‘ट्रम्प नापलायेत किम झुके जुल’
अमेरिकी राष्ट्रपति डोनाल्ड ट्रम्पया वकिल रुडी जुलियानीं उत्तर कोरियाया नेता किम जङ अनं राष्ट्रपति ट्रम्पलिसे वार्ता यायेगु निंतिं बिन्ति बिन्ति यानाः करजोर याःगु खँ धाःगु दु । राष्ट्रपति ट्रम्पं जून १२य् जुइगु क्वःछिनातःगु बैठक रद्द यायेधुंकाः उत्तर कोरियाली नेतां वार्ता यायेगु निंतिं करजोर यानाः इनाप याःगु खँ धाःगु खः ।
इजरायलय् छगू पत्रकार सम्मेलनय् न्ववासें वकिल जुलियानीं ट्रम्प कडा जुयाः पिहांवःगुलिं उत्तर कोरिया थुलि कुहां वयेत बाध्य् जूगुु खँ नं धाःगु दु ।सिंगापुरय् जून १२य् जुइ धयातःगु वार्तायात राष्ट्रपति ट्रम्पं छक्वः रद्द यायेधुंकूगु खः, तर हाकनं उत्तर कोरियां मैत्रीपूर्ण प्रतिक्रिया बियाहःगुलिं हाकनं वार्ताया तयारी सुरु जूगु खः ।
जुलियानीं इजरायलय् न्ववायेगु झ्वलय् धयादीगु खः, ‘किम जङ अन अथेहे झुके जूगु दु, गथे व झुके जुइमाः धकाः झीसं स्वये चाहे जुयागु खः ।’जुलियानीया थ्व धापूयात कयाः उत्तर कोरियापाखें आःतक छुं नं प्रतिक्रिया धाःसा मवःनि । मेखे राष्ट्रपति ट्रम्पं धाःसा वइगु मंगलवाः जुइगु वार्ताया निंतिं फुक्कं खँ बांलाक न्ह्याः वनाच्वंगु खँ धाःगु दु ।
जुलियानीया आःया धापूयात हाकनं छक्वः शिखर वार्ता त्वाःथलेगु कुतः कथं स्याहःगु दु । थ्वयां न्ह्यः नं अमेरिकी सुरक्षा सल्लाहकार जोन बोल्टनया छगू धापूयात कयाः उत्तर कोरियां कडा प्रतिक्रिया बियाहःगुलिं राष्ट्रपति ट्रम्पं वार्ता त्वाःथलाबिउगु खः ।
उबलय् राष्ट्रिय सुरक्षा सल्लाहकार बोल्टनं उत्तर कोरियाया नेताया स्थिति नं लिबियाया नेता गद्दाफिया थें जुइ धकाः धायेवं प्योङयाङं कडा रुपं खन्डन याःगु खः । उबलय् राष्ट्रपति ट्रम्पं नं बोल्टनया धापूपाखें तापाक च्वंगु खः ।
LEAVE YOUR COMMENTS