तरकारीइ विषादी म्हो खनेदुसां धुक्क जुइफुगु अवस्था मदु

येँ – बजारय् वयाच्वंगु तरकारी व सिसाबुसाय् विषादी छ्यलीगु म्हो जुया वनाच्वंगु दु । कृषि विभागया अधिकारीतय्सं स्वनिगःया बजारय् वयाच्वंगु तरकारी व सिसाबुसाय् विषादी म्हो जक जुया वनाच्वंगु धाःसां उपभोक्ता अधिकारीकर्मीतय्सं धाःसा विषादी म्हो धाःसा धुक्क जुयाः नयेफइगु अवस्था मदुनि धाःगु दु ।

कृषि विभागया अधिकारीतय्सं नेपालय् तरकारी व सिसाबुसाय् विषादी छ्यलीगु म्हो जुया वनाच्वंगु खँ धाःगु खः । तर उपभोक्ता अधिकारकर्मीतय्सं धाःसा कृषि विभागं याइगु परीक्षण पूवंगु परीक्षण मखुनिगुलिं धुक्क जुइफइगु अवस्था मदुनि धयाच्वंगु दु ।

कृषि विभागया बाली संरक्षण निर्देशनालयं वंगु खुला दुने येँया कालिमाति तरकारी बजारय् वःगु तरकारीया नमूना परीक्षण यानाबलय् विषादीया छ्यलाबुला म्हो जुया वनाच्वंगु खनेदुगु खँ धाःगु दु । न्हापा न्हापा स्वयां थौंकन्हय् नेपालय् तरकारी छ्वाकीगु वासः म्हो जक हानिकारक वासः आयात जुइगुलिं विषादीया अवशेष म्हो खनेदुगु खँ निर्देशनालयया अधिकारीतय्सं धयाच्वंगु खः ।

तरकारीइ छ्यलीगु विषादीया मापन उकिं मस्तिष्कपाखें पिहां वइगु कोलिनिस्टिरेस नांया इन्जाइम विकासय् गुलि तक पंगः थनी धयागु ‘इन्हिबिसन’यात स्वयाः याइगु खः । यदि तरकारी परीक्षण यायेबलय् इन्हिबिसन ३५ प्रतिशत स्वयां म्हो जुल धाःसा अज्याःगु तरकारी नयेजिउगु ल्याखय् तइ । तर ४५ प्रतिशतं अप्वः खनेदत धाःसा प्रतिबन्ध तयेगु याइ ।

थौंकन्हय् कालिमातिइ च्वंगु फलफुल तथा तरकारी बजारय् तयातःगु प्रयोगशालाय् वंगु खुला न्ह्यवनिसें यानास्वःगु नमूना परीक्षणय् विषादी मलूगु खँ निर्देशनलायया वरिष्ठ बाली संरक्षण अधिकृत मानबहादुर क्षेत्रीं धयादीगु दु । तर वय्कलं थःपिंके दुगु मेसिनं निगू कथंया विषादी अर्गानोफोस्फेट व कार्बामेट जक पत्ता लगे जुइगु, फंगिसाइट लिसें मेमेगु विषादी धाःसा पत्ता लगे यायेमफइगु कथंया मेसिन जूगु खँ नं धयादीगु दु ।

राष्ट्रिय उपभोक्ता हित संरक्षण मञ्चया अध्यक्ष प्रेमलाल महर्जनं बिबिसीलिसे खँ ल्हासें सिसाबुसा व तरकारीइ विषादीया छ्यलाबुला म्हो जूगु खनेदयाच्वंसां धुक्क हे जुयाः नयेफइगु अवस्था मदुनि धयादीगु दु । वय्कलं निर्देशनलायं परीक्षण याःगु नमूना कथंया तरकारी जक सकसिनं नयेखनीगु अवस्था मदु धासें थीथी थासं वइगु तरकारी फुक्कं विषादी मुक्त धायेफइगु अवस्था मदु धयादीगु दु ।

कृषि मन्त्रालयं कालिमातिइ तरकारी बजारय् विषादी परीक्षण यायेगु निंतिं २०७१ सालय् प्रयोगशाला तःगु खः । थौंकन्हय् देय्न्यंकं न्हयगू थासय् थज्याःगु प्रयोगशाला तयातःगु दु । तर थुलि प्रयोगशालां देन्यंकंया आपूर्तियात परीक्षण यायेमफइगु खँ उपभोक्ता अधिकारकर्मीतय्सं धयाच्वंगु दु ।

सम्बन्धित बुखँ

LEAVE YOUR COMMENTS