येँया १५२ उम्मेदवारं खर्च विवरण बुझे यात

येँ जिल्लां प्रतिनिधिसभा व प्रदेशसभाय् प्रत्यक्षपाखें उम्मेदवारी बिउपिं उम्मेदवारपिं मध्ये करिब सत्याम्हेसिनं थःपिनिगु चुनावी खर्च विवरण पेश याःगु दु ।
वंगु मंसिर २१ गते निगूगु चरणय् जूगु निर्वाचनय् येँया झिगुलिं निर्वाचन क्षेत्रय् प्रतिनिधिसभापाखे १७१ व प्रदेशसभाय् २२२ म्ह यानाः मुक्कं ३९३ म्हेसिनं प्रत्यक्षय् उम्मेदवारी बिउगु खः । उकी मध्ये १५२ म्हेसिनं थःपिनिगु चुनावी खर्च विवरण बुझे याःगु क्षेत्रीय निर्वाचन ज्याकूया निर्वाचन अधिकृत विनोदकुमार दाहालं कनादीगु दु ।

वय्कलं बियादीगु जानकारी कथं प्रतिनिधिसभापाखे ख्वीछम्ह व प्रदेशसभापाखे ग्वीछम्ह यानाः मुक्कं सछि व न्यय्निम्हेसितं खर्च विवरण बुझे याःगु खः ।
निर्वाचनय् प्रतिनिधिसभाया उम्मेदवारीयात नीन्यागू लाख व प्रदेशसभा उम्मेदवारयात झिंन्यागू लाख तक खर्च याये दइगु व्यवस्था यानातःगु खः । निर्वाचनय् जूगु खर्चया विवरण वंगु माघ २ गते तकया दुने बुझे यायेत धयातःगु खः । क्षेत्रीय निर्वाचन ज्याकूयाकथं निवार्चन खर्च विवरण पेश याःपिं सकसिनं खर्चया सीमाय् च्वनाय् विवरण बुझे याःगु दुसा विवरण पेश मयाःपिं उम्मेदवारं खुदँ तक उम्मेदवारी बी मदइगु व्यवस्था यानातःगु दु ।

निर्वाचन अधिकारी दाहालं बियादीगु जानकारीकथं येँ क्षेत्र नं. १ पाखें निर्वाचित नेपाली कांग्रेसया प्रकाशमान सिंहं १७ लाख ३० हजार, क्षेत्र नं २ पाखें निर्वाचित नेकपा (एमाले)या माधवकुमार नेपालं १४ लाख ९० हजार, क्षेत्र नं. ३ पाखें निर्वाचित कृष्ण राई २२ लाख ५६ हजार, क्षेत्र नं. ४ पाखें निर्वाचित गगन थापां २४ लाख १३,१००, क्षेत्र नं. ५ पाखें निर्वाचित एमाले महासचिव ईश्वर पोखरेलं २४ लाख १४ हजार व क्षेत्र नं. ९पाखें निर्वाचित कृष्णगोपाल श्रेष्ठं १२ लाख ७८ हजारया खर्च विवरण बुझे यानादीगु दु । अथे हे विवकशील साझा पार्टीपाखें क्षेत्र १ य् उम्मेदवार जुयादीम्ह रवीन्द्र मिश्रं १३ लाख ८९,२१४, क्षेत्र नं. ५य् नेपाली कांग्रेसया प्रकाशशरण महतं १६ लाख ४१ हजारया खर्च विवरण पेश यानादीगु दु ।

सम्बन्धित बुखँ

LEAVE YOUR COMMENTS