छु टिमया गुलि सम्भावना

रुसयात आयोजकया दबाब
पुच ‘ए’
रुस, उरुग्वे, इजिप्ट व साउदी अरेबिया

थम्हं तुं विश्वकप ग्वसाः ग्वयेगु, अले थः हे न्हापांगु चरणं पिहां वनेगु साप हे म्हाइपुगु ज्या जुइयः विश्वकपय् । रुसयात थ्व हे दबाब दु, ग्वसाः देय्या ल्याखं । विश्वकप इतिहासय् धाःसा आः तक छक्वःयां छक्वः जक थथे जूगु दु । रुसया उद्देश्य जुइ थथे मजुइमा । बांलाक स्वल धाःसा सायद थ्व पुचलं रुस म्होतिं नं निगूगु चरणय् थ्यनेमाः ।

थ्व पुचलय् दकलय् बल्लाःगु टिम खः, उरुग्वे । थ्व ल्याखं रुस व उरुग्वे हे नकआउट चरणय् थ्यनीगु जुइ । उरुग्वे ला पूर्व विजेता नं खः, सन् १९३० व १९५० या । उरुग्वेनाप निम्ह स्टार कासामि दु, एडसन कभानी व लुइस स्वारेज । रुसया सम्भावना कमजोर यायेफुगु टिमया ल्याखं दयेफु, इजिप्ट ।

पोर्चुगल व स्पेनया टक्कर
पुचः ‘बी’
इरान, पोर्चुगल, स्पेन, मोरक्को

पोर्चुगलं निद“ न्ह्यः युरो २०१६ त्याकल । युरोपेली फुटबल महाशक्ति जूसां पोर्चुगलं त्याकूगु थ्व हे आतकया छगूयां छगू तःधंगु उपाधी खः । आः नं पोर्चुगलयाके क्रिस्टियानो रोनाल्डोया साथ मदुगु मखु, अय्नं टिमया ल्याखं पोर्चुगलया प्रदर्शन विश्वस्तरीय मजू । थ्व हे पुचलय् पूर्व विजेता स्पेन नं दु । अथे ला थ्व विश्वकपय् ‘ग्रुप अफ डेथ’ मदु ।

सायद उकिया जःखः दुगु पुचः थ्व हे खः । गुबलय् पोर्चुगल व स्पेन दथुया कासा जुइ, व हे थुगु विश्वकपया न्हापांगु चरणया दकलय् हाइप्रोफाइल कासा जुइ । डिफेन्डिङ च्याम्पियनया ल्याखं प्यद“ न्ह्यः स्पेनया प्रदर्शन बांमलाः, तर टिम पुनर्आगमनया ल“य् दु । थ्व पुचःपाखें पोर्चुगल व स्पेनय् नकआउट चरणय् थ्यनी जुइ ।

फ्रान्सयात अःपुगु पुचः
पुचः ‘सी’–
फ्रान्स, अस्टे«लिया, पेरु, डेनमार्क

नकआउट चरणय् वनेत फ्रान्सयात तसकं अःपुगु पुचः लाःगु दु धाःसां छुं मपाः, अथे नं फ्रान्स थ्व पालय् हाकनं छक्वः विश्वकपया प्रबल दावेदार खः । फ्रान्स निद“ न्ह्यः युरो २०१६ या फाइनलय् नं थ्यंगु खः । फ्रान्सेली टिम हाकनं छक्वः प्रशिक्षक डिडिएर डेसक्याम्पया ल्हातय् दु । फ्रान्सयाके निम्ह प्रमुख कासामि नं दु, एन्टोनिया ग्रिजमन व केलिन एमबापे ।

थ्व ल्याखं न्ह्यसः जुइ, फ्रान्स धुंकाः थ्व पुचलं निगूगु चरणय् थ्यनीगु टिम गुगु जुइ ले ? सायद थुकिया लिसः जुइ, डेनमार्क । अस्टे«लिया एसियाली च्याम्पियन नं खः, थ्व ल्याखं थ्व टिमया चुनौती नं कमजोर धाःसा जुइ मखु, न पेरु हे कमजोर धायेबहगु टिम खः ।

अर्जेन्टिनाया समान प्रतिद्वन्द्वी
पुचः ‘डी’
अर्जेन्टिना, आइसल्यान्ड, क्रोएसिया व नाइजेरिया

अर्जेन्टिनायाके विश्व फुटबलया हे दकलय् बांलाःम्ह कासामि दु, तर व हे बांलाःम्ह कासामि मेसीं धाःसा आः तक थःगु देय्या नितिं छुं तःधंगु उपाधि त्याकेफुगु मदुनि । प्यद“ न्ह्यः अर्जेन्टिना विश्वकपया फाइनलय् थ्यंगु नं खः, तर जर्मनीया ल्हातं पराजित जुल ।

उकिं न्ह्यसः, थ्व पालय् अर्जेन्टिनाया निंतिं मेसीं छु याइ ? थ्व पुचःया मू विशेषता खः, अर्जेन्टिनाया मेगु स्वंगुलिं प्रतिद्वन्द्वी टिम समान खनेदु, अथे धयागु बराबरीया टक्करयापिं । उकिं अर्जेन्टिना धुंकाः नकआउट चरणय् थ्यनीगु टिमया निंतिं थ्व पुचलय् आइसल्यान्ड, नाइजेरिया व क्रोएसिया दथुइ रोचक कासा जुइ । आइसल्यान्डं विश्वकपय् डेब्यु यायेत्यंगु दु, थ्व जनसंख्याया ल्याखं विश्वकपया दकलय् चिधंगु देय् नं खः ।

ब्राजिलयात अःपु मजू
पुचः ‘ई’
कोस्टारिका, सर्बिया, ब्राजिल, स्विट्जरल्यान्ड

प्रत्येक विश्वकपया दकलय् आकर्षक टिम जुयाच्वनी, ब्राजिल । हाकनं ब्राजिल अज्याःगु देय् खः, गुम्हेसिया म्हसिका हे फुटबल खः । उलि जक मखु, ब्राजिलं न्याक्वः विश्वकप त्याके धुंकूगु दु । उकिं विश्वकप ब्राजिलबिना कल्पना याये मफु । न्ह्यसः थुलि जक खः कि ब्राजिलया प्रदर्शन गय् च्वनी ? ब्राजिल उपाधिया दावेदार नं खः, टिम नं उतिकं बांलाः ।

थ्व पुचलय् ब्राजिलया प्रतिद्वन्द्वीतय्त कमजोर धायेगु स्थिति धाःसा मदु । विश्वास दु, ब्राजिल नकआउट चरणय् ला थ्यनी, मेगु निगूगु चरणय् थ्यनीगु टिम छु जुइ, व धाःसा धाये थाकु । सायद थुकिया लिसः जुइफु, कोस्टारिका । थुकिया कारण लिपांगु विश्वकपय् कोस्टारिकाया गज्जबया प्रदर्शन हे खः ।

जर्मनी याउ“क थहां वनी
पुचः ‘एफ’
जर्मनी, मेक्सिको, स्विडेन व दक्षिण कोरिया

विश्वकप इतिहासय् मेगु बल्लाःगु टिम खः, जर्मनी । जर्मनी ला उकिसनं थुगुसी डिफेन्डिङ च्याम्पियन खः । उबलय् अर्जेन्टिनायात बुकाः जर्मनीं प्यक्वःगु खुसी विश्वकप त्याकूगु खः । छता हे जक ग्याःचिकु छु धाःसा डिफेन्डिङ च्याम्पियनया ल्याखं जर्मनी म्हितीबलय् दबाबय् लायेयः ।

थ्व पालय् लिग चरणय् धाःसा जर्मनीयात उलि थाकुइमखु, अःपुक हे च्वय् न्ह्याःवनीगु जुइ । प्रशिक्षक जोचिम लोया नेतृत्वय् जर्मनीं छुं न तःधंगु च्याम्पिनसिपय् सेमिफाइनल थ्यंगु हे दु । हाकनं जर्मनी दच्छि न्ह्यःया कन्फेडेरेसनकप विजेता नं खः । नकआउट चरण थ्यनीगु निगूगु टिमया नितिं मेक्सिको व स्विडेन ल्वाइगु जुइ ।

इंग्ल्यान्डया कारणं चर्चित
पुचः ‘जी’
बेल्जियम, पानामा, ट्युनिसिया व इंग्ल्यान्ड

गुबलय् गुबलय् इंग्ल्यान्ड म्हिती, अन यक्व हे चर्चा जुइ । उकिं इंग्ल्यान्ड दुथ्याःगु थ्व पुचः नं उतिकं चर्चाय् दु । विश्वकप थेंज्याःगु तःधंगु अवसर न्ह्यः इंग्ल्यान्डयात सम्भावित विजेताया ल्याखं नं न्ह्यब्वइगु जुइ, तर वं याइगु धाःसा छुं मखु । थ्व पालय् इंग्ल्यान्डं छु याइ ले सा ? प्यद“ न्ह्यः ला इंग्ल्यान्ड नकआउट चरण नं थ्यने मफु ।

सायद थ्व पालय् थथे जुइमखु । सन् १९६६ या विश्वकप विजेता इंग्ल्यान्डनापं बेल्जियम निगूगु चरणय् थ्यनीगु जुइ । बेल्जियम नं उत्तिकं बल्लाःगु टिम खः, उमिके स्टार कासामिया कमी मदु । पानामां धाःसा थ्व हे विश्वकपपाखें डेब्यु यायेत्यंगु दु । ट्युनिसिया धाःसा सन् २००६ लिपा विश्वकप म्हितेत्यंगु दु ।

दकलय् चकंगु पुचः
पुचः ‘एच’
कोलम्बिया, जापान, पोल्यान्ड व सेनेगल

थुगुसीया विश्वकपय् थ्व हे अज्याःगु छगूयां छगू पुचः खः, गन दक्वं कथंया सम्भावना खुल्ला दु । थ्व ल्याखं आःया विश्वकपय् छुं भचा ‘ग्रुप अफ डेथ’ धायेछिं । थ्व पुचःपाखें निगूगु चरण थ्यंकेगु सम्भावना दक्वं टिमयाके दु । हाकनं प्यंगू टिम प्यंगू फरक महादेशपाखे दु । निश्चित दु, थ्व पुचलय् रोमाञ्चक कासात जुइ ।

सायद पोल्यान्ड थ्व पुचलय् भचा बल्लाः, छाय्धाःसा उमिके अब्बल दर्जाया स्ट्राइकर रोबर्ट लेवनडोस्की दु । अनलिं कोलम्बिया नं भचा बल्लाः धायेगु कि ? आःया विश्वकपय् छुं छुं एसियाली देय्या सम्भावना दुसा व दकलय् अप्वः थ्व हे पुचलय् जापानया खः । आश याये जापानं निगूगु चरण थ्यंकाः एसियाया इज्जत तइ ।

सम्बन्धित बुखँ

LEAVE YOUR COMMENTS