विश्व राजनीतिया केन्द्रविन्दुइ किम

खुदँ न्ह्यव उत्तर कोरियाया सर्वोच्च नेता जूबलय् किम जङ अन थःम्हं नं शायद हे जक थ्व बिचाः याःगु जुइ कि थुलि याकनं थः विश्व राजनीतिया केन्द्रय् लाःवइ । विश्वया महारथी देय्या प्रमुखत थःत नापलायेत लालायित जुइ । थः अबु किम जङ इल मदयेधुंकाः नीच्यादँया ल्याय्म्हया वैंशय् हे उत्तर कोरिया सर्वोच्च नेता जूवःम्ह किमयात उबलय् विश्वं नं थुलि याकनं विश्व राजनीतिया खेलाडी जूवइ धयागु बिचाः याःगु मखु । विश्वं वयात राजनीतिइ परिपक्व मजूनीम्ह छम्ह ल्याय्म्हया रुपय् जक हे स्वयाच्वंगु खः, तर उबलय् नं थ्व ल्याय्म्हं छु याइ धयागु स्वयेत धाःसा उत्सुक हे जुयाच्वंगु खः ।

थःबारे सिइके चाहे जूपिं विश्वयात किमं खुदँ तक वास्ता तकं मयाः । थः अबु–बाज्यां थें विश्वपाखें अलग हे च्वनाः किमं थःगु ज्या यानायंकल । थ्व खुदँया दुने वं थःत विश्व राजनीतिइ थज्याःम्ह खेलाडी दयेकाबिल कि विश्वया महारथी देय्या नेतात वयात नापलायेत लालायित जुइमाल ।

यदि छुं गडबड मजुल धाःसा अमेरिकी राष्ट्रपति डोनाल्ड ट्रम्पं वयात कंस जून १२य् विनाशर्त सिंगापुरय् नापलाइ । अमेरिका लिसे टक्कर कयाच्वंगु रुसया राष्ट्रपति भ्लादिमिर पुटिनं वइगु सेप्टेम्बरय् नापलायेत किमयात निमन्त्रणा छ्वयेधुंकूगु दु । सिरियाया राष्ट्रपति बशर अल असदं ला याकनं हे उत्तर कोरिया वनाः किमयात नापलायेगु धायेधुंकूगु दु । दक्षिण कोरियाया राष्ट्रपति मुन जे इन व चिनियाँ राष्ट्रपति शी जिनपिङं ला किमयात नापलाये हे धुंकूगु दु ।

धाथें किमं अपाय्सकं छु यात ले, विश्वया नेतात वयात नापलायेत उत्सुक जुइक ? थ्व इलय् किम शान्तिया लँपुइ न्ह्यावःगुलिं हे जुइमाः, विश्व राजनीतिया केन्द्र विन्दूइ लाःवःगु । खुला न्ह्यव तक नं परमाणु हतियारया लगातार परीक्षण यानाः विश्वयात थर्कमान यानाच्वंम्ह किम आकाझाकां शान्तिया लँपुइ न्ह्याः वःगु दु । अमेरिकी राष्ट्रपतियात नापलायेत तयार जूगु दु । दक्षिण कोरियालिसे शान्ति वार्ताय् च्वनेधुंकूगु दु । थज्याः थज्याःगु हे कारणं छगू इलय् ग्यानापुम्ह, सुनां थुइके मफुम्ह कथं जक चर्चा जुयाच्वनीम्ह किम आः विश्व राजनीतिया केन्द्रय् लाःवःगु दु ।

किम थथे शान्तिय् लँपुइ न्ह्याःवःगु अमेरिकां धयाच्वं थें सुयां दबाबय् धाःसा पक्कां मखु । अमेरिका लगायत विश्वं तयातःगु कडा नाकाबन्दीं खनाः ग्यानाः वार्ताय् वयेत तयार जूगु धाःसा मखु । आः ला किम थः नं छम्ह शक्तिशाली खः धयागु आत्मविश्वास ज्वनाः न्ह्याःवःगु खनेदु । वयात थ्व आत्मविश्वास बिउगु धाःसा वयागु हे परमाणु कार्यक्रमं खः ।

अमेरिका लिसें विश्वया दबाबया दथुइ वं थःगु परमाणु परीक्षणयात मत्वःतू । लगातार परीक्षणया सफलता लिपा उत्तर कोरिया नं परमाणु हतियारपाखें सम्पन्न जुइधुंकूगु दु । अमेरिका लिसें विश्वया परमाणु हतियारपाखें सम्पन्न देय् स्वयां थः नं छुं कम मखु धयागु आत्मविश्वास किमयाके वयेधुंकूगु दु । थ्व हे आत्मविश्वास ज्वनाः व विश्व राजनीतिक दबुली खुल्ला जूवःगु दु । वं धाये नं धुंकूगु दु, ‘परमाणु कार्यक्रम फुक्क पूवनेधुंकूगु दु, आः जिगु पूवंक ध्यान देय्या अर्थव्यवस्था सुधार यायेगु पाखे जुइ ।’

किमयात थुलि आत्मविश्वास हयेगु ज्याय् नितां खँ नं तसकं ग्वाहालि यात । छगू जःलाखःला देय् दक्षिण कोरियाय् उद्धारवादी नेता मुन जे इन राष्ट्रपतिइ त्यानावःगु व चीनं मदिक्क बिया वयाच्वंगु साथ । मुन जे इनं चुनावया इलय् हे उत्तर कोरियालिसे बांलाःगु स्वापू कायम यायेगु धकाः प्रचार यानाः त्याका वःगु खः । अले वं थःम्हं बिउगु बचं कथं क्वमिलु जुयाः उत्तर कोरियालिसे स्वापू बांलाकेगु कुतः यात ।

राष्ट्रपति इनया हे मदिक्क कुतःया कारणं अमेरिकी राष्ट्रपति ट्रम्प किमयात नापलायेत तयार जुल । चीनं ला उत्तर कोरियायात न्हापां निसें साथ बिया वयाच्वंगु खः, अले छुं ई न्ह्यव अमेरिका, संयुक्त राष्ट्र संघं तःगु कडा प्रतिबन्धय् नं चीनं साथ मत्वःतू । चीनं ला आः नं धायेधुंकूगु दु, ‘उत्तर कोरियां आः परमाणु कार्यक्रम बन्द याइगु जुइधुंकुसेलिं वयात तयातःगु प्रतिबन्ध फुक्क चिइकेमाः, अले वयात अर्थतन्त्र बल्लाकेत ग्वाहालि यायेमाः ।’

विश्वया हे शक्तिशाली देय् मध्ये छगू लानाच्वंगु चीनया थ्व हे आडभरोसां यानाः किमया आत्मविश्वास बल्लानाच्वंगु खः । किमया थ्व आत्मविश्वास थौंकन्हय् वया ख्वालय् खनेदया च्वंगु दु । दक्षिण कोरियाली राष्ट्रपति मुन जे इनयात नापलाःबलय् वयागु ख्वालय् खनेदुगु न्हिलासू थ्व हे आत्मविश्वासया कारणं खः, गुगु वया अबु, बाज्याया ख्वालय् गुबलें खनेमदु ।

अमेरिकां थ्वयां न्ह्यः उत्तर कोरिया पूवंक परमाणु निःशस्त्रीकरण मजुइक वार्ता यायेफइमखु धयागु ख्याच्वः बिया वयाच्वंगु खः । तर आः बिना शर्त वार्ता च्वनेत तयार जूगु दु । थ्व वार्ता जुल धाःसा सन् २०१८ या खुला दुनेया दकलय् तःधंगु राजनीतिक घटना जुइगु पक्का दु । थुकिं हे नं क्यं किम गुलि विश्व राजनीतिया केन्द्र विन्दूइ लानाच्वंगु दु धयागु खँ ।

आः थः नं शक्तिशाली जुल धयागु आत्मविश्वासं जाःम्ह किम व थः विश्वया हे शक्तिशाली राष्ट्र खः धयागु घमण्ड याइगु अमेरिकाया राष्ट्रपति ट्रम्प दथुइया शिखर वार्ता छु जुइ धयागु स्वयेबहः जुइ ।

सम्बन्धित बुखँ

LEAVE YOUR COMMENTS