नेपाल क्यान्सर अस्पतालया न्हापांगु वार्षिकोत्सव

यल-  नेपाल क्यान्सर अस्पताल एन्ड रिसर्च सेन्टरं थःगु न्हापांगु वार्षिकोत्सव हंगु दु । परराष्ट्रमन्त्री प्रदीप ज्ञवालीं वार्षिकोत्सव ज्याझ्वःया उलेज्या यानादीगु खः ।

‘नेपाःया क्यान्सरया उपचार नेपालय् हे’ धइगु नारा बियाः हंगु न्हापांगु वार्षिकोत्सवया उलेज्या यासें परराष्ट्र मन्त्री ज्ञवालीं गुणस्तरीय स्वास्थ्य सेवाया निंतिं थजःगु अस्पताल हरेक प्रदेशय् दत धाःसा उपचारया निंतिं विदेश वनेगु बाध्यताया अन्त्य जुइगु नापं नेपाःया अर्बौं तका नं बचे जुइ धयादिल ।

थीथी कथंया क्यान्सरया ल्वगित अप्वया वनाच्वंगुलिं जनचेतनाया ज्याझ्वः न्ह्याकेमाःगु आवश्यक जूगु खँय् बः बियादिसें स्वंगूगु वा प्यंगूगु चरणय् थ्यने धुंकाः जक क्यान्सरया पहिचान जुइगु यानाच्वंगु वय्कलं धयादिल । शुरुं हे पहिचान याये फत धाःसा जनचेतना अझ अप्वयेके फइगु व आर्थिक वचत नापं अकाल मृत्यु नं पने फइगु वय्कलं धयादिल ।
यल महानगरपालिकाया उपप्रंमुख गीता सत्यालं अस्पताल महानगरपालिकाया तिसा जूगु धासें स्थापनाया न्हापांगु दँय् हे अस्पतालं बिउगु सेवा उत्कृष्ट खनेदु धयादिल ।

नेपाल मजदुर किसान पार्टीया नायः नारायणमान बिजुक्छेँं ज्याझ्वलय् वयाः अस्पतालया बारे अझ सतिकं सीकेगु अवसर प्राप्त जूगु धयादिल । ज्याझ्वलय् प्रदेश नं. ३या प्रदेशसभा सदस्य राजकाजी महर्जन, सेन्टरया कार्यकारी अध्यक्ष डा. सुदिप श्रेष्ठं नं नवानादीगु खः ।

अस्पतालं थौंकन्हय् स्वंगु विभागपाखें उपचार सेवा बिया वयाच्वंगु दु । मेडिकल अन्कोलोजी अन्तर्गत अस्टे«लियन दिशानिर्देशनया केमोथेरापी व ओएसएए गाइडलाइनय् आधारित सुरक्षित केमोथेरापी अथे हे सर्जरी अन्कोलोजी अन्तर्गत हेड एण्ड नेक, थोरासिक, हेपाटोब्लरी, ग्यास्ट्रो इन्टेस्जाइ व ब्रेस्ट सर्जरीया सेवा बिया वयाच्वंगु दु ।

सम्बन्धित बुखँ

LEAVE YOUR COMMENTS