कालिमाटी–टेकु ताँय् गम्भीर त्रुटी

ताँया निर्माण रोके या धाःसां ठेक्केदारं दयेकां तुं च्वन

येँ – कालिमाटीं टेकु स्वाइ कथं दयेकाच्वंगु ताँय् गम्भीर प्राविधिक त्रुटी लुइकूगु दु । काठमाडौं दिगो शहरी यातायात आयोजनां दयेकाच्वंगु थ्व ताँय् ठेकेदार कम्पनीं गम्भीर त्रुटी यानाच्वंगु आयोजनाया इन्जिनियरतय्सं लुइकूगु खः । त्रुटी खनेदुगुलिं आयोजनाया इन्जिनियरतय्सं ज्या दिकि धाःसां ठेकेदारं ज्या न्ह्याकाच्वंगुलिं आयोजनां आः ठेकेदार कम्पनीयात स्वन्हुया दुने लिखित लिसः बीत निर्देशन बिउगु दु ।

कालिमाटी–टेकु स्वाइगु थ्व ताँ तसकं बदनाम जुयाच्वंगु ठेकेदार कम्पनी पप्पु कन्स्ट्रक्सनं दयेकाच्वंगु खः । थ्व ठेकेदार कम्पनी बांमलाक ज्या याइगु, ज्या इलय् पूमवंकीगु कम्पनी कथं तसकं बदनाम खः ।
थ्व ताँय् नं कम्पनीं आयोजनाया इन्जिनियरतय् सुझावयात वास्ता मयासे ताँया पक्की आधार संरचना दयेकेधुंकूगु दु । इन्जिनियरतय्गु निर्देशन हे वास्ता मयासे दयेकूगु थ्व हद हे तकया लापरवाही खः धाःगु दु । आयोजनां कम्पनीयात लिखित लिसः बीत पित बिउगु सुचनय् हे हदय् तक लापरवाही याःगु धासें स्वन्हुया दुने लिसः बिउ मवल धाःसा सम्झौता कथं गम्भीर निर्णय यायेमाली धयातःगु दु ।

सुचनय् धयातःगु दु, ‘ज्याया गम्भीरता व ताँया सुरक्षायात ध्यानय् तयाः फुक्क ज्या दिकेत बियागु निर्देशन अवज्ञा यानाः ज्या याःगु खने दत । जिमिगु सल्लाह बिना हे डेक स्लब दयेके क्वचायेकूगु खनेदत । थुकियात जिमिसं ठेकेदारं याःगु लापरवाहीया अधिकतम बिन्दू तायेकागु दु ।’


बदनाम कम्पनी
पप्पु कन्स्ट्रक्सन न्यून गुणस्तर सामान तयाः ज्या याइगु, इलय् ज्या सिमधयेकीगु कम्पनी कथं तसकं बदनाम खः । संघीय समाजवादी फोरमया नेता हरिनारायण रौनियारया थ्व कम्पनीं देन्यंकं थीथी थासय् ताँ, सतक दयेकेगु ठेक्का कयाः ज्या मयासे च्वनाच्वंगु दु । दंगु भावं ठेक्का लाकाः न्हापांगु किस्ता ध्यबा कायेधुंकाः लिपा ज्या हे मयासे च्वनीगु द्वपं थ्वयात दु ।

थ्व कम्पनीं बर्दिया जब्दीघाटय् च्वंगु बबई खुसिइ दयेकूगु ताँ ला दयेके क्वचायेकाः हस्तान्तरण हे मजूनिगु इलय् त्वःधूगु खः । अथेहे रौतहतया लालबकैया खुसिइ दयेकूगु ताँ नं निक्वः तक भासे जुइधुंकूगु दु । नेपालगञ्जया राँझानिसें जमुनाहा तक दयेकूगु सतकय् नं दयेकूगु छुं ई लिपा हे गाः गाः खनेदयेक भासे जुइवं थ्व कम्पनीं न्यागूत्या करोड क्षतिपूर्ति पूगु खः ।
थ्वहे कम्पनीं दयेकाच्वंगु डल्लुया ताँ नं आःतक दयेके क्वचाःगु मदुनि । अथेहे तःगू थासय् सतक, ताँ दयेकेगु ठेक्का कयाः मदयेकुसे च्वनाच्वंगुलिं थ्व कम्पनीया नां थौंकन्हय् ज्या मयाइगु ठेकेदार कम्पनी कथं गृहमन्त्रालयय् थ्यनाच्वनेधुंकूगु दु ।

सम्बन्धित बुखँ

LEAVE YOUR COMMENTS