्ब ११ करोड थ्यंगु दु । न्हापांगु दँय् उगु ईया दुने थज्याःगु त्यासा ७.९ प्रतिशतं अप्वःगु खः । समिक्षा ईया दुने बैंक व वित्तीय संस्थापाखें प्रवाहित हायर पर्चेज त्यासा ४.७ व ओभड्राफ्ट त्यासा ४.३, रियल स्टेट त्यासा (व्यक्तीगत छेँ त्यासा सहित) ५.१ प्रतिशतं अप्वःगु दु ।

सम्बन्धित बुखँ

LEAVE YOUR COMMENTS