विश्वकप २०१८

नेपाःया बजारय् वल्र्डकप फिभर

पीदँ दत विश्वप्रख्यात ब्रान्ड कोकाकोलांं फिफाया आधिकारिक प्रायोजन यानाच्वंगु । व हे पीदँ दुगु लसताय् कोकाकोला नेपालं थुगुसी पीम्ह भाग्यशाली विजेतातय्त रुसय् जुइगु विश्वकप स्वयेगु ह्वःताः चूलाकाबिउगु दु । ‘कोक खाम, रसिया जाम’ धकाः विश्वकप शुरु जुइ प्यला न्ह्यः निसें थुगु अभियान शुरु याःगु खः ।

अभियान शुरु जूगु न्हि कुन्हु कोकाकोला नेपालया अधिकारिक विक्रेता बोटल्र्स नेपालया प्रवन्ध निर्देशक पुनित भर्सिनें विश्वकपया निंतिं नेपालय् जूगु तःधंगु अभियान मध्ये थ्व छगू खः धकाः दावी यानादिल ।कोकाकोलां थें हुन्डाइ गाडीं ‘रोड टु रसिया’ नां बियाः मेगु अभियान शुरु यात, गुकिं भाग्यमानी निम्हेसिनं रुसय् वनाः विश्वकपया फाइनल कासा स्वयेगु अवसर चूलाकूगु दु ।

छखे थःगु ब्राण्डया सामान न्यानाः विश्वकप जुइगु मैदानय् तक थ्यंकेगु निंतिं थीथी ‘स्किम’त बजारय् वयाच्वंगु दुसा मेखे विश्वकप थःगु हे छेँय् च्वना स्वयेगु निंतिं टिभी विक्रेतातय्सं थीथी योजना हयाच्वंगु दु । विशेष यानाः मोहनि व स्वन्तिया इलय् बीगु ‘क्यास ब्याक’ अफरया योजनायात थुगुसी विश्वकपय् नं लागू याःगु दु ।

विश्वकपया निंतिं २० प्रतिशत निसें ३० प्रतिशत तक ‘क्यास ब्याक’ अफर हयाः थीथी ब्राण्डया टिभी कम्पनीतय्सं बजार कायेगु कुतः यानाच्वंगु दु । सिजी, योसोधा लगायत थीथी ब्राण्डया टिभी बिक्रि याइगु अल्फा इन्टरप्राइजया अनिश ताम्राकारं विश्वकपया इलय् न्हापा लिपा स्वयां ५ निसें १० प्रतिशत अप्वः टिभी बिक्रि जुइगु कनादिल ।

प्यदँय् छक्वः वइगु विश्वकपया झ्वलय्
अय्लाः निसें जूस तक टिभीं निसें गाडीइ तक थीथी आकर्षक योजना वःगु दु

‘आः थीथी ब्राण्डया टिभी कम्पनीतय् दथुइ ब्राण्ड वार जुयाच्वंगु दु’, वय्कलं धयादी, ‘थज्याःगु ब्राण्ड वारया कारणं टिभी न्याइपिंत फाइदा जुइगु व न्हापा लिपा स्वयां अप्व व्यापार जुयाच्वंगु दु ।’प्यदँ न्ह्यः विश्वकपया इलय् केवल टिभी जक बिक्रि जुइगु यानाच्वंसां थुगुसी धाःसा टिभी नापं प्रोजेक्टरया बजाः नं बांलाक जुयाच्वंगु दु ।

तःधंगु पर्दाय् विश्वकपया मज्जा कायेगु निंतिं होटल, रेष्टुराँय् जक मखु छेँय् तयेगु निंतिं नं मनूतय्सं प्रोजेक्टर न्याना यंकाच्वंगु दु ।उखे तःधंगु पर्दाय् विश्वकप क्यनेत होटल व रेष्टुराँतय्सं तयारी शुरु याःगु दु । विशेष यानाः फुटबल व मेमेगु कासा क्यनेगु निंतिं चायेकातःगु स्पोर्टस् हाइभ, ट्रान्जिट, अप्पर डेक थेंज्याःगु रेष्टुरां विश्वकप क्यनेगु त्वःफिकीगु ला खँ हे मजुल ।

तर न्हापालिपा छुं नं कासा मक्यनीगु चिचिधंगु रेष्टुरेन्टय् तकं प्रोजेक्टर व तःधंगु पर्दा तयाः फुटबल क्यनेगु तयारी यानाच्वंगु दु ।अज्याःगु फुटबल क्यनेत्यंगु रेष्टुराँयात हे टार्गेट यानाः थीथी अय्लाः व बियर कम्पनीतय्सं थःगु प्रचार यायेगु ज्या शुरु यानाहःगु दु ।

मेमेगु ब्राण्ड स्वयां थःगु ब्राण्ड प्रति स्वकुमितय्त आकर्षण यायेगु निंतिं कासाया झ्वलय् ‘प्रेडिक्ट एन्ड वीन’ गेम म्हितकाः सितिकं अय्लाः व बियर बीगु योजना अज्याःगु कम्पनीतय्सं न्ह्यःने हःगु दु ।विश्वकपया निंतिं हे थीथी स्पोर्टस ब्राण्डया कम्पनी निसें कयाः साधारण पसल्यातय्सं नं विश्वकप म्हितीगु देय्तय् जर्सि मीगु ज्या शुरु याःगु दु ।

प्यदँय् छक्वः वइगु विश्वकपया झ्वलय् अय्लाः निसें जूस तक टिभीं निसें गाडीइ तक थीथी आकर्षक योजना वःगु दु । आकर्षक योजनाया कारणं थीथी सामानया विक्रि न्हापालिपा स्वयां अप्वः जुइगु स्वाभाविक खः । विश्वकपया कारणं बजारय् ध्यबा चलायमान जुइगु व उकिं अर्थतन्त्रयात छुं भचा जूसां सकारात्मक याइगु अर्थविद्तय् दावी दु ।

 

सम्बन्धित बुखँ

LEAVE YOUR COMMENTS