विश्वकप २०१८

पुस २७ सार्वजनिक विदाया विरोध

कन्हय् असनय् मुनाः विरोध

येँ (नेपालभाषा टाइम्स)÷पृथ्वीनारायण शाहया बुन्हि कुन्हु लाकाः पुस २७ गते हानं सुरु याःगु सार्वजनिक बिदायात नेवाः ख्यलं विरोध याःगु दु ।
नेवाः जागरण मञ्चं थन छगू वक्तव्य जारी यासें देय्या फुक्क जाति, भाषा, धर्मया अस्तित्व तंकेगु ज्या याःम्ह पृथ्वीनारायण शाहया बुन्हियात राष्ट्रिय एकीकरणया नां बियाः हानं तःजिक न्यायेकेगु सरकारया निर्णय विरुद्ध सः तयेत इनाप याःगु दु । देय्या सकलें आदिवासी जनजाति, मधेसी जनतां नं थ्व न्हिया बिदायात विरोध यायेत मञ्चं इनाप याःगु दु ।
थ्वहे झ्वलय् कन्हय् पुुस २७ गते असनय् मुनाः विरोध प्वंकेत नं जागरण मञ्चं इनाप याःगु दु । मञ्चपाखें नेपाः युथ अर्गनाइजेशन, नेवाः प्रदेशया नितिं आदिवासी जनजाति जागरण अभियानं यायेत्यंगु ज्याझ्वःयात नं ऐक्यबद्धता प्वंकुसें कन्हय् असनय् जुइगु प्लेकार्ड ब्वज्या व मोटरसाइकल ¥यालीइ ब्वति कायेत नं इनाप याःगु दु ।
कन्हय् येँया असनं छगू मोटरसाइकल ¥याली पिकयाः किपूया छ्याकः ल्वहँतय् ई फानाः पृथ्वीनारायण शाहप्रति घृणा प्वंकेगु ज्याझ्वः तयातःगु दु ।
येँया असनय् मुनाः मोटरसाइकल ¥याली पिकाइसा उगु ¥यालीया किपूया बसपार्कय् लसकुस याइगु ग्वसाः दु । किपुली पृथ्वीनारायण शाह चुलुयाः दःगु द्यःध्वाखाकाया ल्वहं दुथाय् सकलें मुनेगु व अनं तुं बसपार्क वयाः मोटरसाइकल ¥यालीयात लसकुस यासें छ्याकः ल्वहँतय् वनाः सभा याइगु ज्याझ्वः दु । वयां लिपा बाघभैरवय् पृथ्वीनारायण शाहलिसे जूगु युद्धय् प्रयोग जूगु ल्वाभःया निरीक्षण यायेगु ज्याझ्वः तयातःगु दु ।

सम्बन्धित बुखँ

LEAVE YOUR COMMENTS